ATERANO kalaqamu dano iillitinoheha ikkiro, konni manni qarri leellahera dandaanno; togoo dano mansanninna ragu baꞌꞌanno gede, hattono yaandanninna bararraanqanni gede assitara dandiitanno. Batinyu kalaqamu dano iillitinonsa manni hexxo mudhanno daafira, dhaabbatate dhuka hooganno.

Kalaqamu danonni nooheri baaluri bainoha ikkiro, aterano ragu tunsinoheha ikkara dandaanno. Isinni ‘Heeꞌraꞌya mayi waaga afidhino?’ yite hedattoha ikkara dandaanno. Ikkollana Maganu Qaali heeshshokki waaga afidhinota hattono albillitte woyyitino yanna daggannota kulanno.

Rosiisaancho 7:8, “Baalunkurira hanafotenni gumulo woyyate” yitanno. Kalaqamu dano iillitannohe woyite, umi qara ragu baalu tunsahera dandaanno. Ikkollana cincite albi heeshshokkiwa higate sharramattoha ikkiro, coyi woyyaawara dandaanno.

Qullaawu Maxaafi “wiꞌlanna raare [heedhannokki]” yanna daggannota kulanno. (Isayaasi 65:19) Maganu Gashshooti uulla gannate assanno woyite tini masaalo woꞌmitanno. (Faarso 37:11, 29) Hatte yannara kalaqamu dano diheedhanno. Kalaqamu dano abbitino xissonna gawajjo baala hegerera baꞌanno; korkaatuno Woꞌmanka Dandaanno Magani, “Sainore baala hambanni; horonta diqaanganni” yee qaale eino.—Isayaasi 65:17.

Hanni konne coye hedi: Kalaqaanchu albillitte woyyitino heeshshonna “hexxo” aahera qaale eino; isi guutu gashshootisi hunda keerunni heeꞌratto gede assannohe. (Ermiyaasi 29:11) Ikkina tenne afakki, heeshshokki waaga afidhinota huwatatto gede kaaꞌlitahera dandiitanno? Umi birxichira kulliti Salii togo yitino: “Albillitte Maganu Mangiste abbitannonke atoote baala hedanke, iillinonke qarri aana ikkikkinni albillittete heeshsho aana illachinsheemmo gede kaaꞌlitannonke.”

Maganu Mangiste muli yannara mannu oosora abbitanno atootire ledde rosattora koyinsoommohe. Hatto assakki, xa kalaqamu dano gawajjitinoheha ikkirono, heeshshokki xaano waaga afidhinotanna dano heedhannokki yanna daggannota roore addaxxatto gede kaaꞌlitannohe. Qullaawu Maxaafi, kalaqamu dano abbitanno qarra xa nafa cincite heeꞌratto gede kaaꞌlitannohe amaale aannohe. Hanni mito lawishsha laꞌno.