XAꞌMO 1
Isi Ani Ayeti?
ATE IKKOOTTORO MA ASSATTO?
Hanni tenne ikkito hedi: Maassantu wedellu gamba yee boohaarannowa marte taxxi nafa yitukki, jaalase badheenni higge dagge togo yituse:
“Tee Maassantu kowiicho mayira uurrootta?”
Maassantu caaqqi yitanno wote, jaalase Asteeri lame xaalla fannoonni xarmuuse haadhe no. Laꞌanno wote xarmuussa biirunnite. Asteeri mitto biira Maassantura uyitanni togo yitu: “Biira ageemma geeshsha diꞌꞌikkoommalla yitootie!”
Maassantu ago aga dihasidhino; kayinni Asteeri jaalase ikkitinohura yitannori bainose. Maassantu jaalase gowwate yitasera dihasidhino. Qoleno, Maassantu danchaho yite heddanno seenni giddo mitte Asteeriiti. Hakko daafira ise aggu geeshsha, ago aga hakkeeshsha bunshe diafidhino yite heddu. Maassantu wodanisenni togo yitu: ‘Biira aga hakkeeshsha cubbo ikkitinoni? Maaho biiralla agi yitinoena, hashiishe adhi yitinoeni?’
Togoo coyi atera tuncu yiinoheha ikkoommero ma assatto?
WODANAAꞌMITE HEDI!
Togoo coyi tuncu yaannohe yannara gara ikkinore doodhate ayimmakki badde afa hasiissannohe. Ayimmakki afate yaa ati ayetiro, maa ammanattoronna harunsatto biddishsha huwatate yaate. Ayimmakki badde afakki, wolu manni baxi gede assahera wodha agurte, gara ikkinore ati umikki doodhatto gede jawaante uyitannohe.—1 Qorontoosi 9:26, 27.
Ikkina, togoo jawaante heedhannohe gede kaaꞌlannoheri maati? Hanni aante noote shoole xaꞌmuwara dawaro qolate woꞌnaali.
1 JAWAANTEꞌYA HIITTEETI?
Dandookkinna dancha akattakki badde afakki, saalfataamo ikkattokki gede kaaꞌlitannohe.
QULLAAWU MAXAAFI LAWISHSHA: Soqqamaasinchu Phaawuloosi togo yee borreessino: “Coyi hayyora fullahoommoha ikka hoogummoro nafa, egenno dixeꞌinoe.” (2 Qorontoosi 11:6) Phaawuloosi Qullaawa Borro seekke afino daafira, wolootu isi ledo hettisantu yannara kaajje uurrino. Insa isi daafira gara ikkinokkire coyidhu yannara, isi tini qara baꞌꞌanno gede assitasira diwodhino.—2 Qorontoosi 10:10; 11:5.
AYIMMAKKI LAI.
Woroonni noote fano basera hiitti ogimma woy dandoo noohero borreessi.
Tenne hanni hiikku danchu akati noohero borreessi. (Lawishshaho, manna mararattoho? Shaqqadoho? Ammanamoottoho? Dibarrisiꞌrattoho?)
2 LAANFEꞌYA HIITTEETI?
Kaajjado xarranni minnoonni mine nafa hoolo sunu sununni ittanni kartara dandiitannonte gede, noohe laanfera anga aattoha ikkiro ayimmakki soorranteenna busha mancho ikkattora dandaatto.
QULLAAWU MAXAAFI LAWISHSHA: Soqqamaasinchu Phaawuloosi laanfesi bade afino. Isi togo yee borreessino: “Giddoyidi mannimmaꞌya Maganu Seerinni hagiidhitanno. Ikkollana wodaniꞌya seeri ledo gaaramannohu, mannimmaꞌya widoonni cubbu seeri usuranya assannoehu wolu seeri mannimmaꞌya giddo noota afoommo.”—Roomu Sokka 7:22, 23.
AYIMMAKKI LAI.
Qeeꞌla hasiissannoheti hiitti laanfe noohe?
3 MIXOꞌYA MAATI?
Hanni makeena karaayyaoottohu gede assite hedi; makeena kadannohu makeenaho beenzile takki yite gooffa geeshsha haafa yee alenna woro doyara kulattoni? Hatto assa gowwimmate; qoleno haafa yine woxe huꞌnate!
Kuni lawishshi maa rosiisannohe? Mixo fushshiꞌrakki haafa heeshsho heeꞌrattokki gede kaaꞌlitannohe. Mixo fushshiꞌrittoro, iilla hasiꞌratto bayichonna hakko bayicho ma garinni iillattoro afootto yaate.
QULLAAWU MAXAAFI LAWISHSHA: Phaawuloosi togo yiino: “Hedo nookkihu gede ikke mulla haafa [yee] didodeemmo.” (1 Qorontoosi 9:26) Phaawuloosi tuncu yiisire calla assanni heeꞌra agure, mixo fushshiꞌre hatte mixosi wonshiꞌrate sharramino.—Filiphisiyusi Sokka 3:12-14.
AYIMMAKKI LAI.
Aantete, daanno diri geeshsha wonshiꞌra hasiꞌrattota sase mixo borreessi.
4 AMMANEEMMO COYI MAATI?
Ammanatto coye seekkite harunsate murciꞌrattoha ikkiro, wolqaataame bubbe dandiite uurritannote kaajjado rumudda afidhino haqqicho gede ikkatto
Ammanatto coye badde afa hoogittoro, mitto coye assate hobbi ruxxi yaattoha ikkatto. Hatto ikkiro, qooxeessisera noore lawate danase soorritanno hamasaama gede darawokki ikkituta ikkate woꞌnaalattoha ikkatto; tini umikki ayimma noohekkita leellishshanno.
Mitto coye assattohu ammanoottori ledo sumuu yaanno garinni ikkiro, wolu manni baxire assirono ati insa hoode dihaꞌratto.
QULLAAWU MAXAAFI LAWISHSHA: Masaalaanchu Daanieeli maatesiwiinni baxxinohu wedellichu heeꞌre ikkikki digatino; ikkollana, isi Maganu seera diigannokki gede ‘agadhino’ woy wodanisinni murciꞌrino. (Daanieeli 1:8) Konni garinni, isi ammananno coye seekke cuꞌmirino. Daanieeli ammananno coyi ledo sumuu yee heeꞌrino.
AYIMMAKKI LAI. Ammanatto coyi maati? Lawishshaho: Maganu no yite ammanatto? Hatto ikkiro, togo yite ammanattohu mayiraati? Maganu noota ammanatto gede assitinohe taje maati?
Maganunnihu amanyootu seeri kaaꞌlannoheta ammanatto? Hatto ikkiro, tenne ammanattohu mayiraati?
Ikkina, ati shiima diilallo ale woro qoltannohu tae uwino darchi gedenso, wolqaataame bubbe dandiite saꞌanno haqqicho gede ikka hasiꞌratto? Ayimmakki badde afittoro, hatte haqqicho gede ikkatto. Tini qolte, Isi Ani Ayeti? yitanno xaꞌmora dawaro afiꞌratto gede kaaꞌlitannohe.
Kurino Lai
WEDELLOOTU XAꞌMITANNO XAꞌMO
Ago Aga Soꞌrote?
Seeru garinni qorichinshanniheta, suꞌmikki baꞌꞌannota, seyantannihetanna agu araado gawajjitannoheta gargadhanna reyotenni gata dandaatto gara rosi.
