KOTA MAMA-TENE NI | SATAN AYEKE DÄ BIANI
Satan ayeke dä biani?
Mbeni dessin na gbata ti Madrid, na Espagne, so afa Satan tongana mbeni ange so nengo ti lo akiri na gbe ni mingi
“Mbi kono lani na Salvador. Tongana mbi sara kpengbango-li, mama ayeke tene ka na mbi, atene, ‘Zabolo ayeke ga ti gbu mo!’ Na mbi yeke tene ka na lo, mbi tene, ‘Zia lo ga ma!’ Mbi mä na bê na Nzapa me na Satan ape.”—ROGELIO.
Mo kue mo yeke na oko pensé ti Rogelio so? Na gbe ni ge, mo yeke wara ambeni bango ndo nde nde. Ati so wa la mo pensé ayeke peut-être na lege ni?
-
Satan ayeke dä ape, lo yeke gi mbeni sioni ye awe.
-
Satan ayeke dä biani, me ngbanga ti lo ayeke dä na azo ape.
-
Satan ayeke mbeni ngangu créature ti yingo so ayeke sara ngangu mingi na ndo ti azo.
Azo mingi ayeda na abango ndo nde nde so kue, na peut-être wungo ti azo ni ayeke kutu na kutu. Me na popo ti abango ndo ni so, lo ti so wa la ayeke biani na lege ni? Tongana Satan ayeke dä ape, andâ azo so apensé atene lo yeke dä so ahanda tere ti ala. Tongana Satan ayeke dä biani, me ngbanga ti lo ayeke dä na azo ape, andâ azo ayeke sara mbeto ti lo gi senge senge. Me, tongana Satan ayeke zo ti handango azo, andâ lo yeke sioni mingi ahon ti so azo ayeke pensé na ni.
Zia e bâ kiringo tënë ti Bible na ahundango ndo so ge: Satan ayeke gi mbeni sioni ye? wala lo yeke mbeni zo ti yingo. Tongana Satan ayeke mbeni zo, lo lingbi ti sara sioni na mo? Tongana a yeke tongaso, mo yeke sara tongana nyen ti bata tere ti mo?
