AANIIDI QOOLIHA COYI UMO
Yihowa Farciꞌraasine Hiittoo Mannaati?
“Mayiki ledo egennamummanku lowo dirooti. Isi Yihowa Farciꞌraasinchooti. Ikkollana ammaꞌnosi gari dileellannoe. Yihowa ayeti? Yihowa Farciꞌraasine ayyaanna ayirrissannokkihu mayiraati? Mayiki hashshi-gedeno daggino ammaꞌno widira higi yaate?”—Beekii, Kaalifoorniya, Ameerika.
“Qachiꞌya manni Yihowa Farciꞌraasine ledo Qullaawa Maxaafa xiinxalla hanafi yannara, ‘Yihowa Farciꞌraasine yaa mayyaate?’ yee hedoommo. Togoo suꞌma afidhino ammaꞌno horo afe diegennoommo!”—Zeneni, Ontariyo, Kanaada.
“Aninna minaamaꞌya beetekiristaane haꞌra hoogankenni umonke bushiinsheemmo daafira, Yihowa Farciꞌraasine ninketa daggannohu hattee faro horoonsidharaati yine hendoommo. Qoleno, qara qara beetekiristaanna nafa ninke hasiꞌneemmore wonshitinokkiha, kaimansa anfoonnikkiri Yihowa Farciꞌraasine yinannite gedee ammaꞌno maa tirtannonke yine hendoommo.”—Kenti, Waashingiteni, Ameerika.
“Noore coyiꞌrummaro, Yihowa Farciꞌraasine hiittoo mannaatironna mayite ammantannoro diafoomma.”—Sesiiliya, Isbiya, Denimaarke.
Atino Yihowa Farciꞌraasine minunni mine hadhe woy gudumaaleho sabbakkanna, Qullaawu Maxaafi aana xintantino borro mannaho uyitannanna Qullaawa Maxaafa mulla xiinxallisanna laittokki digatootto. Qoleno tenne metseete adhoottohu insawiinni ikkara dandaanno. Ikkirono, Yihowa Farciꞌraasine ayimma seekkite afoottokkiha ikkara dandaanno. Aterano aleenni qummi assini mannite gedee hedo heedhahera dandiitanno.
Togoo xaꞌmo huluullitannoheha ikkiro dawaro afiꞌra dandaattohu hiikkiinniiti? Yihowa Farciꞌraasine mayite ammantannoro, soqqanshonsaranna magansidhanno bayichira hasiisanno woxe mamiinni afidhannoro, minikkira daggannohu woy gudumaaleho hasaawissannohehu mayiraatiro afa dandaattohu hiittoonniiti?
Aleenni qummi assiniti Sesiiliya togo yitino: “Interneetete aana Yihowa Farciꞌraasine daafira lowore nabbawoomma. Mannu insa daafira kaire yaanna, hattono insa suꞌma hunannore lowo coye coyiꞌranna macciishshoomma. Konninni kainohunni, Yihowa Farciꞌraasine effire giwumma.” Gedensaanni kayinni, ise Yihowa Farciꞌraasinewa marte noose xaꞌmo insa umonsa xaꞌmitino daafira duushshitanno dawaro afiꞌra dandiitino.
Atina Yihowa Farciꞌraasine daafira noohe xaꞌmora gara ikkitino dawaro afiꞌra hasiꞌratto? Taaltino dawaro afiꞌrate tenne metseete qixxeessitinore Yihowa Farciꞌraasine umonsa xaꞌmi ballo. (Lawishsha 14:15) Aante noo birxichuwa ninke hiittoo mannaatiro, mayine ammanneemmoronna loosonke huwatatto gede kaaꞌlitannohe yine hendeemmo.
