WOLE yannara Antooniya hatte mancho minira martuta xaano mancho boroortuse. Antooniya maa assituyya? Ise togo yitino: “Kuni fonqolanno coyeeti. Ise beebballa xontinoe.” Ikkollana tenne yannarano Antooniya manchote iillinose qarra affinota kulte ise maaro xaˈmidhino.

Ati Antooniya ikkoottoro maa assatto? Manchote joongillunni dawarate woˈnaalattonso, hanqo eemadha qarra ikkitannohe? Aleenni kulli gedee coye iillannonke yannara gaˈlabbi yaa shota ikka hooggara dandiitanno. Daafurre heeˈneemmo wote woy gara ikkinokkire coyiˈnanninke yannara manna shaqqillunni hasaawisa shota ikka hooggankera dandiitanno.

Qullaawu Maxaafi Kiristaanu jooguulle ikkanno gede jawaachishanno. Maganu Qaali joongillu hayyote ledo xaado afiˈrinota kulanno. Yaiqoobi 3:13 togo yitanno: “Kiˈne giddo hayyichunna egennaamu ayeti? Hayyotenninna joongillunni loosinoha dancha looso heeshshosinni leellisho.” Joongillu iimi hayyooti yineemmohu mayiraati? Kuni Magano hagiirsiisanno akati heeˈrannonke gede kaaˈlannonkeri maati?

Joongillu gibbo qiissanno. “Shaqqadu arrawi hanqo qiissanno; kaajjadu qaali kayinni hanqo kakkayisanno.—Law. 15:1.

Mittu manchira hanqine qola, giirate aana laamba dunate gede ikkitinohura, coyi roore bushanno gede assitanno. (Law. 26: 21) Shaqqadu qaalinni coyira kayinni duucha wote coyi qiidanno gede assitanno. Tini hanqe aaraawino manchi nafa gaˈlabbi yaanno gede assitara dandiitanno.

Antooniya tini adda ikkinota huwattino. Mancho Antooniya awu afiinni hasaawissuseta wiˈlitino. Mancho iseranna maatesera iillino qarrinni kainohunni baasa yaaddinota kultinose. Antooniya tenne manchora dancha gede farcidhino; hattono Qullaawa Maxaafa xiinxallisa hanaffino; kuni ikkinohu Antooniya jooganna salaame hasidhannota ikkitinohuraati.

Joongillu hagiirsiisanno akataati. “Jooguullu baˈraadhinoreeti; baattono ragidhannona.”—Mat. 5:5.

Jooguullu hagiidhitannohu mayiraati? Alba hanqaaleeyye ikkinohu batinyu manni joogoota ikki gedensaanni hagiirraamma ikkino. Heeshshonsa woyyaabbino, hattono albillittete dhaggete hexxo noonsata huwatino. (Qol. 3:12) Ispeenete gobbara woradu aliidi laˈˈaancho ikke soqqamannohu Adolfo halaale macciishshara albaanni heeshshosi hiittootero qaage coyiˈrino.

Adolfo togo yiino: “Alba heeshshoˈya alaamu nookkite. Hanqu duucha wote naaxxaleessa ikkeemmo gede assinoe; hanqe coyiˈreemmohura jaallaˈya nafa waajjitannoe. Gedensaanni kayinni heeshshoˈya soorrannori ikki. Mitte hige gibbo kaˈeenna lee base saanjunni qanse madiissineennae reye hooge gatoommo.”

Xa Adolfo coyiˈrannorinninna lawishshunni wolootu jooguulle ikkitanno gede rosiisanni no. Batinyu manni isiwa ruxxi yiikkinninna hagiidhanni shiqanno. Adolfo heeshshosi woyyaabbino daafira hagiirraamo ikkinota coyiˈrino. Qoleno jooga ikkanno gede kaaˈlinosihura Yihowa galatanno.

Joogoota ikka Yihowa hagiirsiissanno. “Beettoˈya, xontannoerira dawaro qola dandeemmo gede, egennaamo ikki; aneno hagiirsiisie.”—Law. 27:11.

Yihowa diina ikkinohu Daawuloosi Iso xonino. Maganu tennera hanqa dandaannoha ikkirono, Qullaawu Maxaafi Yihowa ‘hanqoho muddamannokkiha’ ikkinota kulanno. (Ful. 34:6) Ninkeno hanqoho muddammeemmokkirenna joogoota ikkine Maganu faale haˈrate sharrammeemmoha ikkiro, Yihowa hagiirsiissanno hayyo noonketa leellinsheemmo.—Efe. 5:1.

Heeˈnoommo alame gibbo woy gaance woˈmitinote. ‘Naaxxaleeyye, booˈnaleeyye, xonamaano, hemaano, umonsa qeeˈlannokkinna mararro afiˈrinokki’ manninni xaandammora dandiineemmo. (2 Xim. 3:2, 3) Ikkirono tini Kiristaanu joogoota ikkannokki gede diassitannonsa. Maganu Qaali iimi hayyo ‘keere baxxannotanna gaˈlabbitte’ ikkitinota kulanno. (Yai. 3:17) Keere banxeemmorenna gaˈlabboota ikkinummoro, iimi hayyo noonketa leellinsheemmo. Togoo hayyo, mannu hanqisannore coyiˈrannonke yannara shaqqillunni dawarreemmonna gawalo nookki hayyo Buicho ikkinohu Yihowawa albinni roore shinqeemmo gede assitannonke!