ATE woy maatekki miila buutote dhibbi amadinoha ikkiro, tini mageeshshi geeshsha yaachishshannoro huwata dandaatto. Dhibbano agurranna yaaddonna dadillu amadaꞌnera dandaanno. Lawishshaho, akimete minira hodha, xagga hidhinanni woxe woy xagicho hooga woy xagichu umisi abbanno qarri yaaddonna shetto ledara dandaanno. Buutote dhibbinni kainohunni dagganno yaaddo wolqankera aleenni ikkitara dandiitanno.

Ikkina kaaꞌlo afiꞌra dandiineemmohu hiikkiinniiti? Batinyu manni Magano huucciꞌransanna sheshifachishshannota Qullaawu Maxaafi hedo nabbawansa lowo geeshsha jawaachishshinonsa.  Maatekkinna jaallakki baxillinna insa uyitannohe kaaꞌlono jawaante ikkitahera dandiitanno.

Rooberti yinannihu 58 diro ikkannosi manchi togo yee amaalino: “Magano addaxxite dhibbikki ledo sharrami; isi dhibbakki dandiite heeꞌratto gede kaaꞌlannohe. Yihowa huucciꞌri. Giddokkita isira hasaaphi. Qullaawa ayyaana aannohe gede huucciꞌri. Sheshifatte maatekki jawaachisha dandaatto gedenna wodanaaꞌmatto gede kaaꞌlahera huucciꞌri.

“Maatete kaaꞌlono loworeeti. Barru barrunku mittu woy lamu manchi silke bilbile woyyimma xaꞌmannoe. Addi addi bayicho heedhanno jaallaꞌyano jawaachishshannoe. Insa jawaachishshannoe woyite beya afiꞌreemmo; tini hexxo mudheemmokki gede kaaꞌlitinoe.”

Dhiwamino jaalakki laꞌꞌattora haꞌratto woyite Linda yitinori kaaꞌlahera dandaanno: “Dhiwamino manchi dandaamisi deerrinni fayyu manchi gede ikke heeꞌra hasiꞌranno daafira, woꞌmante yannara dhibbisi daafira hasaawa baxa hoogara dandaanno. Hakko daafira, wole yannarano hasaawattoha rosamino coye hasaawate woꞌnaali.”

Buutote dhibbi waadanni noonkeha ikkiro nafa, heeshshonke waaga afidhinota huwante qarranke cincine heeꞌra dandiineemmo; korkaatuno Maganu aannonke jawaantenna Qullaawu Maxaafinni afiꞌneemmo shesho, hattono baxillaano maatenke miillanna jaallanke kaaꞌlitannonke kaaꞌlo wolqa ikkitannonke.