Mittu manchi 2011nni, Ertirunni darame Noorweyete gobba haꞌrino. Hakkiicho Yihowa Farciꞌraasine hasaawissusita, gobbasira noo waro Yihowa Farciꞌraasine ledo xaade egenninota kulinsa. Kuni manchi Ertiraho olamaancho ikke heeꞌre, ammanansa daafira usurroonniri Yihowa Farciꞌraasine lowo geeshsha beebba assininsarono olaho anga wodhitannokkita laoommo yiino.

 Hakkiinni hedeweelcho iso umosi usuru minira eessinoonni. Kuni manchi Ertiraho Phaawuloosi Iyyaasu, Negede Tekilemaariyaaminna Yisaaqi Mogesi yinanniri sase Yihowa Farciꞌraasine ledo usuramino; kuri 1994nni hanaffe ammanansa daafira usurroonnireeti.

 Kuni manchi usuru mine, Yihowa Farciꞌraasine wolu mannira rosiissannore insa uminsa assitannota illesinni laino. Ammanantinore ikkitinota, wole agurina sagalensa wolu usuranyira iillishidhe ittannota laino. Qoleno ledosi usurantinori kuri Yihowa Farciꞌraasine Qullaawa Maxaafa barru baala mitteenni xiinxallitanno garanna wolootano xiinxallote koyissanno gara illesinni laino. Insa ammanansa kaadduro usuru mininni fultinanni yininsata, maahoyye diyitino.

 Kuni manchi tenne baala lae lowo geeshsha dhagge assiꞌrino; isi hakkiinni Noorweyete gobba haꞌriti, Yihowa Farciꞌraasinera togooti kaajjado ammana heedhinonsahu hiittoonniitiro afa hasiꞌrino. Hakko daafira, Yihowa Farciꞌraasine shiqqe hasaawissusita, isi hakkawoyintenni insa ledo Qullaawa Maxaafa xiinxallanna gambooshshensa haꞌra hanafino.

 Kuni manchi Wocawaaro 2018nni, cuuame Yihowa Farciꞌraasincho ikkino. Isi xa Ertirunninna Sudaanetenni daanno manna xaade hasaawisatenna insarano kaajjado ammana heedhannonsa gede Qullaawa Maxaafa xiinxallisate dandaamisire baala assanni no.