1. Dano kalaqantanno woyitira qixxaawa hayyote yineemmohu mayiraati?

 QIXXAAWA heeshsho gatissanno. Lawishshaho dano kalaqantanno woyitira qixxaawino manni roore woyite heeshshonsa gatisiꞌranno; hattono woloota kaaꞌla dandaanno. Awuroppaho heedhannoti mitte manna kaaꞌlitanno dirijjite, “Dancha gede qixxaawa heeshsho gatissara dandiitanno” yitino.

2. Bayiru qarrira qixxaawa hasiissannonkehu mayiraati? (Maatewoosi 24:44)

² “Lowo qarri” woy bayiru qarri hedeweelcho hanafanno. (Mat. 24:21) Ikkirono wole dano gede bayiru qarri baalanka manna hedeweelcho diamadanno. Yesuusi mitu 2,000 diri albaanni harunsaanosi konni barrira qixxaabbanno gede qorowisiisinonsa. (Maatewoosi 24:44 nabbawi.) Qixxaambeemmoha ikkiro, hattenne qarru yannara cincine saꞌꞌanna wolootuno cincite saꞌanno gede kaaꞌla dandiineemmo.—Luq. 21:36.

3. Cinca, mararronna baxillu bayiru qarrira qixxaambe heeꞌneemmo gede kaaꞌlannonkehu hiittoonniiti?

³ Hanni bayiru qarrira qixxaambe heeꞌneemmo gede kaaꞌlitannonketa sase akatta laꞌno. Kaajjado yoote sokka dudumbeemmo gede kullinkeronna mannu giwinkero ma assineemmo? (Aju. 16:21) Yihowa agarannonketa addaxxine isira hajajamate cincineemmore ikka hasiissannonke. Ammanate roduuwinke noonsaha maalaamittete coye gama woy baalanka hoogguro ma assineemmo? (Imb. 3:17, 18) Insara hasiisannonsare assine kaaꞌlate mararreemmore ikka hasiissannonke. Buusantino daga Maganu manna siꞌanno woyite, mite yanna geeshsha batinyu ammanate roduuwinke ledo mitteenni heeꞌra hasiissunkero ma assineemmo? (Hiz. 38:10-12) Insa godowinta baxa hattenne qarrissanno yanna dandiine saꞌneemmo gede kaaꞌlitannonke.

4. Qullaawu Maxaafi woꞌmanka woyite cincineemmore, mararreemmorenna baxillu noonkere ikkineemmo gede kulannonkehu hiittoonniiti?

 ⁴ Maganu Qaali cinca, mararronna baxillu heeꞌrannonke gede assiꞌnammora jawaachishannonke. Luqaasi 21:19 “Cincitiniro, lubboꞌne gatisidhinanni” yitanno. Qolasiyaasi Sokka 3:12 “Mararro . . . uddidhe” yitanno. Qoleno 1 Teselonqe 4:9, 10 togo yitanno: “Mimmitu ledo baxama kiꞌnenni Maganuwiinni rossinoonni. . . . Ikkollana xaano hakkiinni roorsitine baxxinanni gede huucciꞌneemmoꞌne.” Kuri qummeeshshuwara noo hedo baala borreessinoonnihu wonanni cinca, mararronna baxille leellishshanni noo rosaanoraati. Ikkirono insa woꞌmanka woyite kuri akatta lossiꞌra hasiissinonsa. Ninkeno hatto assa hasiissannonke. Tennera kaaꞌlitannonke gede, hanni hunda heeꞌrino Kiristaani kuri mitto mittonka akata leellishinohu hiittoonniitiro laꞌno. Hakkiinni insa lawishsha harunsineemmo garanna tini bayiru qarrira qixxaambeemmo gede kaaꞌlitannonkehu hiittoonniitiro laꞌneemmo.

5. Hunda heeꞌrino Kiristaani iillinonsa fonqolo dandee sainohu hiittoonniiti?

⁵ Hunda heeꞌrino Kiristaani cinca hasiissinonsa. (Ibi. 10:36) Insara manna baalaho iillanno qarri iillinonsatano agurranna wolu qarrino iillinonsa. Insa giddo batinye, Yihudunniti ammaꞌnote massagaanonna Roomu gashshaano calla ikkikkinni maatensano darantanno gede assitinonsa. (Mat. 10:21) Qoleno mito woyite songote giddo noo kaadasinenna insa rosiissannohu shokkashshu rosi hunannonsakki gede sharrama hasiissinonsa. (Soq. 20:29, 30) Ikkirono kuni Kiristaani iillinonsa qarra dandee saino. (Aju. 2:3) Hiittoonni? Insa Qullaawa Borro giddo kulloonnihu cincate dancha lawishsha ikkanno manni xagge lawishshaho Iyyoobi daafira hiincitino. (Yai. 5:10, 11) Qoleno jawaante afiꞌrate huuccatto assidhino. (Soq. 4:29-31) Hattono cincituro afidhannoha dancha guma illachishshino.—Soq. 5:41.

6. Meerita maatese gibbuse yannara cincite saꞌꞌate assitinorinni maa rosootto?

⁶ Ninkeno ganyine Qullaawu Maxaafinna borruwanke giddo kulloonnihu, cincate dancha lawishsha ikkanno manni xagge xiinxallineemmohanna hiincineemmoha ikkiro iillannonke qarra cincine saꞌꞌa dandiineemmo. Albaaniyaho heedhannoti Meerita yinanni rodoo togo assase maatese effidhe gibbuse yannara cincite saꞌanno gede kaaꞌlitinose. Ise togo yitino: “Qullaawu Maxaafi giddo nooti Iyyoobi xagge lowo geeshsha jawaachishshinoe. Iyyoobira buutote qarri iillinosi; isi qarra abbinosihu ayetiro afinokkiha ikkirono, ‘Reyammo geeshsha keeraanchimmaꞌya diagureemmo’ yiino. (Iyo. 27:5) Iyyoobira iillinosi qarra hendiro anera iillinoe qarri shiima ikkinota wodanchoomma. Iyyoobi qarru iillannosi gede assinohu ayetiro diafino; ani kayinni iillanni nooe qarrira kaimu ayetiro afoomma.”

7. Xaa yannara buutote qarri iillanni noonkekkiha ikkiro nafa, xaanni maa assa rosa hasiissannonke?

⁷ Ganyine Yihowa huucciꞌnenna giddonketa baala isira hasaaphine albinni roore cincineemmore ikka dandiineemmo. (Fil. 4:6; 1 Tes. 5:17) Xaa yannara buutote qarri iillinohekkiha ikkara dandaanno. Ikkirono hanqisannorinna gurchaawatto gede assannori tuncu yaannohe woyite woy kadde amadattori baꞌꞌannohe woyite Yihowa huucciꞌratto? Barru barrunkunni iillannohe coyira Yihowa huucciꞌrattoha ikkiro, albillitte lowo qarri iillannohe woyiteno hatto assa qarra diꞌꞌikkitannohe. Hatto ikkiro isi ate mamootenna hiittoonni kaaꞌlannohero afinota addaxxa dandaatto.—Far. 27:1, 3.

8. Miira lawishshi xaa yannara iillannonke qarra dandiine saꞌꞌa albillitte iillannonke qarrira kaaꞌlitannonketa leellishannohu hiittoonniiti? (Yaiqoobi 1:2-4) (Misileno lai.)

⁸ Xaa yannara iillannonke qarra cincine saꞌneemmoha ikkiro, albillitte bayiru qarri  yannara cincine saꞌꞌa qarra diꞌꞌikkitannonke. (Rom. 5:3) Hatto yineemmohu mayiraati? Batinyu ammanate roduuwinke ammanansanni kainohunni iillannonsaha mitto mittonka qarra dandiite saꞌꞌansa, hakkiinni aane iillannonsa qarrira kaaꞌlitinonsata huwattino. Iillannonsa qarra cincite saꞌꞌansa Yihowa insa kaaꞌla hasiꞌrannota albinni roore ammantanno gede kaaꞌlitinonsa. Ammana qolte hakkiinni aane iillannonsa fonqolo dandiite saꞌanno gede kaaꞌlitinonsa. (Yaiqoobi 1:2-4 nabbawi.) Albaaniyaaho heedhannoti Miira yinanni suwisaancho alba iillinose qarra cincite saꞌꞌase xa iillinose qarrano cincite saꞌꞌate kaaꞌlitinoseta huwattino. Ise mito woyite, lowo qarri iillannoseti ise calla ikkitinohu gede assite heddannota maaxxukkinni coyidhino. Ikkirono 20 diri giddo Yihowa ise kaaꞌlate assinore qaagguti iseneetira togo yitino: ‘Ammanante heeꞌri! Yihowa lowo diro iillinohe qarra dandiite saꞌꞌatta gede kaaꞌlihehu gedensaanni xa isira soqqama agurtooti.’ Atino Yihowa iillinohe qarra dandiite saꞌꞌatto gede kaaꞌlinohe gara hiinca dandaatto. Isi iillannoheha mitto mittonka qarra dandiite saꞌꞌattota laꞌꞌannotanna baꞌraasannoheta addaxxa dandaatto. (Mat. 5:10-12) Hakkiinni bayiru qarri hanafanno woyite cinca dandiinanni gara rosatto; hattono albillitte cincite heeꞌrate murciꞌratto.

9. Sooriyu Antsookira heedhanno Kiristaani marartannore ikkansa leellishshinohu hiittoonniiti?

⁹ Hanni Yihudaho heeꞌranno Kiristaana buutote hude amaddu yannara mayi ikkinoro laꞌno. Sooriyu Antsookira heedhanno songo tenne hude daafira macciishshituhu gedensaanni, Yihudaho heedhannore ammanate roduuwansa lowo geeshsha marartino. Hakko daafira insa ammanate roduuwansa kaaꞌlate mitore assitino. Insa, “Yihudaho heedhanno roduuwira noonsa wolqanni woxe fushshite [sokkino].” (Soq. 11:27-30) Hude gawajjitino roduuwi xeertiꞌre nooha ikkirono, Antsookiyaho heeꞌranno Kiristaani insa kaaꞌlate murciꞌrino.—1 Yoh. 3:17, 18.

10. Ammanate roduuwinkera dano iillitannonsa woyite insa mararreemmota leellisha dandiineemmohu hiitte doogganniiti? (Misileno lai.)

¹⁰ Xaa yannara ninkeno ammanate roduuwinkera dano iillitinonsata anfummoro mararreemmonsata leellisha dandiineemmo. Togoo roduuwa kaaꞌla dandiineemmohu hiittoonniitiro songote cimeeyye xaꞌmine, alamete doyicho loosira woxe fushshine hattono dano gawajjitino roduuwi daafira huuccatto assine tenne assa dandiineemmo. b (Law. 17:17) Lawishshaho 2020nni, Koroonu fayya gawajjitino roduuwa kaaꞌlate alamete doyichora 950 saꞌannota Danote Yannara Kaaꞌlitanno Komite xintinoonni. Tenne komite giddo soqqantanno roduuwa lowo geeshsha galanteemmonsa. Insa ammanate roduuwansa marartino daafira maalaamittete hasiisannore massitinonsa, ayyaanaamittetenni jawaachishshinonsa hattono mito bayicho roduuwunnitanna Yihowa magansiꞌnanni minna gatamartino woy mintino.—Layinki Qorontoosi 8:1-4 ledo heewisiisi.

11. Woloota mararre assineemmori iimi Anninke ayirranno gede assannohu hiittoonniiti?

¹¹ Dano kalaqantuhu gedensaanni roduuwanke mararreemmota leellinsheemmo woyite wolootu assineemmore huwattanno. Lawishshaho 2019nni Bahamasi yinanniwa Doriina yinanni hombobolatte Gambooshshu Addaraashe diiggino. Roduuwu tenne Gambooshshu Addaraashe wirro mintanni heedhe mittu Yihowa Farciꞌraasincho ikkinokki hanaatsichi mito looso loosanno gede kulte mageeshshi woxe baantannisiro xaꞌmitino. Isi togo yiino: ‘Ani mine minnanni uduunnenna wolqaꞌya oye hattono wolere asse dirijjiteꞌne kaaꞌla hasiꞌreemmo. Jaallaꞌne  marartinanni gari dhagge ikkinoe.’ Alamete aana noohu rooru manni Yihowa diafino. Kayinni batinyu manni Yihowa Farciꞌraasine woloota kaaꞌlate assitannore laꞌꞌanno. Woloota mararreemmota leellishanke mannu “maarote dureessa” ikkinohu Yihowawa daanno gede assitannota afanke lowo qoossooti!—Efe. 2:4.

12. Xaa yannara mararreemmore ikkanke bayiru qarrira qixxaambeemmo gede assitannonkehu hiittoonniiti? (Yohaannisi Ajuuja 13:16, 17)

¹² Bayiru qarri yannara mararreemmore ikkanke leellisha hasiissannonkehu mayiraati? Qullaawu Maxaafi poletikaho kaaꞌlantannokkirira xaano ikko bayiru qarri yannara qarru iillannonsata kulanno. (Yohaannisi Ajuuja 13:16, 17 nabbawi.) Ammanate roduuwinkera heeshshote hasiisannore afiꞌrate kaaꞌlo hasiissannonsaha ikkara dandaanno. Mootichinke Kiristoosi Yesuusi yoo yaate daanno woyite woloota mararreemmota leellinshanna afankera hasiꞌneemmo; qoleno ‘gashshoote ragiꞌneemmo’ gede assankera halchineemmo.—Mat. 25:34-40.

13. Roomu Sokka 15:7 kultanno garinni umi xibbi diri Kiristaani baxillinsa lexxanno gede assiꞌrinohu hiittoonniiti?

¹³ Hundi Kiristaani mimmitonsa baxansa mannu baalu insa bade afanno gede assitino. Insara mimmito baxa shota ikkitinonsa? Hanni Roomaho heedhino songo daafira laꞌno. Tenne songo giddo, Muse Seerira hajajama hasiissannonsata rosinohu Ayihudete manninna wole daga wido ikkinohu addi addi budi noonsa manni no. Mitootu borojje ikkitukki digattino; wolootu kayinni borojje ikkitinokkireeti mitu qolte borojju noonsare ikkitara dandiitanno. Kuni Kiristaani mereeronsa togoo badooshshi heeꞌrirono baxillinsa lexxanno gede assiꞌra dandaannohu hiittoonniiti? Soqqamaasinchu Phaawuloosi insa “mimmitoꞌne haadhe” yee amaalinonsa. (Roomu Sokka 15:7 nabbawi.) Hatto yaasi mayyaate? “Haaꞌra” yine tirroonni qaali, mittu manchira shaqqille leellisha woy wosinsiꞌra, lawishshaho mininkera koyisa woy isi ledo yanna sayisa leellishannoho. Lawishshaho Phaawuloosi, Filimooni isiwiinni xooqino borojjichosi Anaasimoosi ma garinni ‘haaꞌrannoro’ kulinosi. (Film. 17) Qoleno Aqiilanna Phirisqilla Kiristinnu daafira insa geeshsha afinokkiha Aphiloosi ‘haadhe mininsara massitino.’ (Soq. 18:26) Umi xibbi diro heeꞌrino Kiristaani addi addi budi noonsare ikkansa mereeronsa babbadooshshu kalaqamanno gede assitara diwodhino; hatteentenni mimmito anga fane haaꞌrino.

14. Aananna minaannise baxille leellishinohu hiittoonniiti?

¹⁴ Ninkeno ledonke yanna sayissanno gede anga fanne haaꞌne ammanate roduuwinkera baxille leellisha dandiineemmo. Tini, insano ninkera baxille leellishshanno gede assitannonsa. (2 Qor. 6:11-13) Hanni Aananna minaannise woꞌnaalsha laꞌno. Insa Galchimi Afirikira misiyoone ikkite soqqantara wole bayicho gaammeennansa hadhuhunni shiima yanna gedensaanni Koroonu fayya ubbino. Koroonu fayyanni kainohunni insa haarote martino songora noo roduuwi ledo xaada didandiitino. Kuri minaanninna minaama baxillensa leellisha dandaannohu hiittoonniiti? Insa viidiyote widoonni roduuwu ledo xaadino; hattono insa ledo roore egennama hasidhannota kultinonsa. Songote giddo noo roduuwino lowo geeshsha hagiidhite silke dowwoltinonsa; hattono borrote sokka sokkinonsa. Kuri minaanninna minaama togo assate sharrantinohu mayiraati? Aana togo yitino: “Roduuwu aneranna maateꞌyara faffote yannarano ikko qarru yannara leellishshinonke baxille horo dihaweemma; insa lawishshi anino baxille leellisheemma gede kakkayisinoe.”

15. Vaaneesa lawishshinni baalanka roduuwa baxate daafira maa rosootto? (Misileno lai.)

¹⁵ Batinye songuwa giddo noo roduuwi budinna akatinsa addi addiho. Ikkirono songonke  giddo noo roduuwi baalunkuha dancha akatansa illachinshe baxillinke lexxanno gede assiꞌra dandiineemmo. Niwuzilaandete soqqantannote Vaaneesa yinanni rodoora songosera noohu mitu roduuwi ledo dancha aante heedhannose gede assiꞌra qarra ikkitinose. Ikkirono gedensoonni ise caacceessitannose akatta noonsa roduuwiwiinni xeertiꞌra agurte insa ledo roore yanna sayisate murcidhino. Hatto assase Yihowa kuri roduuwa baxannonsahu mayiraatiro huwattanno gede kaaꞌlitinose. Vaaneesa togo yitino: “Minaanniꞌya woradu aliidi laꞌꞌaancho ikki yannanni hananfe addi addi akati noonsari batinyu roduuwi ledo yanna sayinsoommo; tini roduuwunniwa aana qarra ikkitannoekki gede kaaꞌlitinoe. Xa addi addi akati noonsa roduuwa lowo geeshsha baxeemma. Yihowa minisira abbinohu addi addi manna ikkino daafira isino addi addi akatta noonsa manna baxannoti dihuluullissannote.” Woloota Yihowa laꞌꞌanno garinni laꞌꞌa ronsummoro insa banxeemmonsata leellinsheemmo.—2 Qor. 8:24.

16. Bayiru qarri yannara baxillu lowo geeshsha hasiisannoha ikkinohu mayiraati? (Misileno lai.)

¹⁶ Bayiru qarri yannara baxillu lowo geeshsha hasiisannoho. Kuni qarri hanafanno woyite agarooshshe afiꞌneemmohu mamiinniiti? Hanni hunda Baabiloone siꞌni yannara Yihowa mannasi mayyee hajajinoro laꞌno; isi togo yiino: “Mannaꞌya, miniꞌnera eꞌine cufana cufidhe; hanqu saꞌꞌa geeshsha shiima yanna maaxamme.” (Isa. 26:20) Bayiru qarri yannara kuni biddishshi ninkeno harunsineemmoha ikkara dandaanno. Konni qummeeshshira ‘mine’ yinoonnihu songuwa kulate ikkara dandaanno. Yihowa ammanate roduuwinke ledo isira mittimmatenni soqqama agurreemmokkiha ikkiro, bayiru qarri yannara agarannonketa kule qaale eino. Hakko daafira roduuwinke laanfe agurre saꞌꞌa calla ikkikkinni insa godowinta baxate sharrama hasiissannonke. Ganteemmohu hatto assinummoro callaati!

17. Xaanni qixxaambeemmoha ikkiro bayiru qarri yannara maa assa dandiineemmo?

¹⁷ “Jawu [Yihowa] barri” mannu baalu lowo geeshsha qarramanno gede assanno. (Sof. 1:14, 15) Yihowa mannirano qarru iillannonsa. Kayinni xaanni qixxaambeemmoha ikkiro, wodanaaꞌmine heeꞌranna woloota kaaꞌla dandiineemmo. Iillannonke qarra baala cincine saꞌneemmo. Ammanate roduuwinke qarrantanno woyite insa mararreemmota leellishatenna hasiisannonsare assine kaaꞌlate dandiinummore baala assineemmo. Qoleno xaanni ammanate roduuwanke baxa ronsummoro albillitte insa baxa qarra diꞌꞌikkitannonke. Hatto ikkiro, danonna qarra horo qaangannikki alamera Yihowa hegere heeshsho oye baꞌraasannonke.—Isa. 65:17.