Qullaawu Maxaafi xaggate daafira kulanno maxaafa ikka hoogirono, kaaꞌlitannota kaajja amaale kulanno. Tini amaale surrete xisso waaddannosi mancho kaaꞌlitara dandiitanno. Hanni mito lawishsha laꞌno.

“Dhiwantinorira ikkinnina fayyaaleeyyete xagisaanchu dihasiisannonsa.”—MAATEWOOSI 9:12.

Qullaawu Maxaafi xagisiꞌra hasiissannonke woyiti noota kulanno. Batinyu manni amadinonsahu surrete dhibbi daafira gara ikkitino mashalaqqe afiꞌransanna akime amaaꞌlansa wodaninsa harshammi yaanno gede assitinonsa.

‘Manninate kaajjishiꞌrate rosi kaaꞌlanno.’—1 XIMOOTEWOOSI 4:8.

Yanna gaaꞌmite fayyimmate kaaꞌlanno coye assakki amadinohehu surrete dhibbinni beedho afiꞌratto gede kaaꞌlitahera dandiitanno. Lawishshaho, ganyite ispoorte loosa, fayyimmate kaaꞌlitanno sagale ita hattono dancha goxicho afiꞌra lowore kaaꞌlitannohe.

“Hagiirraamu wodani mannimmate fayyimma aanno; dadillaamu wodani kayinni mannimma maniissanno.”—LAWISHSHA 17:22.

Jawaachishshannota Qullaawu Maxaafi qummeeshshuwa nabbawa hattono wonshiꞌra dandaatto mixo fushshiꞌra hagiirraamo ikkatto gede kaaꞌlitannohe.  Dancha danchare hedattohanna albillitte coyi woyyaawannota ammanattoha ikkiro amadinohe qarra dandiite saꞌꞌa dandaatto.

“Umo heeshshi assa [woy, dhukanke afa] egennote.”—LAWISHSHA 11:2.

Assa hasiꞌroottore baalankare umikki assa wolqakkira aleenni ikkitahera dandiitanno; hakko daafira wolootu kaaꞌlo gibbooti. Jaallakkinna maatekki kaaꞌlitahera hasidhannoha ikkara dandaanno; kayinni insa ma garinni kaaꞌlitannohero afa hooggara dandiitanno. Hakko daafira, roorenkanni ma assine kaaꞌlinihero woyyannoro kulinsa. Wolqansara aleenni ikkinore assitahera agadhitooti; qoleno insa kaaꞌlitinohe daafira woꞌmanka woyite galatinsa.

“Dasso giwinoe daafira akimete minira haꞌrumma. Akimitteno amadinoe dhibba affu. Tini xissoꞌya maatiro bade afeemma gedenna fayyimmaꞌya towaaxxate maa maa assa dandeemmaro afeemma gede kaaꞌlitinoe.”—Bayipoolaari diisorderi yinannihu surrete dhibbi waadannoseti Nikooli. a

“Minaamaꞌya ledo ganye soodo soodo Qullaawa Maxaafa nabbawa, mitto mittonka barra dancha dancharenna jawaachishannore hedeemmo gede kaaꞌlitinoe. Qoleno yaaddo quwa saꞌannoe barra jawaachishannoe qummeeshsha dihoogeemmo.”—Quwa saꞌino yaaddo waaddannosihu Piter.

“Lowo geeshsha saaloomma daafira wolootaho dhibbiꞌya daafira kuꞌla qarra ikkitinoe. Ikkollana mitte muli jaalaꞌya hasaaphanna seekkite macciishshitinoe; hattono ise shaqqillunni qarraꞌya huwatate woꞌnaaltino. Ise beedho afiꞌreemma gedenna callicho ikkoommakkita huwateemma gede kaaꞌlitinoe.”—Sagale jilbunni ita qarra ikkitinoseti Jeyu.

“Qullaawu Maxaafi loosoho quwa saeemmokki gedenna dancha gede fooliishshiꞌreemmo gede kaaꞌlinoe. Qoleno aanno amaale waaddannoe xisso dandee heeꞌreemmo gede kaaꞌlitinoe.”—Obseesiivi compalsiivi diisorder yinannihu surrete dhibbi waadannosihu Timooti.