ධනවතා සහ ලාසරුස් කියන්නේ යේසුස් කියපු කතන්දරේක එන චරිත දෙකක්. (ලූක් 16:19-31) ඒ කතන්දරේ හැටියට ඒ දෙන්නාගෙන් කණ්ඩායම් දෙකක් නියෝජනය වුණා. (1) යේසුස්ගේ කාලේ හිටපු උඩඟු යුදෙව් ආගමික නායකයන්. (2) යේසුස්ගේ පණිවිඩයට ඇහුම්කන් දුන්න නිහතමානී, අවංක මිනිස්සු.

මේ ලිපියෙන්

•  ධනවතා සහ ලාසරුස් ගැන යේසුස් මොනවාද කිව්වේ?

•  ඒක ඇත්ත සිද්ධියක්ද?

•  මේ කතන්දරෙන් ඔප්පු වෙනවාද අපායක් කියලා ඇත්තටම තැනක් තියෙනවා කියලා?

•  කතන්දරේ ඇත්ත තේරුම මොකක්ද?

 මිනිස්සු දෙන්නෙක්ගේ ජීවිතවල සිද්ධ වුණ ලොකු වෙනසක් ගැන යේසුස් ලූක් 16වෙනි පරිච්ඡේදයේ විස්තර කරනවා.

 යේසුස් කියපු ඒ කතන්දරේ දැන් අපි කෙටියෙන් බලමු. සුඛෝපභෝගී ජීවිතයක් ගත කරපු ධනවත් මිනිහෙක් හිටියා. ලාසරුස් කියලා හිඟන්නෙක් නිතරම මේ ධනවතාගේ දොරටුව ළඟට ආවා. ධනවතාගේ මේසෙන් වැටෙන ඕනෙම දෙයක් කන්න බලාගෙනයි මේ හිඟන්නා හිටියේ. කාලයක් යද්දී හිඟන්නා, ඒ කියන්නේ ලාසරුස් මැරුණා. දේවදූතයෝ එයාව ආබ්‍රහම් ගාවට ගෙනිච්චා. ධනවතාත් මැරුණා. එයාවත් තැන්පත් කළා. කතන්දරේ හැටියට ඒ දෙන්නා මැරුණත් එයාලට සිහිය තියෙනවා. මැරුණ ධනවතා දැන් ඉන්නේ ගිනි ජාලාවක් මැද. එතන ඉඳන් ධනවතා ආබ්‍රහම්ට කියනවා එයාගේ දිව සිසිල් කරගන්න ලාසරුස්ගේ ඇඟිල්ලේ වතුර ටිකක් ගාලා එයා ගාවට එවන්න කියලා. ඒත් ආබ්‍රහම් ඒකට එකඟ වෙන්නේ නැහැ. ඒ වෙනුවට ආබ්‍රහම් කියනවා ධනවතාගෙයි, ලාසරුස්ගෙයි ජීවිතවල දැන් සම්පූර්ණ වෙනසක් වෙලයි තියෙන්නේ කියලා. අනික එකිනෙකා ගාවට ළං වෙන්න බැරි තරමට දෙන්නා අතර ලොකු පරතරයක් තියෙනවා කියලත් කියනවා.

 නැහැ. යේසුස් මේක පාඩමක් කියලා දෙන්න පාවිච්චි කරපු උපමාවක් විතරයි. බයිබල් විශාරදයනුත් ඒක පිළිගන්නවා. උදාහරණෙකට ලූතර්ගේ බයිබලයේ 1912 අනුවාදයේ උපමාතෘකාවක කියලා තියෙනවා මේක උපමාවක් කියලා. ඒ වගේම “මෙම කතන්දරය උපමාවක් පමණයි. බයිබලයේ කිසිම චරිතයකට මෙය යොමු දක්වන්නේ නැහැ” කියලා කතෝලික ‘ජෙරුසලම් බයිබලයේ’ පාදසටහනක කියලා තියෙනවා.

 යේසුස් මේ කියලා දෙන්න හදන්නේ මරණයෙන් පස්සේ ජීවිතය ගැන පාඩමක්ද? සමහර මිනිස්සු මැරුණාට පස්සේ අපායක පිච්චෙනවා කියලත් ආබ්‍රහම් සහ ලාසරුස් ස්වර්ගෙට ගියා කියලත් යේසුස් අදහස් කෙරුවාද? යේසුස් එහෙම දෙයක් අදහස් කළේ නැහැ කියලා පහළ තියෙන කරුණුවලින් ඔයාට තේරෙයි.

•   ධනවතා ඇත්තටම ඉන්නේ ගිනි ජාලාවක් මැද නම් ලාසරුස්ගේ ඇඟිල්ලේ ගාපු වතුර ටික ඒ ගින්නට වාෂ්ප නොවී තියෙයිද?

•   වතුර ටික වාෂ්ප වුණේ නැහැ කියමු. ඒත් ඒ වතුර ටිකෙන් පිච්චි පිච්චි ඉන්න ධනවතාට සහනයක් ලැබෙයිද?

•   යේසුස් පොළොවේ හිටපු කාලෙදී කිසිම කෙනෙක් ස්වර්ගයට ගිහිල්ලා තිබුණේ නැහැ. එහෙනම් ආබ්‍රහම් ස්වර්ගයේ ඉන්නේ කොහොමද?—යොහන් 3:13.

  නැහැ. ඒත් මේක කතන්දරයක් විතරයි කියලා සමහරු පිළිගත්තත් මේකෙන් නියෝජනය වෙන්නේ මැරුණ හොඳ මිනිස්සු ස්වර්ගයට යනවා, නරක මිනිස්සු අපායේ දුක් විඳිනවා කියන එකයි කියලා එයාලා තර්ක කරනවා. a

 ඒ නිගමනය සාධාරණද? නැහැ.

 කෙනෙක් මැරුණාම සිද්ධ වෙන දේ ගැන බයිබලයේ කියලා තියෙන දේයි අපාය නැත්නම් නිරාගින්න කියන ඉගැන්වීමයි අතර කිසිම ගැළපීමක් නැහැ. මැරෙන හැම හොඳ මිනිහෙක්ම ස්වර්ගයට ගිහින් සතුටින් ඉන්නවා කියලවත් මැරෙන නරක මිනිස්සු අපායක දුක් විඳිනවා කියලවත් බයිබලයේ කියන්නේ නැහැ. ඒ වෙනුවට ඒකේ කියන්නේ මෙහෙමයි. “ජීවත්ව සිටින අය තමන් කවදා හෝ මිය යන බව දනිති. නමුත් මිය ගිය අය කිසිවක් දන්නේ නැත.”—දේශනාකාරයා 9:5.

  මේ කතන්දරෙන් කියවෙන්නේ කණ්ඩායම් දෙකක් ගැන. ඒ දෙගොල්ලන්ගේ ජීවිතවල සිද්ධ වෙන්න යන ලොකු වෙනසක් ගැන.

 ධනවත් මිනිසාගෙන් පේන විදිහට නියෝජනය වුණේ තමන් ගැන මහා ඉහළින් හිතපු “මුදලට කෑදර” යුදෙව් ආගමික නායකයන්ව. (ලූක් 16:14) එයාලා යේසුස්ගේ පණිවුඩයට ඇහුම්කන් දුන්නත් ඒක පිළිගත්තේ නැහැ. සාමාන්‍ය මිනිස්සුන්ව සැලකුවෙත් කකුලට පෑගෙන දූවිලි ගානට.—යොහන් 7:49.

 ලාසරුස්ගෙන් නියෝජනය වුණේ යේසුස්ගේ පණිවිඩය පිළිගත්ත සාමාන්‍ය මිනිස්සුන්ව. ආගමික නායකයන් එයාලව තඹේකට මායිම් කළේ නැහැ.

 අන්තිමට වෙන්න යන දේ නිසා දෙගොල්ලන්ගෙම ජීවිතවල ලොකු වෙනසක් සිද්ධ වෙනවා.

•   යුදෙව් ආගමික නායකයන් හිතුවේ එයාලට දෙවියන්ගේ අනුමැතිය තියෙනවා කියලා. ඒත් එයාලා යේසුස්ව පිළිගත්තේ නැති නිසා දෙවියන් එයාලවත් එයාලගේ නමස්කාරයත් ප්‍රතික්ෂේප කළා. ඒ නිසා එයාලා හිටියේ දෙවියන් ඉස්සරහා මැරිලා වගේ. ඒ විතරක් නෙමෙයි යේසුස් සහ ඔහුගේ අනුගාමිකයන් දේශනා කරපු පණිවිඩය ඇහෙද්දී එයාලට දැනුණේ ගින්දරෙන් පිච්චෙනවා වගේ දරුණු වේදනාවක්.—මතෙව් 23:29, 30; ක්‍රියා 5:29-33.

•   සාමාන්‍ය මිනිස්සුන්ව ආගමික නායකයන් තුට්ටුවකටවත් මායිම් කෙරුවේ නැති වුණාට එයාලට දෙවියන්ගේ අනුමැතිය ලැබුණා. හුඟදෙනෙක් යේසුස් කියපු පණිවිඩය පිළිගත්ත නිසා ආශීර්වාද ලැබුවා. සදහටම දෙවියන්ගේ අනුමැතිය ඇතුව ඉන්න එයාලට අවස්ථාවත් දැන් ලැබිලා තියෙනවා.—යොහන් 17:3.