LAMALKI sanira K.A Asooru alamenniha jawa gashshoote ikkino; Biritaaniyunniti Donu Minire kultanno webisayite Asooru gashshooti daafira togo yitino: “Galchimi widoonni Qophiroosinni kayise soojjaati widoonni Iraanete geeshsha halaˈlino; mite yannara isinni Gibitsete geeshsha iillino.” Hatte yannara Asoorunnihu qaru katami Nennewe alamete aana jawa katamaati. Konni katamira dhagge ikkitannoti jajjabba hawultuwa, maalaˈlissannoti kaashshu base, biifadda mootete minnanna halaˈlado maxaaffate minna no. Hundihu Nennewe katamira anfoonniti girgiddu aana borreessinoonni borro, wole Asooru mootoollante gede Moote Ashurbanipaalino isonooto “alamete moote” ikkinohu gede asse laˈˈannota leellishshanno. Hatte yannara Asoorunna Nennewe ayino qeelannokkire labbanno.

Ikkollana, Asooru wolqaataamo ikke noo yannara Yihowa masaalaanchi Sofooniyaasi togo yee masaalino: “[Yihowa] Asoorino hunanno; Nennewe katamano wayi nookkiha moolanna diigamino katami gede mullicho darga assanno.” Qoleno Yihowa masaalaanchi Naahomino togo yee masaalino: “Birranna culka saantine adhe. Nennewe Katami coˈo yee bai; diigame ona ikke gati. . . . Laˈˈannohehu baalunku shagaggiˈre atewiinni shawwu yee, ‘Kuneeti Nennewe diigame mulla darga ikkino’ yaanno.” (Sof. 2:13; Nah. 2:9, 10; 3:7) Tenne masaalo macciishshino manni togo yee hedinoha ikkara dandaanno: ‘Kuni ikkara dandaannoreeti? Wolqaataamo Asooru gashshoote qeela dandaannohu nooni?’ Hatte yannara kuni ikkannokkire lawannoreeti.

Ikkirono Asooru gashshooti qeelamino! Lamalki sani jeefora K.A Baabiloonootunna Medoonootu Asooru gashshoote qeeltino. Jeefote Nennewe katami diigame mulla darga ikkino hattono hawamino! Ze Metiropolitaani Muuzeemi ovi Arti yinanni borro togo yitino: “Lowo diri gedensaanni Nennewe katami diigame mulla darga ikkino hattono waamamino; mannu Nennewe katama qaagannohu Qullaawa Maxaafa nabbawanno woyite callaati.” Biibilikaali Arkiyolojiyi Soosayiti Onlayini Arkaayive togo yitino: “Asoorunnihu qaru katami heeˈrinoha ikkasinna teˈee afinohu dino.” Ikkollana 1845, Arkiyolojete egennaami Awusten Heneri Layardi alba Nennewe katami noowa uma hanafino. Umme fushshinoonniri alba Nennewe hoola yinoonni katama ikkitinota leellishanno.

Nennewete daafira kultanno masaalo mitteno gattukkinni woˈmase, Qullaawu Maxaafi xaa yannara noohu poletiku gashshootino baˈˈannota masaalino masaalono woˈmitannota albinni roore ammanneemmo gede assitannonke.—Dan. 2:44; Aju. 19:15, 19-21.