Ilamoommohu hakkawaro Jarmanete Dimokiraatike Rippaabilike yinanni gobbara, Saksenii yinanni qachiraati. Mininke hagiirrunna baxillu woꞌminoho; qoleno anniꞌyanna amaꞌya dancha amanyootu seera rosiisinoe. Jarmanete Dimokiraatike Rippaabilike Kominiizimete seerinni galtino gobbaati; hakko daafira Saksenii qachira heeꞌrannohu rooru manni ammaꞌno diboonannoho. Anerano hakkawaro Maganu nooha dilawannoe. Tonaa sette diro ikkie geeshsha heeshshoꞌya quxinohu lamu coyi: Maganu dino yitanno hedootinna Kominiizimete seeraati.

Kominiizimete seera baxoommohu mayiraati? Mannu baalunku taaloho yinanniti baxissinoe daafiraati. Qoleno noo jiro baalanta taashshe beeha hasiissanno yee ammaneemmo; mayira yiniro, hatto assa mitu manni hoqe durooꞌmeenna mitu buxe buluulannokki gede assitanno. Hakko daafira, wedellootu Kominiizime dirijjite giddo eꞌꞌe diinaggaawe loosa hanafummo. Tonaa shoolu dirihu heeꞌre, hunnoonni woraqata wirro horoonsiꞌnanni gede assate looso loosanni hoseemmoha ikkummo; konni garinni qooxeessa biifinseemmo. Heeꞌreemmo katamira Awo noo gashshaasine loosoꞌya laꞌe lowo geeshsha hagiidhitino daafira baraarsha uyitinoe. Shiimu heeꞌrenni, mite jajjabba gashshaasine ledo egennamoommo. Haꞌranni noommo haꞌrinsho lowo geeshsha faayya ikkitinotanna albillittete heeshshoꞌyano seekkanno yee hedoommo.

Hakkiinni baalunku coyi hedeweelcho umo lekkicho bai. Hatte yannara 1989nni Berliini Gimbe ubbuta, Soojjaati Awuroppira Kominiizimete gashshootino uwi. Masisinoehu konne calla diꞌꞌikkino. Mulenni Jarmanete Dimokiraatike Rippaabilike giddo taashsho nookkita huwatummo. Lawishshaho, Kominiizimete gashshootira halamannokki manna hooffayidi qansooti gede assine kiirranni. Kuni hiitto ikke ikki? Ninke Kominiizimete seera harunsineemmori dimannu baalu taaloho yine ammanneemmo? Kominiizimete gashshooti mulla ikkannokkirella kulannoho yaate? Tenne baala hedummoti lowo geeshsha yaadummo.

Hakko daafira, wolere agure muuziiqanna misile kayisate ogimma illachishummo. Muuziiqu rosi mine rosoommo daafiranna yuniversite eummorono isonni lede rosa dandeemmo daafira, muuziiqunna misilete ogeessa ikkate hedummo. Hakkiinni saeno, anje heeꞌreenna rosiinsoonnieha amanyootu seera facci asse agurummo. Hakkawoyite roore diinaggaaweemmohu boohaarateeti; qoleno mitte hige duuchu seenni ledo baxamoommo. Ikkollana muuziiqu, misilete ogimmanna togo baxummo gede ikke heeꞌraꞌya yaaddoꞌya dihooltino. Kayiseemmo misilla nafa giddoꞌya waajja noota leellishshannote. ‘Albillitte mayi ikkakka? Heeꞌneemmohu isi mayiraati?’ yee hedoommo.

Gedensoonni xaꞌmuwaꞌyara dawaro afiꞌrummo; afiꞌroommo dawarono dhagge ikkitue. Mitto hashsha rosu mine rosaanote ledo gamba yine albillittete heeshsho daafira hasaambanni heeꞌnoommo. Mandii a yinanni rosaancho Yihowa Farciꞌraasinchooti. Hakko hashsha ise dancha amaale amaaltinoe. “Andiriyasi, heeshshotenna albillittete yanna daafira noohe xaꞌmuwara dawaro afiꞌra hasiꞌrittoro, Qullaawa Maxaafa seekkite xiinxalli” yitinoe.

Ise hatto yitueta huluullamano huluullamoommo, afateno quqquxamoommo; kayi huluulloꞌya qeeꞌle Qullaawa Maxaafa nabbawate hedummo. Mandii Daanieeli fooliishsho 2 nabbaweemmo gede kultue; nabbawoommori lowo geeshsha dhagge ikkie. Tini masaalo dirinke geeshsha aante aantete kaꞌannota wolqaataame alamete mangistubba kultanno. Mandii albillittete yanna daafira kultannota wole Qullaawu Maxaafi masaalono kultinoe. Jeefote, xaꞌmuwaꞌyara dawaro afiꞌra hanafummo! ‘Kayinni tenne masaalo coyiꞌrinohu ayeti? Qoleno albillittete daafira mittoreno soꞌrikki masaala dandaannohu ayeti? Isi Maganu nookka?’ yee hedummo.

Mandii, Horistinna Anjeliika yinanni minaanninna minaama ledo xaadissue; kuri Yihowa Farciꞌraasine Maganu Qaale roore huwateemmo gede kaaꞌlitinoe. Yihowa yinanniha Maganu suꞌma woꞌmanka woyite woshshitannorinna mannaho kultannori Yihowa Farciꞌraasine calla ikkitinota mulenni huwatummo. (Faarso 83:18; Maatewoosi 6:9) Maganu Yihowa mannu ooso gannate ikkitino uullara hegerera heedhara hexxo uyinota rosummo. Faarso 37:9 “Kaaliiqa hexxitannori . . . baatto ragidhanno” yitanno. Qullaawu Maxaafi giddo kulloonnihu Maganu seeri garinni heeꞌrate sharramanno manni baalunku tenne hexxo afiꞌra dandaannota afaꞌya hagiirsiissinoe.

Ikkollana, heeshshoꞌya biddi assire Qullaawu Maxaafi kulannori ledo sumuu yee heeꞌrate sharrama hasiissinoe. Muuziiqahonna misilete ogimmara worba ikkaꞌya naaxxaleessa assitinoe; hakko daafira balaxe umo heeshshi assa rosa hasiissinoe. Amanyoote baꞌino heeshsho heeꞌra agurano shota diꞌꞌikkitinoe. Yihowa, Qullaawu Maxaafi rosi ledo sumuu yite heeꞌrate sharrantannore cincannoha, maarannohanna qarrinsa leellannosiha ikkino daafira lowo geeshsha galaxxeemmosi!

Tonaa sette diro ikkae geeshsha heeshshoꞌya quxinohu Kominiizimete seeraatinna Maganu dino yee ammanate; hakkuyi kawa kayinni Qullaawu Maxaafi heeshshoꞌya soorre biddi assanni no. Rosoommo rosi albillittete yanna daafira yaadeemmokki gedenna heeꞌreemmohu mayiraatiro huwateemmo gede kaaꞌlinoe. Konnira 1993nni cuuame Yihowa Farciꞌraasincho ikkummo; hakkiinni 2000nni, diinaggaabbe Yihowara soqqantannota Taabita yinanni rodoo adhoommo. Wolootuno Qullaawu Maxaafi rosiisannore affanno gede kaaꞌlate, lamunku dandiinummo deerrinni lowo saate soqqammeemmo. Xaandeemmohu batinyu manni alba anente gede Kominiizimete seerinni galannohonna Maganu dino yee ammanannoho. Insara Yihowa affanno gara kuleemmonsa woyite lowo geeshsha tashshi yaannoe.

Umo Yihowa Farciꞌraasine ledo xiinxalla hanafummo woyite, anniꞌyanna amaꞌya lowo geeshsha masino. Ikkollana hakkuyi kawa insa Yihowa Farciꞌraasine ledo xiinxallaꞌya heeshshoꞌya biddi assitino gara huwatino. Xa insa Qullaawa Maxaafa nabbawanno daafiranna Yihowa Farciꞌraasine gambooshshe haꞌranno daafira tashshi yaannoe.

Taabitanna ani Qullaawu Maxaafi adhantinorira aanno amaale seekkine harunsineemmo daafira, adhamanke hagiirru noote. Lawishshaho, galtete ammaname heeꞌra hasiissannota kultanno amaale harunsanke adhamanke baxillu noota ikkitanno gede kaaꞌlitinonke.—Ibiraawoota 13:4.

Xa heeshsho diwaajjeemmo, albillittete yanna daafirano diyaadeemmo. Xa ani addu keerinna mittimma noote alamete doyicho maate miilaati. Tenne maate giddo ammanate roduuwanke baalanka taashshine laꞌneemmo. Kuni ikka hasiissanno yee ammaneemmo coyeeti; qoleno heeshshoꞌya diro baala halchanni heeꞌroommoreeti.