Mittu manchi Aneeti yinanni beetto heddukki amade uulla tugise. Ise togo yitino: “Iso gargadhe hooꞌlate woꞌnaalumma. Raarate woꞌnaaloommaha ikkirono, qoonqo fula gibbue. Hakkiinni iso hooꞌlate xiiwumma, kadumma, tuntuꞌmotenni ganumma, hattono bibbicumma. Hakko balla billawunni qasie. Hakkiinni mase shaqqumma.”

Atera hattoo coyi tuncu yiinoheha ikkoommero ma assatta?

Callichokki doogo haꞌratta wote bushu coyi iillannohekki gede qorophattaha ikkirono togoo coyi hedeweelcho iillahera dandaanno. Qullaawu Maxaafi togo yaanno: “Rakke doddannori woꞌma woyite diqolchitanno; . . . egennaammu duucha woyite diayirritanno. Ikkollana, woꞌmunkura yannanna kaayyo [“hendoonnikki ikkito,” NW] xaaddannonsa.”—Rosiisaancho 9:11.

Aneetira tuncu yiisente gede mito wedella affinokki manni seyatinonsa. Wole wedella kayinni egennino manni, wole agurina maatensa miili seyatinonsa. Naataale tonnu diriti heedheenna qachinsara heeꞌrannohu mittu wedellichi bushiishinose. Ise, “Lowo geeshsha waajjoommanna saalfatoomma daafira mittohono dikuloomma” yitino.

Aneeti xaa geeshsha seyantise warita kayisse heddanni iseneeto bushiishshanno. Ise togo yitino: “Hakko hashsha ikkinore horo dihaweemma. Hakkonne mancho gargadhe hooꞌlate hakkiinni roorse shelleggameemmati gattinoha lawannoe. Kayinni isi siwiilunni qasieta waajje quubbi yoomma. Hakko daafira mittoreno assa dandeemmakkiha ikkirono, asseemmari gatinohu gede asse hedeemma.”

Naataaleno iseneeto bushiishshanno. Ise togo yitino: “Quwa sae woloota togo ammaꞌnaꞌya digaraho. Anniꞌyanna amaꞌya, rodooꞌyanna ani gobba godoꞌlineemmo wote mimmitinkewiinni babbaxxineemmokki gede kulinonkeha ikkirono, ani kayinni tenne dimacciishshoomma. Konni daafira qachiꞌya beetti gawajjannoe gede assiꞌroommati aneeti yee hedeemma. Anera iillinoe coyi maateꞌya gawajjino; insa xissiisiꞌranno gede assoommati aneeti yee hedeemma. Roore xissiissannoeti tenneeti.”

Atino Aneetinna Naataale gede assite hedattaha ikkiro, giddeessine bushiinshoonnihehu ati baxxe wodhiteenna ikkinokkita qaagi. Mitu manni, labballu togoore assansa nooreentilla woy seyantise beetto baxxeenna ikkinoreeti yee hedanno daafira konne coye mulluri gede asse laꞌꞌanno. Kayinni mitte beettono giddeessine bushiisha dihasiissanno. Togoohu bushu coyi iillinoheha ikkiro, busha horonta ate diꞌꞌikkootta!

Hige “Busha ate diꞌꞌikkootta” yaanno qaale nabbawa shotate; tenne ammane adha kayinni shota diꞌꞌikkitino. Mitu wedelli iillinonsa coye maaxe aguranno daafira insaneeto bushiishanni, hattono xissiisiꞌranni heeꞌranno. Kayinni sammi yite agura atenso bushiishihe mancho kaaꞌlitanno? Iillinohere maaxxe agurantenni aane noore assakki kaaꞌlitannohe.

Qullaawu Maxaafi keeraanchu manchi Iyyoobi lowo qarri iillisi wote, “Heeshshoꞌya qaraartino gara leellisheemmo [woy, coyiꞌreemmo]” yiinota kulannonke. (Iyyoobi 10:1) Atino tenne assakki kaaꞌlitahera dandiitanno. Tuncu yiinohere ammaꞌnatta mannira hasaaphakki, hedokki qeeꞌlatta gedenna qulli yitanni qarrissannohe hedonni fooliishsho afiꞌratta gede kaaꞌlitannohe.

Aneeti tini halaale ikkitinota huwattino. Togo yitino: “Lubbora baxeemma jaalaꞌyara hasaaphumma; hakkiinni ise songote cimeeyyera hasaapheemma gede jawaachishshue. Ise kultinoere assoommahura tashshi yaannoe. Cimeeyye duucha higge hasaawissue; insa busha ane ikkoommakkita kulte hasiisse nooe kaaꞌlo kaaꞌlitinoe. Addaho, iillitinoe gawajjora busha ane diꞌꞌikkoomma.”

Naataale giddeessine bushiinshoonniseta yannate gedensaanni anniseranna amasera kultino. Ise togo yitino: “Insa lowo geeshsha kaaꞌlinoe. Qoleno ikkinore fushshe hasaaweemma gede jawaachishie; tini qolte quwa sae dadilleemmakkinna hunshuurameemmakki gede kaaꞌlitinoe.”

Naataale huuccatto assiꞌraseno sheshifattanno gede kaaꞌlitinose. Ise togo yitino: “Maganoho hasaaphaꞌya kaaꞌlitannoe; hakko iso mannaho hasaapha qarra ikkitue wote tini baasa kaaꞌlitinoe. Huuccatto assiꞌreemma wote, saalummakki coyiꞌra dandeemma. Tini qolte, giddiidi salaamenna harshammo uyitannoe.”

Atino “gatisate [“hurate,” NW] yanna no” yitannota Qullaawu Maxaafi hedo heeshshokkinni laꞌꞌa dandaatta. (Rosiisaancho 3:3) Ateneeto towaaxxi. Dancha gede fooliishshiꞌri. Baalunku coyinni roore, shesho aanno Magano Yihowa addaxxi.—2 Qorontoosi 1:3, 4.

Mine assiꞌrate iilloottahanna mittu beetti gara ikkinokkire assatta gede xixxiiwannoheha ikkiro, “Togoore assitooti!” woy “Angakki aaniꞌyanni hooli!” yite kaajjishshe coyiꞌra waajjitooti. Jaaliꞌya ane agure wolete higanno yite waajjitooti. Isi tennera koffi yee ate ledo aante aguriro, togoo beetti wonanni atera diseyannoho! Atera hasiisannohehu ateno ikko harunsatta seera ayirrisannoho gikki yiino beettooti.

“Mereerimu layinki dirimi rosaancho ikke noomma waro, labballu badheenni higge dagge xuuti-maajaꞌya goshooshshanni, saalfachishannore coyidhanno; lawishshaho insa ledo siimu xaadooshshe assummaro lowo geeshsha hagiidheemmata kultannoe.”—Koreeta.

Kuri labballi ma assanni nooha lawannohe?

1. Haariimanni no?

2. Isera mirganni no?

3. Seyatanni no?

“Otobisete giddo mittu beetti saalfachishannore coyiꞌrie; hakkiinnino shiqqi yee amadie. Tennera angasi aaniꞌyanni wixe hoole muliꞌyanni hoꞌlanno gede kulummasi. Isi wodana fayyoommakkite gede asse lainoe.”—Kaandisi.

Kuni beetti ise ma assanni nooha lawannohe?

1. Haariimanni no?

2. Isera mirganni no?

3. Seyatanni no?

“Sai diro mittu beetti ani hasiꞌreemmakkita marro marro hige kuloommasiha ikkirono, ane baxannoetanna jaalasi ikkammara hasiꞌrannota kulanni qarrisie. Mito wote isi angaꞌya amammadanni qarrisannoe. Hatto assa aguranno gede kuloommasiha ikkirono, isi kayinni diagurino. Mitto barra caamma usudhanni heeꞌreenna ofollaancho ganinoe.”—Betaani.

Ati kuni beetti ma assanni nooha lawannohe?

1. Haariimanni no?

2. Isera mirganni no?

3. Seyatanni no?

Sasente xaꞌmora C dawarote.

Seyata mirgatewiinni woy haariimatewiinni baxxitannohu hiittoonniiti?

Mittu manchi seyatannohu kuꞌu hasiꞌrikkinniiti. Agurie yiniro nafa seyatanno manchi agura hoogara dandaanno.

Seyata mulluri gede assine laꞌnannire diꞌꞌikkino. Togoo assooti giddeesse bushiishate geeshsha massara dandaanno.