Azo so asara terê ti ala kete ayeke ne ka amba ti ala. Ala yeke azo ti baba ape nga ala ye si azo amû nengo na ala ahon ndö ni ape. Ala yeke pensé vraiment na amba ti ala nga ala ye ti manda ye na mbage ti ala.

Ambeni zo apensé so tongana mo sara terê ti mo kete, andâ buba la mo sara so, me a yeke vrai ape. Ti tene mbeni zo ayeda na afaute ti lo nga lo hinga alimite ti lo, a bezoin courage.

• Tongana zo asara terê ti lo kete lo yeke wara akamarade. Mbeni buku (The Narcissism Epidemic) atene so mingi ni, a yeke ngangu ape na azo so ayeke sara terê ti ala kete ti sara kamarade. Buku ni afa nga so a yeke facile na ala ti sara lisoro na azo.

• Tongana molenge ti mo asara terê ti lo kete, lo yeke bâ nzoni gbândä dä. Tongana lo manda ti sara terê ti lo kete laso, a yeke duti ande facile na lo ti wara kua. Pakara Leonard Sax atene so tongana mbeni maseka aye ti fa so lo hinga ye kue, na lo grisa so ambeni ye ayeke dä so lo hinga ti sara ni ape, a yeke duti ande ngangu ti tene a bâ lo na nzoni lê na temps so lo yeke gi kua. Me tongana mbeni maseka agi ti hinga nyen la ayeke kota ye na lê ti zo so aye ti mû lo na kua, lo la a yeke mû lo na kua. *

Fa na lo ti pensé mingi ni gï na lo wani ape.

MAMA-NDIA TI BIBLE: “Tongana mbeni zo abâ terê ti lo so lo yeke mbeni ye, andâ lo yeke ye oko pëpe, lo yeke handa terê ti lo wani la.”​—aGalate 6:3.

• Kpe ti tene atënë so apeut ti duti nga vrai ape. Ambeni zo apensé so ti tene na molenge ti mo, mo tene “Mo peut ti sara aye kue so mo yeke na nzara ti sara ni” wala “Mo peut ti ga ye kue so mo ye ti ga ni,” a yeke encouragé lo. Me ti vrai ni, zo apeut ti sara aye kue so lo ye ti sara na yâ ti fini ti lo ape. Amolenge ti mo apeut ti réussir ti sara aye so ala ye ti sara, tongana aye ni alingbi na ngangu ti ala nga ala sara effort ndali ni.

• Gonda lo ndali ti ambilimbili ye so lo sara. Ti tene na molenge so aye kue so lo yeke sara ayeke ka gï pendere, a yeke aidé lo ape ti sara terê ti lo kete. Fa mbeni ye so lo sara, na gonda lo ndali ni.

• Fa angoi wa la lo peut ti gue na ndö ti internet. Mingi ni na ndö ti Internet azo aye ti fa so ala  yeke nzoni mingi, nga ala yeke fa akota ye so ala sara. So ayeke sarango terê kete la ape.

• Fa na lo ti yeda hio na afaute ti lo. Tongana lo sara mbeni faute, aidé lo ti hinga so a yeke faute la lo sara so nga ti yeda na ni.

Fa na lo ti tene merci.

MAMA-NDIA TI BIBLE: “Ala fa singila ti bê ti ala.”​—aColossien 3:15.

• Fa na lo ti bâ na nene ni aye so Nzapa acréé. Amolenge adoit ti bâ aye kue so Nzapa acréé na nene ni nga ti hinga ndani so e bezoin aye ni so ti ngbâ na fini. E bezoin pupu, ngu nga na kobe ti ngbâ na fini. Sara kua na atënë ni so ti fa na lo ti kiri merci na Nzapa nga ti bâ na nene ni apendere ye kue so Lo créé.

• Fa na lo ti gonda amba ti lo. Fa na molenge ti mo ti sara kota bê ape na terê ti amba ti lo tongana ala hinga ti sara mbeni ye ahon lo, nga fa na lo so lo peut ti manda ye na mbage ti ala.

• Fa na lo ti fa singila ti bê ti lo. Fa na molenge ti mo ti tene merci; fa na lo ti tene ni gï tongaso ape, me ti tene ye ni alondo na bê ti lo. Tongana e hinga ti tene merci, a yeke aidé e ti sara terê ti e lakue kete.

Fa na molenge ti mo so a yeke bien ti aidé amba ti lo.

MAMA-NDIA TI BIBLE: “Ala sara terê ti ala kete na ala bâ amba ti ala tongana azo so ayeke kota ahon ala; na ziango lê ti ala gï na ndö ti aye ti ala wani pëpe, me nga na ndö ti aye ti amba ti ala.”​—aPhilippien 2:3, 4.

• Fa na lo ti sara kua na yanga-da. Tongana mo fa na lo pëpe ti sara akua ti yanga-da, lo yeke bâ so aye so lo ye ti sara la ayeke kota ye ahon akua ti yanga-da ni. Lo doit ti sara akua ti yanga-da kozo si lo gue lo sara ngia. Fa na lo ndani so akua ni so ayeke sara nzoni na amba ti lo nga so tongana lo sara ni, azo ayeke ye lo nga ayeke ne lo.

• Fa na lo lakue so ti aidé amba ti lo ayeke nzoni. Tongana molenge ti mo asara ye ndali ti amba ti lo, a yeke aidé lo ti ga ande mbeni kpengba koli wala wali. Fa na lo ti hinga azo so abezoin aide. Sara lisoro na lo ti fa na lo ye so lo peut ti sara ndali ti azo ni. Tongana lo sara kua ndali ti amba ti lo, gonda lo nga aidé lo.