Umo adhanna adhama xintinohu Magano Yihowaati. a Qullaawu Maxaafi Yihowa umita meya mancho kalaqe kae ‘manchunniwa abbinota’ kulanno. Addaami tennera lowo geeshsha hagiidhe togo yiino: “Kuni miqichi miqqaꞌyanni haaꞌnoonniho, maaluno maaliꞌyanni haaꞌnoonniho.” (Kalaqo 2:22, 23) Xaano ikkiro Yihowa adhamino manni hagiirraamma ikkara hasiꞌranno.

Adhantini yannara baalunkuri injaannonke yitine heddinoonniha ikkara dandaanno. Ikkollana, lubbora baxamanno minaanninna minaama mereero nafa qarru kalaqamasi digattanno. (1 Qorontoosi 7:28) Tenne birosherera nooha Qullaawu Maxaafiha xintu seera harunsitiniro maateꞌne hagiirru noota ikkitanno. b—Faarso 19:8-11.

QULLAAWU MAXAAFI MAYYAANNO? Minaanni maatete umoho.—Efesooni 5:23.

Minaanna, Yihowa minaamakki towaatattosera hasiꞌranno. (1 Pheexiroosi 3:7) Yihowa ise kalaqinohu aggaare ikkitaheraati; qoleno ayirrinyunninna baxillunni amadattosera hasiꞌranno. (Kalaqo 2:18) Minaamakki lowo geeshsha baxanna ise hasatto balaxisiisate maahoyye yaattoha ikka hasiissannohe.—Efesooni 5:25-29.

Minaama, Yihowa minaannakki lowo geeshsha ayirrisattaranna loosu qeechasi danchu garinni wonshanno gede kaaꞌlattasira hasiꞌranno. (1 Qorontoosi 11:3; Efesooni 5:33) Minaannikki muranno coyibba maahoyye yite adhi; hattono woꞌmu wodaninni ledosi kaaꞌlami. (Qolasiyaasi 3:18) Tenne assakki minaannikkinna Yihowa illera xuma ikkatta gede assitannohe.—1 Pheexiroosi 3:1-6.

MAA ASSA DANDIITINANNI?

• Dancha minaanna woy dancha minaama ikkate woyyeessiꞌra hasiissannoꞌne coye kuꞌu koꞌoye xaꞌme. Hakkiinni seekkitine macciishshe, hattono woyyeessiꞌra hasiissannoꞌnere woyyeessiꞌrate sharramme

• Cincaaleeyye ikke. Lamunkura mimmito hagiirsiissinanni gara rosate yanna hasiissannoꞌne

QULLAAWU MAXAAFI MAYYAANNO? Galteꞌne hasatto dea dihasiissannoꞌne. (Filiphisiyusi 2:3, 4) Yihowa soqqamaasinesi “manna baalaho [jooguulle]” ikkitara hasiꞌrannota qaaggine, galteꞌne muxxe ikkitino gede assitine laꞌe. (2 Ximootewosi 2:24) “Kaꞌni gede coyiꞌnanni coyi bisete gede madiissanno; hayyootu arrawi kayinni hursanno.” Konni daafira coyidhinanni coye seekkitine hedde. (Lawishsha 12:18) Yihowa ayyaani shaqqillunninna baxillunni coyidhinanni gede kaaꞌlannoꞌne.—Galaatiya 5:22, 23; Qolasiyaasi 4:6.

MAA ASSA DANDIITINANNI?

• Galteꞌne ledo jajjabba coyibba kayissine hasaabbinara albaanni, wodanaaꞌmitine macciishshitinanni gedenna kuꞌu kuꞌuyi hedo adhate maahoyye yitinara kaaꞌlannoꞌne gede Yihowa huuccidhe

• Coyidhinanni coyenna coyidhinanni gara seekkitine hedde

QULLAAWU MAXAAFI MAYYAANNO? Adhantini wote galteꞌne ledo “mitto maala” ikkitinoonni. (Maatewoosi 19:5) Ikkollana lame addi addi manna ikkitinoonni daafira babbaxxitino hedo heedhaꞌnera dandiitanno. Konni daafira hedoꞌne xaadisidhinanni gara rosa hasiissannoꞌne. (Filiphisiyusi 2:2) Mitto coye murtinanni wote mittimma lowo geeshsha hasiissannoꞌne. Qullaawu Maxaafi, “Amaale heedhuro somu qinaanno” yaanno. (Lawishsha 20:18) Mitto coye murtinanni yannara Qullaawu Maxaafiha xintu seera harunse.—Lawishsha 8:32, 33.

MAA ASSA DANDIITINANNI?

• Galteꞌnera hedoꞌne woy mittu coyira nooꞌne lao calla ikkikkinni godowiꞌneta fushshitine kulle

• Mitto coye assate wolu manchira qaale eꞌinara albaanni galteꞌne ledo amaalamme