Batinyu manni, mannu ooso baattonna baattote aana noo kalaqama baasa gawajjitanni noota huwatino; konnira tini yaachishshannonsa. Mite qarqaru agarooshshi fullahaano yitanno gara ikkiro, mannu ooso mitu kalaqami sirchi togo ikke baꞌꞌate deerra iillanno gedenna kalaqamu togo ikke daafamanno gede assitinoti wole yanna dino.

 Ikkina mannu ooso baatto coꞌonta huntannonso kalaqamu ledo sumuu yite heedhakka?

 Batinyu egennaammi, mannu ooso baatto gawajjantannota agaranna kalaqamu ledo sumuu yite heeꞌra dandiitanno yite ammantanno. Mite xiinxallaano, mannu sharro qinaabbara hasiꞌniro duucha bayicho addi addi coye mitteenni biddi assa hasiissanno yitanno. Soorrine biddi assa hasiissanno coyibba giddo mitu:

•   Moola baatto, dubbo, leephonna wuqiyaanoose towaantanni gara woyyeessa.

•   Wole gibirinnu ogimma horoonsiꞌranna nadaaje wolu garinni afiꞌrate woꞌnaala.

•   Mannu maalanna qulxuꞌme batise sagaꞌla agure roore anga akaakilte itanno gede hattono mulla baꞌanno sagale ajjanno gede, sagale qixxeessinanninna tuqinsanni gara soorra.

•   Dancha heeshsho heeꞌnanni gede assitannoti maalaamittete coye duuꞌna ikkitinokkita ammana.

 Atera ma lawannohe? Mangistubba, daddalu uurrinshuwanna addi addi manni konni garinni sumuu yee konne qarra tirannoha lawannohenso, mitu manni hafuuraamo, umisira calla roorsiꞌrannohanna gaꞌata hedannokkiha ikkino daafira kuni ikkannokkireeti yaatto?—2 Ximootewoosi 3:1-5.

 Qullaawu Maxaafi baattonkera albillittete huluullammannikki hexxo noota kulanno. Qoleno mannu sharro calla baatto gatissannokkitanna addinta soorrama hasiissannosi coyi maatiro xawise kulano. Tenne assannohu ayetirono bade kulanno.

 Mannu sharro calla baatto gatissannokkihu mayiraati? Baatto kalaqinohu Magano Yihowaati; a isi ise towaatate looso mannu oosora uyino. (Kalaqama 1:28; 2:15) Insa uyinoonninsa looso danchu garinni loosa dandiitannohu biddishsha aannonsa gede Kalaqaanchonsa huuccidhurootinna isi wodho garinni heedhuro callaati. (Lawishsha 20:24) Insa kayinni Yihowa facci assite agurte isiweelo heeshsho heeꞌra doodhitino. (Rosiisaancho 7:29) Mannu ooso uminsanni baatto towaatanna agara didandiitanno; mitore woyyeessa dandiituro nafa hakkeyi geeshsha diqinaannonsa.—Lawishsha 21:30; Ermiyaasi 10:23.

 Soorrama hasiissannosi coye. Maganu mannu baatto hunannota hoolate hedino. (Yohaannisi Ajuuja 11:18) Isi baatto hunanni nooha uullate gashshootenna dagooma woyyeessannoha ikkikkinni hune wole abbanno. (Yohaannisi Ajuuja 21:1) Hakko daafira Yihowa, “Kune, ani baalanka coye haaro asseemmo” yiino.—Yohaannisi Ajuuja 21:5.

 Tini woyyimma dagganno gara. Yihowa mannu gashshoote baala hune insa bayicho Maganu Mangiste yinanniha gordu gashshoote abbanno. Hakkuyi gedensaanni baatto gashshannohu, Yesuusi Kiristoosi anga nooho konne gashshooteeti.—Daanieeli 2:44; Maatewoosi 6:10.

 Maganu Mangiste mannu keeraanchu Maganu seeri garinni heeꞌranno gede rosiissanno. Mannu Kalaqaanchonsa afironna wodhosi ayirrisannoha ikkiro, kalaqamu ledo sumuu yaanno garinni heeꞌranno. (Isayaasi 11:9) Qullaawu Maxaafi, Maganu Mangiste mannu baatto gawajjikkinni hagiirru woꞌmino heeshsho heeꞌranno gede assitanno gara kulanno. Maganu Mangiste . . .

•   Mannu baalunku sagale afiꞌranno gede assitano.—Faarso 72:16.

•   Kalaqamu wirro haarooꞌmanno gede assitanno.—Isayaasi 35:1, 2, 6, 7.

•   Mannu saada towaatanno gede, saadano manna gawajjitannokki gede assitanno.—Isayaasi 11:6-8; Hoosei 2:18.

•   Kalaqamu dano hooltanno.—Maarqoosi 4:37-41.

 Maganu Mangiste muli yannara tenne baala assitannota addaxxa dandaatto. Ledde afate, “Maganu Mangiste Uulla Gashshitannohu Mamarooti?” yaanno birxicho nabbawi.