Batinyu manni, ‘Qullaawa Maxaafa ayi borreessinoro afa didandiinanni’ yinanna macciishshino. Ikkollana, Qullaawu Maxaafi roore anga giddosi noo sokka ayi borreessinoro xawise kulanno. Duucha Qullaawu Maxaafi maxaaffara hanafote, “Nehimiya coyiꞌrino qaale,” “Isayaasi laino ajuuja,” hattono “Iyueeliwa Kaaliiqiwiinni dayinohu himanu qaali” yitanno gedee qaalla no.—Nehimiya 1:1, NW; Isayaasi 1:1, NW; Iyueeli 1:1.

 Roore Qullaawu Maxaafi borreessaano, mittichu halaalaanchu Magani Yihowa suꞌminni borreessitinotanna isi massaginonsata xawisse coyidhino. Ibiraawootu Afiita Qullaawa Borro borreessitino masaalaano 300 saꞌꞌanno bayicho ‘Yihowa togo yiino’ yitino. (Amootsi 1:3; Mikiyaasi 2:3; Nahoomi 1:12) Maganu sokka mite borreessaanora iillitinohu kayinni sokkaasinete widoonniiti.—Zakkaariyaasi 1:7, 9.

 Qullaawa Maxaafa 1,600 diri giddo 40 meddi yaanno manni borreessino. Maganu, kuri giddo mitootu haammata maxaafa borreessitanno gede assino. Isinni Qullaawu Maxaafi 66 maxaaffa amadino. Kuri giddo, Ibiraawootu Afiiti Qullaawa Borro (woy batinyu manni yaanno garinni Akkalu Gondoori) 39 maxaaffa amaddino; Giriikete Afiiti Qullaawa Borro (woy mitu manni yaanno garinni Haaru Gondoori) kayinni 27 maxaaffa amaddino.