Songo Baxille Leellishshinonsa
YOMAARA, Marseelonna Hiiveri yinanni roduuwise ledo Guwatimaalaho shiimu qachira heedhanno. Yomaara Yihowa Farciꞌraasine ledo Qullaawa Maxaafa xiinxalla hanaffu; gedensoonni roduuwiseno xiinxallo hanaffino. Kayinni insara qarra ikkannori noonsa. Sasunku roduuwi ballootaho hattono bireele nabbawa didandaanno. Hakko daafira, Qullaawa Maxaafa xiinxallisannonsa rodii xiinxallitanno borronna hakko giddo qummi assinoonni qummeeshshuwa nabbawannonsa.
Insara qarra ikkinonsahu wolu coyi songote gambooshshe haꞌrate. Insa multannonsati Gambooshshu Addaraashe noowa iillate 40 daqiiqa haꞌra hasiissannonsa; qoleno calluwinsa hadhe diaffanno. Kayinni songote roduuwi insa baalanka gambooshshe hadhanno gede qixxaawo assitinonsa. Qoleno Kiristaanu Heeshshonna Soqqansho gambooshshiwa kifilla shiqisha hanaffuta, shiqishshanno kifile hedonsanni amada dandiitanno gede roduuwu higge higge kultannonsa.
Onkoleessa 2019nni insa heedhanno qooxeessira songote gambooshshe assa hananfi. Hatte yannara woꞌma yanna suwisaano ikke soqqamanno minaanninna minaama hakkiira haꞌri. Kuri minaanninna minaama insa uminsa bireele nabbawanna borreessa dandaannokkiha ikkiro nafa, Yomaaranna roduuwise bireele nabbawanna borreessa dandaanno gede rosiisate murciꞌre kai. Hakko daafira insa bireele rosatenna woloota rosiinsanni gara afate maxaaffate minira haꞌri.
Marseelo songote gambooshshiwa dawaro qolanni no.
Boodu agani gedensaanni Yomaaranna roduuwise bireele seekke nabbawa dandiino; tini qolte ayyaanaamittetenni roore lophanno gede kaaꞌlitinonsa. a Xa Yomaara, Marseelonna Hiiveri woꞌma yanna suwisaano ikke soqqamanni no. Marseelo songote soqqamaancho ikkino. Insa lamala woꞌma Yihowara diinaggaabbe soqqantanno. Wolootahono dancha lawishsha ikkitino.
Yomaaranna roduuwise songo baxillunni kaaꞌlitinonsata lowo geeshsha naadanno. Yomaara togo yitino: “Yihowa Farciꞌraasine umo insa ledo xaandummo yannanni hanaffe addunniha Kiristaanu baxille leellishshinonke.” Marseelo qole togo yiino: “Songonke giddo dancha jaalla noonke; qoleno ninke mimmito baxannohu alamete doyichohu roduuwu maamari widooti.” Yomaaranna roduuwise uulla gannate ikkitanno yanna quqquxame agadhanno.—Far. 37:10, 11; Isa. 35:5.
a Bireele Nabbawa Rosse (Ingilizete Afoo) yitanno biroshere qixxeessinoonnihu ballootu woy xunsite laꞌꞌa dandiitannokkiri bireele nabbawanna borreessa dandiitanno gede kaaꞌlateeti.
