I lenei taimi ua taatele ai le faaaogāina o le tekinolosi, atonu e faatalitalia oe e lou pule, o ē tou te faigaluega faatasi, po o tagata e faaaogāina lau auaunaga, ina ia e galue mo le 24 itula, 7 aso i le vaiaso. O lenā mea, e faigatā ai ona faapaleni le olaga i le aiga ma le galuega, le tuueseeseina ma le faamuamua o mea e sili ona tāua i lou olaga, e aofia ai lau faaipoipoga.

•  Mea e tatau ona e iloa

•  Fesoasoani mo le paleni o le galuega ma le olaga i le aiga

•  Tala a isi ulugalii

•  Fesili e talanoa ai

•   E mafai e le faatekinolosi ona lē paleni ai lau galuega ma lau faaipoipoga. O telefoni, imeli ma text e te mauaina i le taimi ua manava ai, e tai pei o se afi ua mumū e tatau ona vave tapē.

   “O se mea masani le alu i le fale pe a manava ma faaalu le taimi ma lou aiga, ae ua foliga o se mea ua lē mafai ona fai i le taimi lenei, ona o le uaʻi atu i imeli ma telefoni mai i le galuega. Ae ua lē ano ai i lau faaipoipoga.”—Jeanette.

•   Ina ia faapaleni lau galuega ma le olaga i le aiga, e tatau ona e tausolomua e gaoioi. Pe a lē faia sau faasologa, o le a faalavelave la lau galuega i lau faaipoipoga.

   “O lau paaga faaipoipo e muamua lava aafia ona e te manatu i ai e malamalama i le mea ua tupu, ma o le a ia faamagaloina oe. E mafai a ona ma faatasitasi i se isi taimi.”—Holly.

•   Ia faamuamua lau faaipoipoga. Ua faapea mai le Tusi Paia: “O ē ua faatasia e le Atua, aua neʻi tuueseeseina e se tagata.” (Mataio 19:6) Afai e te lē faatagaina se tagata e “tuueseeseina” oulua ma lau paaga faaipoipo, aiseā la e te faatagaina ai lau galuega e faia faapea?

   “E manatu nisi tagata e faaaogāina lau auaunaga, e tatau ona latou fesootaʻi atu iā oe i so o se taimi latou te mananaʻo ai, ona o loo latou totogiina oe. O le iloa e tatau ona faamuamua laʻu faaipoipoga, ou te faailoa atu ai iā i latou, ou te lē avanoa i aso ou te mālōlō ai ae o le a ou fesootaʻi vave atu i se isi taimi.”—Mark.

   Ia fesili ifo, ‘Po o faaalia atu i aʻu gaoioiga e sili atu ona tāua iā te aʻu laʻu faaipoipoga nai lo o laʻu galuega?

•   Ia ʻalofia le faia o se galuega pe a manaʻomia. Ua faapea mai le Tusi Paia: “E iai le atamai i ē e faamaulalo.” (Faataoto 11:2) O le faamaulalo e te teena ai le faia o se galuega, pe tuuina atu foʻi i se isi e na te faia.

   “O aʻu o se palama. Pe a manaʻomia vave e se tasi laʻu fesoasoani, e na te lagona le popole. Pe a ou lē faia i le taimi e manaʻo ai, ou te tuuina atu i se isi tagata e na te faia.”—Christopher.

   Ia fesili ifo, ‘Po ou te lotomalie e teena galuega faaopoopo? Po o le taliaina o na galuega faaopoopo e lagona ai e laʻu paaga faaipoipo loʻu faatalalē i ona manaʻoga? O le ā se manatu o laʻu paaga faaipoipo?’

•   Ia faatulaga se taimi e faatasitasi ai. Ua faapea mai le Tusi Paia: “E iai le taimi e atofaina mo mea uma.” (Failauga 3:1) E tāua le faatulaga o se taimi e faatasitasi ai ma lau paaga, pe a pisi tele lau galuega.

   “E masani lava pe a pisi tele, e ma te malilie ai e faaalu faatasi se taimi na o maʻua. E tusa lava pe e na o le ō i le afiafi e aai i se faleʻaiga pe savalivali i le matafaga.”—Deborah.

   Ia fesili ifo: ‘Pe ou te faatulagaina se taimi ina ia ou uaʻi atoatoa atu ai i laʻu paaga faaipoipo? O le ā se tali a laʻu paaga faaipoipo?’

•   Ia tapē masini faaonapōnei. Ua faapea mai le Tusi Paia: ‘Ia faamautinoa o mea e sili ona tāua.’ (Filipi 1:10) Pe e mafai ona tapē i nisi taimi lau masini faaonapōnei ina ia aua ai neʻi faalavelave lau galuega i lou aiga?

   “Ou te taumafai malosi e tuu galuega i le taimi ua manava ai. I lenā taimi, ou te tapēina ai laʻu telefoni.”—Jeremy.

   Ia fesili ifo, ‘Pe e tatau ona tī pea laʻu telefoni ina ia fesootaʻi mai ai loʻu pule po o i latou o loo faaaogāina laʻu auaunaga? O le ā se tali a laʻu paaga faaipoipo?’

•   Ia magafagafa. Ua faapea mai le Tusi Paia: “Ia iloa e tagata uma lo outou magafagafa.” (Filipi 4:5) O le mea moni, e ono avea le galuega ma faalavelave i lau faaipoipoga. O se faataʻitaʻiga, atonu o le ituaiga galuega o loo faigaluega ai lau paaga e tatau a ona fesootaʻi atu iai i le taimi e manava ai. O lea, ia magafagafa ina ia aua le soona tagisā i le taimi o lau paaga nai lo le mea e tatau ai.

   “E iai se tamaʻi pisinisi a laʻu tane. E masani ona iai galuega e manaʻomia vave ai o ia i taimi manava. Ou te lē fiafia ai, ae pe a faatusatusa i le tele o le taimi o loo ma faaaluina faatasi, o lea lava la e sologa lelei mea uma.”—Beverly.

   Ia fesili ifo, ‘Pe ou te faaalia le magafagafa i le tele o galuega o loo feagai ma laʻu paaga ma lē soona tagisā ai i lona taimi? O le ā se tali a laʻu paaga faaipoipo?’

 Muamua, e mafai ona iloilo e le tagata lava ia fesili o loo mulimuli mai. Ona talanoa faatasi lea o a oulua tali.

•   Pe e iai se taimi na faitio ai lau paaga ona o le aumai o au galuega e fai i le fale? Afai o lea, pe e te ioe i ai?

•   O ā ni vaega patino e te manatu e mafai ona faaleleia ina ia paleni ai lau galuega ma le olaga i le aiga?

•   Pe na iai se taimi na e manatu ai e lē mafai e lau paaga ona iai se vaaiga paleni i galuega totogi? Afai o lea, o le ā se faataʻitaʻiga?

•   O ā ni suiga e te manaʻo e fai e lau paaga ina ia iai se vaaiga paleni i galuega ma le olaga i le aiga?