1. Baalunkuri Yihowareeti yineemmohu mayiraati? (Hanafote noo misile lai.)

 BAALUNKURI Yihowaho! “Gordunna gordoho aleenni noo gordi, baattonna aanase” noori baalu isiho. (Mar. 10:14; Aju. 4:11) Mannu ooso baala kalaqinohu Yihowa ikkino daafira insa baalunku isireeti. (Far. 100:3) Ikkollana hundinni kayise, Maganu mannu ooso mereerinni jajjasi ikkitanno gede mito manna doodhanno!

2. Qullaawu Maxaafi giddo Yihowahu baxxino jajji gede assine xawinsoonniri ayeooti?

² Lawishshaho, Faarso 135 Yihowa hundiha Israeelete manna “umisi jiro asse” doodhinota kultanno. (Far. 135:4) Qoleno Hoosei maxaafira Israeelete wido ikkinokki manni Yihowa manna ikkannota masaalloonni. (Hos. 2:23) Yihowa albillitte Yesuusi ledo gashshitannori wido ikkara Ayihude ikkinokki manna doori woyite, Hoosei masaalo woꞌmitino. (Soq. 10:45; Rom. 9:23-26) Kuni “dooramino sirchi” Yihowaho ‘baxxino miinjaati’; korkaatuno kuni manni iima heeꞌranno gede qullaawu ayyaaninni buuraminoho. (1 Phe. 2:9, 10) Uullate aana heeꞌrate hexxo noonsahu ammanamino Kiristaanina? Yihowa insano ‘mannaꞌya’ yee woshshinonsa.—Isa. 65:22.

3. (a) Yannankera Yihowa jaalla ikkate qoosso afidhinori ayeooti? (b) Konni birxichira maa ronseemmo?

 ³ Yannankera iimira haꞌrate hexxo noonsari ‘shiima hoshshanna’ uullate aana heeꞌrate hexxo noonsari “wolu geꞌreewi” wido ikkino Kiristaani mitteenni Yihowa mannisi gede asse laꞌꞌannota “mitte hoshsha” ikkitino. (Luq. 12:32; Yoh. 10:16) Konni garinni isi ledo muli jaalooma kalaqiꞌneemmo gede assinonkehura Yihowa galata hasiꞌneemmoti egennantinote. Konni birxichira Yihowa togo asse ayirrisinonke daafira, isira galata qoꞌla dandiineemmo doogga ronseemmo.

4. Yihowa jaallasi ikkineemmo faro faninonke daafira iso galata dandiineemmo doogga giddo mitte maati? Yesuusi tennera lawishsha ikkinonkehu hiittoonniiti?

⁴ Yihowa galanteemmota leellisha dandiineemmo doogga giddo mitte, woꞌmu wodaninkenni ninkeneeto isira sayise aate. Wayinni cuuammeemmo woyite Yihowa jajja ikkanke ammanne adhinoommotanna isira maahoyye yine galate sumuu yinoommota mannu albaanni leellinsheemmo. (Ibi. 12:9) Yesuusino cuuami woyite tenne leellishino; isi Yihowara “Maganoꞌya fajjokki wonshammora baxoommo” yiinohu gedeeti. (Far. 40:7, 8) Yesuusi ilami yannanni kayise Maganu daga wido ikkirono, Yihowa fajjo wonshate isonooto shiqishino.

5, 6. (a) Yesuusi cuuami woyite Yihowara mayi macciishshaminosi? (b) Yihowa ninkeneeto isira sayinse uyinummoro hagiidhannohu mayiraatiro lawishshunni xawisi.

⁵ Yesuusi cuuami yannara Yihowara mayi macciishshaminosi? Qullaawu Maxaafi togo yaanno: “Yesuusi cuuame kae wayi giddonni fulanni heeꞌreennanni, gordu faꞌnameenna Maganu Ayyaani lembooli gede ikke dirre aanasi ofollanna afi. Hakkawoyintenni, ‘Hagiirsiisannoehu baxeemmo Beettiꞌya isooti’ yitanno huuro gordunni daggu.” (Mat. 3:16, 17) Wonanni Yesuusi iimi Annisi jajja ikkirono, Yihowa Beettisi Iso calla magansiꞌrate isonooto shiqishino daafira hagiidhino. Yihowa ninkeno heeshshonke isira sayinse uyineemmo woyite hagiidhanno; hattono atootesi aannonke.—Far. 149:4.

⁶ Hanni mitto lawishsha hedi. Mittu anni qaaqqosira koshoro uyino. Hakkiinni qaaqqo koshorote giddonni mitte annisera uyitu. Wonanni koshoro anniseta diꞌꞌikkitino? Ikkina qaaqqo annisera qolte mayira uyitanno? Baxillaanchu anni hatto yee hedannokkiti egennantinote. Hatteentenni, qaaqqosi koshoro uyitinosihu baxxannoe daafiraati yee hede hagiidhe adhanno. Yihowano iso calla magansiꞌrate ninkeneeto shiqinsheemmo woyite lowo geeshsha hagiidhanno.—Ful. 34:14.

7. Milkiyaasi Yihowa Iso magansidhannorira noosi lao xawisinohu hiittoonniiti?

⁷ Milkiyaasi 3:16 nabbawi. Heeshshokki Yihowara sayisse uyite cuuamoottokkiha ikkiro, togo assakki mageeshshi geeshsha hasiissannotero hedi. Amakki godowira kalaqamitto yannanni kayise, wolu manninte gede atino Yihowa jajjaati. Ikkollana Yihowa kalqete alamera aliidiha ikkinota wodanchite heeshshokki isira sayisse aakkinna fajjosi wonshakki mageeshshi geeshsha hagiirsiissannosiro hedi. (Law. 23:15) Yihowano uminsa fajjonni iso magansidhannore naadannonsa, hattono suꞌmansa qaagooshshu “maxaafisira” borreessanno.

8, 9. Yihowa “maxaafisira” borreessamino manni maa assara hasiꞌranno?

⁸ Suꞌminke Yihowa “maxaafira” borreessame heeꞌrara hasiꞌnummoro assa  hasiissannonkeri no. Milkiyaasi Yihowa ‘waajjanna suꞌmasi ayirrisa’ hasiissannonketa xawisino. Yihowa agurranna mittohono magansiꞌrate gedee ayirrinye aa, suꞌminke Yihowa maxaafinni baꞌꞌanno gede assitanno.—Ful. 32:33; Far. 69:28.

⁹ Konni daafira, ninkeneeto Yihowara sayise aate yaa, isi fajjo assate qaale eanna wayinni cuuama calla diꞌꞌikkino. Kuri mitte hinge assine agurranni coyibbaati. Xaano ikko hegerera heeshshote heeꞌnoommo geeshsha barru baala Yihowara hajajamme isire ikkinoommota leellisha hasiissannonke.—1 Phe. 4:1, 2.

10. Yihowara soqqantannonna soqqantannokkiri mereero hiittoo badooshshi heeꞌra hasiissanno?

¹⁰ Sai birxichira Qaaeeli, Selemooninna Israeelete manni xagge ronsoommo. Insa baalunku Yihowa magansiꞌneemmo yitinoha ikkirono, magansiꞌransa woꞌmu wodanita diꞌꞌikkitino. Kuri lawishshuwa Yihowa manni, keeraanchimma seekke cuꞌmiranna bunshe effire giwa hasiissannonsata leellishshanno. (Rom. 12:9) Milkiyaasi Yihowa ‘maxaafire’ xawisi gedensaanni, Yihowara ‘soqqamannohu danchu manchira assinannisi danchummanna Isira soqqamannokkihura bushu manchira iillannosi qarra’ coyiꞌrino.—Mil. 3:18.

11. Yihowa calla magansiꞌneemmoti wolootaho xabbe leella hasiissanno yineemmohu mayiraati?

¹¹ Yihowa mannasi assinonke daafira galata qoꞌla dandiineemmoti wole doogo, ayyaanaamittetenni “lophanke mannu baalu afanno” gede assate. (1 Xim. 4:15; Mat. 5:16) Ateneeto togo yite xaꞌmi: ‘Woꞌmu wodaninni Yihowara ammanamoommoti mannaho leeltanno? Yihowa Farciꞌraasincho ikkoommota kuleemmo faro hasiꞌreemmo?’ Yihoware ikkinoommota wolootaho kula saalleemmoha ikkiro, mannasi asse doorinonkehu Yihowa lowo geeshsha dadillanno.—Far. 119:46; Maarqoosi 8:38 nabbawi.

12, 13. Mitootu Yihowa Farciꞌraasine ikkansa xabbe leeltannokki gede assitinohu hiittoonniiti?

¹² Mitu Kiristaani ‘alamete ayyaana’  harunse ‘Magano magansidhannorinna magansidhannokkiri’ mereero no badooshshi xawe leellannokki gede assino; tini dadillissannote. (1 Qor. 2:12) ‘Alamete ayyaani’ mannu ‘maalu yortonsa’ calla illachishanno gede xixxiiwanno. (Efe. 2:3) Lawishshaho, uddiꞌratenna seesate daafira duucha hinge amaalloonninsaha ikkirono, mitootu xaano uddidhanno uddano bikkunnita diꞌꞌikkitino. Insa Kiristaanu gambooshshe dagganno woyite nafa, bisoho qaꞌmitinotanna biso leellishshanno uddano uddidhanno. Woy umo amanyoote afiꞌrinokki garinni mudhitanno woy amaxxitanno. (1 Xim. 2:9, 10) Tini qolte insa wolu manni ledo heeꞌreenna, Yihowaha ikkinohu ayetironna alamete jaali ayetiro bade afa qarra ikkitanno gede assitanno.—Yai. 4:4.

¹³ Mite Yihowa Farciꞌraasine alametenna Maganu manni mereero noo badooshshi xawe leellannokki gede assannore wolereno assitino. Lawishshaho mitootu jilunniwa Kiristaanaho hasiisannokki sirba sirbitanno, hattono ikkinannikkita ikkitanno. Insa dagoomittete webisayitera wortanno fottanna borreessitanno hedo Maganu baxanno manchi assanno yine hendannikkireeti. Insa shota ikkinokki cubbo loossino yine seejjinoonninsakkiha ikkara dandaanno; ikkirono insa dancha akatta heedhannonsa gede assiꞌrate sharrantannori Yihowa daga mereero noo darawonsara busha lawishsha ikkitanni no.—1 Pheexiroosi 2:11, 12 nabbawi.

14. Yihowa ledo noonke jaaloomi baꞌꞌannokki gede hiittoo heeshsho heeꞌra hasiissannonke?

¹⁴ Tenne alamera noori baalu ‘maalu yorto, illete halchishannorenna jirotenni naaxxa’ jawaachishannoreeti. (1 Yoh. 2:16) Ninke kayinni Yihoware ikkinoommo daafira, “ammana giwanna maalu yorto agurre umo qeeꞌline, sumbetenninna ayyaanaame heeshshonni tenne” alamera heeꞌra hasiissannonke. (Tit. 2:12) Coyiꞌneemmori, inteemmonna angeemmo gari, uddiꞌneemmonna seenseemmo gari, loonseemmo loosi, hattono assineemmori baalu Yihowa calla magansiꞌneemmore ikkinoommota leellishannoha ikka hasiissannosi.—1 Qorontoosi 10:31, 32 nabbawi.

15. Roduuwinkera danchummanna baxille leellisha hasiissannonkehu mayiraati?

¹⁵ Ayyaanaamittete roduuwinke ledo noonke aante Yihowa jaala ikkate qoossonke naandeemmoronna teꞌee leellishshanno. Insano ninkete gede Yihowareeti. Tenne hawa hoongummoro, woꞌmante yannara roduuwinkera danchummanna baxille leellinsheemmo. (1 Tes. 5:15) Yesuusi harunsaanosi togo yiino: “Kiꞌne kiꞌneneewa baxantiniro, ane rosaano ikkitinoonnita mannu baalu tennenni egennannoꞌne.”—Yoh. 13:35.

16. Yihowa mannasi mageeshshi geeshsha baxannoro leellishannohu Muse Seeri hiikkonneeti?

¹⁶ Songote giddo roduuwinke ledo hiittoo aante heedhannonke gede assiꞌra hasiissannonkero huwatate hanni mitto lawishsha hedi. Yihowahu qullaawu mini giddo, halaalu magansiꞌrara calla horoonsiꞌnanni uduunni no. Muse Seeri kuri uduunne ma garinni amada hasiissannoro xawisanno biddishsha amadino; konne seera diigino mancho shinanni. (Kir. 1:50, 51) Yihowa iso magansiꞌrate horoonsiꞌnanniha heeshsho afiꞌrinokki uduunne togo asse agarannoha ikkiro, mannasi asse doodhinorenna heeshshonsa isira sayisse uyitinore ammanantino soqqamaanosi lowo geeshsha baxannoti egennantinote! Yihowa mannisi daafira coyiꞌranni “Kiꞌne kisannohu illeꞌya diikkicho kisannoho” yiino.—Zak. 2:8.

17. Yihowa seekke harunsannori maati?

¹⁷ Milkiyaasi Yihowa daga mimmitu ledo hasaabbanno woyite Yihowa ‘macciishshannota’ xawisino. (Mil. 3:16) Ee, Yihowa “isire ikkitinore afino.” (2 Xim. 2:19) Isi ninke coyiꞌneemmonna assineemmoha mitto mittonka coye seekke afino. (Ibi. 4:13) Yihowa roduuwinkera gara ikkinokkire assineemmonna coyiꞌneemmo woyite ‘macciishshanno.’ Mimmitonke gatona yineemmoha, wosina adhineemmohanna shaqqadda ikkinummoro Yihowa tenne laꞌꞌannota dihuluullammeemmo.—Ibi. 13:16; 1 Phe. 4:8, 9.

18. Yihowa manna ikkate qoossonke naandeemmota leellisha dandiineemmohu hiittoonniiti?

¹⁸ Yihowa mannasi asse ayirrisinonke daafira iso galata hasiꞌneemmoti egennantinote. Uminke fajjonni heeshshonke isira sayinse uyine jajjasi ikkinoommota ammananke hayyote. Heeꞌnoommohu “bushanna shokkashsho ilama mereero” ikkirono, “saalsiisannorinna mishiishannori” nokkirenna ‘gobba baalate beeddahimma xambeemmore’ ikkinoommota mannu afara hasiꞌneemmo. (Fil. 2:15) Bunshe effiꞌne gimbeemmo. (Yai. 4:7) Qoleno ammanate roduuwinke Yihowa jajja ikkitinota anfoommo daafira, banxeemmonsa, hattono ayirrinseemmonsa.—Rom. 12:10.

19. Yihowa isire ikkitinorira baꞌraaꞌra aannohu hiittoonniiti?

¹⁹ Qullaawu Maxaafi ‘Yihowa mannasi diaguranno’ yaanno. (Far. 94:14) Tini Yihowa woꞌmante yannara ledonke ikkannota leellishshanno. Reyinummoro nafa isi dihawannonke. (Rom. 8:38, 39) “Lubbotenni heeꞌnummoro Mootichaho heeꞌneemmo; reyinummorono Mootichaho reyineemmo. Kunnira, heeꞌnummorono reyinummorono Mootichunnireeti.” (Rom. 14:8) Yihowa ammanantino jaallasi baala reyotenni kayisanno barra quqquxamme agadhineemmo. (Mat. 22:32) Xa nafa lowo atoote afiꞌnoommo. Qullaawu Maxaafi yaanno garinni, “Kaaliiqi Maganonsa ikkino manni baꞌraaꞌrinoho; isire assiꞌre doodhinonsa gosa baꞌraadhinote.”—Far. 33:12.