Tonne Hajajo yinanniri Maganu hundi Israeelera uyino seeraati. Konne seera Tonne Qaaleno yinanni; kuni, asereti hadiverimi yaannoha Ibiraawootu qaale noo gedeenni tirre fushshinoonni suꞌmaati. Kuni Ibiraawootu qaali, Qullaawa Borrohu umihu ontu maxaafi giddo (Pentaateki woy Toora) sase basera no. (Fulo 34:28; Marro 4:13; 10:4) Giriikete Afiihu addaarro qaali kayinni deka (tonne) logusi (qaalla) yaanno; “Dekalogi” yaannohu Ingilizete Afii qaali konni garinni xintaminoho.

 Maganu Tonne Hajajo lamu boncoonni kinchira borreesse Siina Ilaali aana masaalaanchu Musera uyino. (Fulo 24:12-18) Tonne Hajajo, Fulo 20:1-17 nna Marro 5:6-21 aana borreessinoonni.

•  Tonne Hajajo Aante

•  Tonne Hajajo kiirranni gari babbaxxinohu mayiraati?

•  Maganu Tonne Hajajo uyinohu mayiraati?

•  Kiristaanu Tonne Hajajo agadha hasiissannonsa?

•  Tonne Hajajo yannankera kaaꞌlitannori no?

•  Tonne Hajajora xinta ikkino seera Haaru Gondoori giddo xawinsoonnihu hiittoonniiti?

1.   Magano Yihowa calla magansiꞌri.—Fulo 20:3.

2.   Kaphu maganna magansidhooti.—Fulo 20:4-6.

3.   Maganu suꞌma doogimale gantooti.—Fulo 20:7.

4.   Sambata ayirrisi.—Fulo 20:8-11.

5.   Annakkinna amakki ayirrisi.—Fulo 20:12.

6.   Shitooti.—Fulo 20:13.

7.   Soorritooti.—Fulo 20:14.

8.   Moortooti.—Fulo 20:15.

9.   Kapho farcidhooti.—Fulo 20:16.

10.   Yortooti.—Fulo 20:17.

 Qullaawu Maxaafi Tonne Hajajo mite lame yee dikiiranno. Hakko daafira, Tonne Hajajo kiira hasiissanno aante lainohunni mannaho babbaxxitino lao noonsa. Konni aleenni noo aante, roore woyite Tonne Hajajo kiirranni gara leellishshannote. Ikkollana, mitootu Tonne Hajajo wolu garinni kiirtanno. Badooshshu noohu umi, layinkinna jeefote hajajo aanaati. a

 Tonne Hajajo Muse Seeri widira kiirantanno. Muse Seeri giddo 600 saꞌanno hajajo no; kuni Seeri Maganunna hundi Israeele mereero noo gondoorira xintaho. (Fulo 34:27) Maganu, Israeelete daga Muse Seera ayirrissuro maassiꞌrannonsata kulinonsa. (Marro 28:1-14) Ikkollana Maganu hakkonne Seera uyinohu qaru korkaati, Israeelete daga daanno yinoonni Mesihicha woy Kiristoosi qixxaabbe agadhitanno gede kaaꞌlateeti.—Galatiyu Sokka 3:24.

 Dihasiissannonsa. Maganu, Tonne Hajajono mitteenni amadinoha Muse Seera uyinohu hundite Israeelete dagaraati. (Marro 5:2, 3; Faarso 147:19, 20) Kiristaanu Muse Seeri hunda galannoha diꞌꞌikkino; wole agurina Kiristaana ikkitino Yihudooti nafa ‘Seeru usuriwiinni tidhantino.’ (Roomu Sokka 7:6) b Muse Seeri bayicho “Kiristoosi Seera” (Yesuusi rosaanosi asse yee hajajinore baalankare) uyinoonni.—Galatiyu Sokka 6:2; Maatewoosi 28:19, 20.

 Ee. Tonne Hajajo Maganu hedo huwanteemmo gede kaaꞌlitannonke daafira, tenne Hajajo xiinxallanke kaaꞌlitannonke. (2 Ximootewoosi 3:16, 17) Tonne Hajajo xintantinohu, diru horonta shaarannokkihunna addaxxinannihu xintu seeri aanaati. (Faarso 111:7, 8) Isinni konni xintu seeri giddo batinyu, Haaru Gondoorira noo rosira xintaho.—“ Tonne Hajajora xinta ikkino seera Haaru Gondoori giddo xawinsoonnihu hiittoonniiti?” yaannoha lai.

 Yesuusi, Tonne Hajajono mitteenni amadinohu Muse Seeri gudisame xintaminohu lame qara hajajo aana ikkinota rosiisino. Togo yiino: “‘Mooticha Maganokki woꞌmu wodanikkinni, woꞌma lubbokkinni, woꞌma hedokkinni baxi!’ . . . Baalanta roortannotinna umi hajajo tenneeti. Tenne labbannoti layinki hajajo, ‘Olliichokki umikki gede assite baxi!’ yitannote. Seerunna himanaanote rosiishshi baalu xintaminohu tenne lamente hajajo aanaati.” (Maatewoosi 22:34-40) Konni daafira, Kiristaanu Muse Seera agadha hasiissannonsakkiha ikkirono, Maganonna manna baxxanno gede hajanjoonninsa.—Yohaannisi 13:34; 1 Yohaannisi 4:20, 21.