Ati Yihowa Farciꞌraasinchootiro, polise dukkisseennahe minunni mine hadhe sabbakattoha ikkoommero hiitto ikkattoha lawannohe? Mayikironeezhiyaho, Jooseefi yinanni rodiira 2017nni togoori tuncu yiinosi. Isinna wole sase Yihowa Farciꞌraasine xeertote noo giddichuwara sabbakate baxxino zamacha fulte no.

 Lee saate balla, shoolunku Yihowa Farciꞌraasine 600 manni heeꞌrannota mitte shiima giddicho iillitu. Giddichote gashshaanchi baaru qaccera keere haaꞌrinsa. Jooseefi hakkiinni aane ikkinore kulanni togo yiino: “Giddichote gashshaanchi, mine baala polisete makeeninni haꞌra dandiitinanni yiinke. Tini dhagge ikkitinonkeha ikkirono, makeenu hasiisannonkekkita ayirrinyunni kullummo. Minunni mine alba ronsoommo garinni haꞌne sabbaka hasiꞌnoommo.”

 Hakkiinni kuri roduuwi dandaaminsa deerrinni lowo mannira sabbakate lekkatenni haꞌra hanaffu. Insa togo yitino: “Hakko heeꞌranno manni wosina adha baxannoho; qoleno sokkanke macciishsha hasiꞌrino. Hakko daafira, mitto mittonka mine hendoommo yannanni saꞌne keeshshinoommo.”

 Hakko barranni hawarro balla, polisete makeeni Jooseefi noowa lame hige mare sai; tenne sayikkimeeshsho mariti isi noowa uurri. Hakkiinni polisootu Jooseefi gatino mine makeenunni massineemmohe yitusi. Jooseefi togo yiino: “Deeꞌni yuummo. Insa kayi ‘Kawiinni haꞌrate shiima yanna calla gatte nooꞌne daafira, gattino minna haaꞌne haꞌneemmohe’ yite qarrissue. Hakkawote mare hasaawisoommokkiti batinye minna gatte nooe daafira, insa yitinore wirro giwa didandoommo. Mittu mittunku mini mulira marreemmo woyite, polisootu qaete anni suꞌma kultannoe; qoleno mare saanqa ganganeenna fanannohu hoogiro, qaete anna xurumba ufuunfe woshshineemmohe yitue.

 “Insa kaaꞌlonni, baalunku mini manna marre hasaawisa dandiinoommo. Mannaho lowo borro uyinoommo; qoleno hasatto noonsare wirro marre hasaawisate dinye amandoommo.”

 Polisootu, “Mannaho dancha duduwo iillinshoommo daafira lowo geeshsha hagiidhinoommo” yite Jooseefira kultino. Arrishsho eꞌara kaꞌeenna roduuwu alba qaera wodhituta, polisootu Qullaawu Maxaafi aana xintantino borronke anga adhite, muushshi yitanni, anga kayisse roduuwa keerunni yitinonsa.