Xaa yannara, Yihowa Farciꞌraasine elektirooniksete uduunni widoonni ayyaanaamittete sagale albinni roore afidhanni no. Ikkollana, batinye gobbuwara heedhanno roduuwinkera Interneetete baaxxitanno woxi dinonsa. Wolootu roduuwinke heedhannohu kayinni, Interneete baꞌanni qarrissannowa, dunkitannowa woy horonta Interneete nookkiwaati.

 Ikkirono, xa batinyu roduuwinke Interneete nookkiha, elektirooniketenni qixxeessinoonni borronna viidiyo dirrisiꞌra dandiitanno. Kuni ikkinohu hiittoonniiti?

 Interneete qarrissanno qooxeessira noo songuwa kaaꞌlate, JW Boksi yinanni uduunnicho qixxeessinoonni. Konne uduunnicho mitte daddalu dirijjitewiinni hirroonni; qoleno Beeteelete nooti Kompiyuterete Kifile qixxeessitino sooftiweerenna jw.org aana fultino borronna viidiyo hogomboonni. Mittu uduunnichi waagi 75 Ameeriku doolaare balla ikkanno.

 Roduuwu Gambooshshu Addaraashe giddo silkensa woy taabileetensa JW Bokse ledo xaadisse borronna viidiyo dirrisidhanno. Keeshshinohu woy hakkeeshshi geeshsha waaga batiꞌrinokkihu elektirooniksete uduunnichi noonsa roduuwi nafa JW Bokse horoonsiꞌra dandiitanno. Ikkina songo Interneete afidhannokkiha ikkiro, JW Boksera haaro borronna viidiyo hogowa dandiinannihu hiittoonniiti? Sinu Biiro jw.org aana fulinoha haaro coye JW Boksera hogowate kaaꞌlitanno filaashe (USB) yannate kiiro songuwate sokkanno; mitte mittente filaashe waagi mite 4 Ameeriku doolaare ikkanno.

 JW Bokse roduuwinkera kaaꞌlitinohu hiittoonniiti? Kongo Dimokiraatiki Rippaabilikete heeꞌrannohu Naatani Andiruwaadira yinanni anni togo yiino: “‘Yihowa, Ate Addaxxoommo’ yaannohanna Looxi Galte Qaagge yaanno diraama dirrisiꞌrate lowo yanna woꞌnaalanni keeshshoommo. Ikkollana dirrisiꞌra didandoommo; hakko daafira hexxo mudhoommo. Xa kayinni tenne viidiyubba silkeꞌyara dirrisiꞌra dandoommo; tini oosonke dancha gede rosiisiꞌneemmo gede kaaꞌlitinonke.”

 Nayijeeriyaho songuwate JW Bokse biddi assa kaaꞌlanno rodii togo yiino: “Roduuwu JW Bokse Yihowa uyinonke eltooti yite heddanno. Xa Rosiisate Horoonsiꞌneemmo Borro giddo noo borronna viidiyubba dirrisiꞌra dandiitino daafira lowo geeshsha hagiidhitino.”

 Xaa geeshsha Afirikaho, Oshiiniyahonna Wodiidi Ameerikira heedhanno roduuwira 1,700 saꞌannota JW Bokse sonkoonni. Xaano wole batinye songuwara soyate qixxeessinanni heeꞌnoonni. Konne uduunnicho qixxeessate woxe afiꞌneemmohu mamiinniiti? Alamete doyicho loosira fushshinanni fushshonniiti; tenne fushsho giddo roore anga fushshinannihu donate.ps8318.com widoonniiti. Shaqqillunni fushshitinanni fushshora galanteemmoꞌne.