Roozi “Surreˈya giddo bushare woy qarrisannore hedanni quwa sae yaadeemma” yite coyidhino. Ise kaaˈlitinoseti Qullaawu Maxaafi qummeeshshuwa hiikkuriiti? Kaaˈlitinose qummeeshshuwa giddo mitte Maatewoosi 6:34 te; qummeeshshu togo yaanno: “Gaˈa umisira yaadannona, gaˈara yaaddinoonte. Mittu mittunku barrira umisi qarri ikkannosi.” Yesuusi coyiˈrinori, Roozi gaˈa ikkannori daafira yaada agurtanno gede kaaˈlinose. Ise ledde togo yitino: “Xa yaachishannoehu lowo coyi heeˈreenna konni kaˈa ikkannorira yaadaˈya gara ikkitinokkita wodanchoomma; qoleno kuni coyi ikka hoogarano dandaanno.”

Yaasmiinino alba quwa saˈe yaaddannote. Ise togo yitino: “Yaaddote batinyinni hururame wiˈleemma barri no; mito hashsha isinni goxummakki galeemma. Gara ikkitinokki hedo heeshshoˈya baasa gawajjitanni noota huwatoomma.” Ikkina ise kaaˈlinose qummeeshshi hiikkonneeti? Ise 1 Pheexiroosi 5:7 kaaˈlitinoseta coyidhino; qummeeshshu, “Kiˈnera malannohu isootina qarrisannoˈnere baala [Maganu] aana tuqqe” yaanno. Yaasmiini togo yitino: “Hakkunni gedensaanni ganye Yihowa huucciˈrumma; Isino huuccattoˈya macciishshinoe. Qotiˈyanni ayirranno duhi hoˈlinoeha lawinoe. Mito wote gara ikkitinokki hedo dagganni qarrissannoeha ikkirono, xa kayinni togoo hedo hiitto asse qeela dandeemmaro afoomma.”

Izabeela yinanni beetto togo yitino: “Techo gaˈa yaate rosichi sirchunni ragiˈnannire lawannoe; korkaatuno anniˈya duucha wote mitto coye assate techo gaˈa yaanno. Boohaarate woy televizhiine laˈˈate yee roore loosa hasiissannoere agure haˈreemma. Togoo rosichi bushaho; korkaatuno loosu batiˈrannonkenna isilancho looso loonseemmokki gede assanno.” Izabeela 2 Ximootewoosi 2:15 aana noo amaale kaaˈlitinose; qummeeshshu togo yaanno: “Halaalu qaale taashshite coyiˈrattoha fokkisiisoottokki loosaasincho ikkite, atenee haaˈnannihe gedeeha assite Maganoho shiqishate jawaati.” Izabeella togo yitino: “Techo gaˈa yeemmata ikke looseemma loosinni Yihowa fokkisiisa dihasiˈreemma.” Ise xa konne rosicho qeeltino.

Kelsii yinannitino togo yitino: “Murroonni yannanni goofa hasiissannosi looso techo gaˈa yaanni jeefote saate geeshsha gudumakkinni keeshsheemma. Konninni kainohunni wiˈleemma, goxicho hoogeemma, hattono dadilleemma. Kuni busha rosichooti.” Kelsii Lawishsha 13:16 aana noo hedo kaaˈlitinose; qummeeshshu togo yaanno: “Egannaamu manchi looso hayyotenni loosanno; gowwu kayinni gowwimmasi leellishanno.” Ise konne qummeeshsha hiincitu gedensaanni togo yitino: “Pirogiraame fushshiˈranna hakko garinni loosa hayyote. Xa looseemmare pirogiraame fushshiˈre kurseˈya aana wodheemma; togo assaˈya pirogiraamete looseemma gedenna yanna gooffu gedensaanni kachaachameemmakki gede kaaˈlitinoe.”

Kiristeeni yinanni mancho “Minaanniˈya shoole qaaqquulleˈya anga hune mininni fule haˈrino” yite coyidhino. Ikkina ise kaaˈlitinoseti Qullaawu Maxaafi amaale hiittenneeti? Lawishsha 17:17 “Jaalu woˈmanka wote jaalaholla; roduuno qarru barra iillanno” yitanno. Kiristeeni isente gede Yihowara soqqamanno roduuwiwiinni kaaˈlo xaˈmidhino. Tini kaaˈlitinosehu hiittoonniiti? Kiristeeni togo yitino: “Jaallaˈya duucha doogganni kaaˈlitinoe. Mitootu addi addi sagalenna awawa waalchiˈyara abbite wortanno. Sase hige mine soorrirumma wote boodu roduuwi anenna oosoˈya kaaˈlinoe. Mittu manchi looso afiˈreemma gede kaaˈlinoe. Jaallaˈya woˈmanka wote dodde iillitannoe.”

Sai birxichira qummi assinite Soofiyarano callimma macciishshantinose. Ise noosere baala hooggu yanna qaagge togo yitino: “Wolu manni hagiirraame heeshsho heeˈranna ani kayinni xeertote uurre insa laˈˈa aguranna asse afeemmari nookkiha lawannoe. Hatte yannara callimma macciishshantinoe.” “Maganu callattinorira mine aannonsa” yaannohu Faarso 68:6 aana noo qummeeshshi Soofiya baasa kaaˈlinose. Soofiya togo yitino: “Kuni qummeeshshi kulannohu xaa yannara heeˈneemmo mine afiˈrate daafira calla diˈˈikkino. Hatteentenni, Maganu ayyaanaamittete mine aannoeta yaano, Iso baxxannori ledo jaalooˈmanna insawa aana dandeemma gede kaaˈlannoeta huwatoomma. Ikkollana balaxe Yihowawa shiqa hoogummaro wolootunniwa shiqa dandeemmakkita afoomma. Konnira Faarso 37:4 kaaˈlitinoe; qummeeshshu ‘Kaaliiqinni tashshi yoohe; isino wodanikki halcho wonshannohe’” yaanno.

Ise ledde togo yitino: “Baalunku coyinni roorse Yihowawa shiqa hasiissannoeta buuxoomma. Isi baalunkunni roore Jaalaati. Yihowa baxxannoriwa aana dandeemma gede insa ledo mitteenni loosa dandeemmare borreesse amaxxoomma. Qoleno roduuwaho noonsahu danchu akati aana illachishanna insa soˈro lashshi asse saˈˈa rosoomma.”

Magano magansidhanno jaallankerano guuntete xeˈne noonsati egennantinote. Yihowa Farciˈraasinera wolu manninte gede qarru iillannonsa. Ikkollana Qullaawu Maxaafi dandiineemmoha ikkiro woloota kaaˈlineemmo gede jawaachishannonke. Qullaawu Maxaafi amaale harunsanno manni ledo jaalooˈma hayyote. Ikkollana xaa yannara tira dandiinannikki qarri iillankera dandaanno; lawishshaho darga assiˈrino dhibbi waadannonkeha woy shiiˈnoommoha ikkara dandaanno; tenne yannara Qullaawu Maxaafi amaale kaaˈlitannonkehu hiittoonniiti?