O nisi ulugalii e foliga mai e lē mafai ona iai se la faiā lelei. E manatu e sili ona lelei mo le la fanau le tatala o le faaipoipoga nai lo o le nonofo faatasi o ni mātua femisaaʻi. Ae o le ā le mea moni?

•  O ā aafiaga o le tatalaina o faaipoipoga i le fanau?

•  Pe e fiafia le fanau pe a tatala le faaipoipoga a mātua?

•  O le ā e tatau ona ou iloa i le tausia o le fanau e ni mātua ua tatala le faaipoipoga?

•  Pe e iai se auala e sili atu ona lelei?

 Ua faailoa mai i ni suʻesuʻega, e matuā tugā aafiaga o le tatalaina o faaipoipoga i fanau. O fanau ua tatala faaipoipoga a o latou mātua, e masani ona:

•   feagai ma lagona ita, popole ma le mafatia

•   latou atiaʻe uiga leaga

•   faigatā ona aʻoaʻoina mea i le aʻoga ma lē toe alu ai i le aʻoga

•   faigofie ona maua i maʻi

 E lē gata i lea, e toʻatele tamaiti e tuuaʻia i latou lava ona ua tatala faaipoipoga a o latou mātua. E manatu o i latou le māfuaaga ua tatala ai faaipoipoga a o latou mātua, pe manatu foʻi sa tatau ona latou taofia mātua mai i le faia faapea.

 O faigatā o loo fesagaʻia e tamaiti ua tatala faaipoipoga a o latou mātua, atonu e faaauau atu lava i le taimi e avea ai i latou ma tagata matutua, lea e oo ai iā i latou lagona o le lē aogā ma le lē talitonuina o isi. E telē foʻi le avanoa e tatala ai a latou faaipoipoga pe a tutupu ai ni faafitauli.

 Le manatu tāua: E ui na manatu nisi ulugalii e sili ona lelei mo le la fanau le tatala o le faaipoipoga, ae e lē o lagolagoina e suʻesuʻega lenā manatu. Na tusi Penelope Leach a, o se tagata e poto faapitoa i le tausia o tamaiti, “E iai aafiaga leaga o talagā faaipoipoga i tamaiti.”

 Mataupu silisili o le Tusi Paia: “Ia vaavaai ma le naunau e lē gata i au lava mea, ae i mea foʻi e lelei ai isi.”—Filipi 2:4.

 E ioe iai nisi. Ae ia manatua, e lē tutusa manaʻoga o mātua ma fanau. O se tagata e manaʻo e tatala lana faaipoipoga, e manaʻo e ola i se olaga fou. Ae e masani lava e manaʻo se tamaitiiti e ola i le olaga na ola faatasi ai ma ona mātua.

 Ina ua uma ona iloiloina e tusitala o le tusi The Unexpected Legacy of Divorce le faitau afe o ulugalii ua tatala faaipoipoga, na latou taʻua ai: “E lē o faapea mai tamaiti e fiafia. Nai lo lea, ua latou faapea mai, ‘O le aso na tatala ai le faaipoipoga a oʻu mātua, na muta ai loʻu olaga o se tamaitiiti.’” Na taʻua atili i le tusi, e vaai na tamaiti i le lalolagi “e lē maufaatuatuaina, o se nofoaga e sili ona mataʻutia ona e lē o mafai ona malupuipuia ai le faiā e sili ona māfana i o latou olaga.”

 Le manatu tāua: E ono lē mafai ona maua e tamaiti le fiafia pe a tatala le faaipoipoga a o latou mātua.

 Mataupu silisili o le Tusi Paia: “O le loto e momomo e mamago ai ivi.”—Faataoto 17:22.

 E taumafai nisi mātua ua tatala a latou faaipoipoga e tausia uma e i laʻua le la fanau, ma le manatu e tutusa lelei ai o la tiute tauave e fai i le tausia aʻe o le fanau. Peitaʻi, e faigatā lenā mea. Ua faaalia i suʻesuʻega, o mātua ua tatala a latou faaipoipoga e masani ona:

•   itiiti le taimi e latou te faaaluina ma le fanau

•   feteenaʻi tapulaa e la te aʻoaʻoina

•   faataga tamaiti e fai mea e mananaʻo ai ona o lagona nofosala po o le lē lavā

 O se tamaitiiti ua tatala le faaipoipoga a ona mātua, e manatu e lē manaʻomia ona faalogo i mātua. Ae o le mea moni, ua lē taulau ona mātua i le tausia o le tāua o le tautoga o le faaipoipoga po o le maufaatuatuaina e le tasi o le isi. Atonu e manatu le tamaitiiti, ‘Aiseā la e usitaʻi ai fua?’

 Le manatu tāua: E faigatā ona tausia e ni mātua ua tatala le faaipoipoga se fanau. Ae e sili atu ona faigatā mo le fanau lenā tulaga.

 Mataupu silisili o le Tusi Paia: “Aua le faaonoono i a outou fanau, ina neʻi lotovaivai i latou.”—Kolose 3:21.

 E masani a, e tele taumafaiga e fai e mātua ua tatala le faaipoipoga ina ia ola ai i se olaga fou. Ae e sili atu ona lelei pe ana fai na taumafaiga ina ia faaleleia ai le faaipoipoga. Ua faapea mai le tusi The Case for Marriage, “O le iai o faafitauli i le faaipoipoga, e lē faapea ai e lē mafai ona faaleleia na faafitauli. E iai taimi o le a maua ai e se ulugalii le tele o le fiafia pe a taumafai e nonofo faatasi pea e ui i faafitauli.” O le a lelei mea uma mo le fanau pe a nonofo faatasi mātua.

 E lē uiga ai e lē tatau lava ona tatala se faaipoipoga. O le mea moni, o loo faataga e le Tusi Paia le tatala o le faaipoipoga pe a faitaaga se tasi o le paaga. (Mataio 19:9) Peitaʻi o loo taʻua i le Tusi Paia, “o le tagata e iai le utaga mamao, e na te iloilo lelei ona laasaga.” (Faataoto 14:15) E tatau i tane ma avā ua faalētonu a latou faaipoipoga ona iloilo mea moni uma, e aofia ai aafiaga o talagā faaipoipoga i a latou fanau.

 E tele atu mea e manaʻomia ina ia faaleleia ai se faaipoipoga nai lo le tau ina nonofo faatasi. Ua saunia e le Tusi Paia fautuaga e sili ona lelei e fesoasoani i tane ma avā, e atiaʻe ai uiga e manaʻomia ina ia maua ai se faaipoipoga fiafia ma tumau. E lē faateʻia i tatou i lenā mea, ona na faatulagaina e Ieova o le Tusitala o le Tusi Paia le faaipoipoga.—Mataio 19:4-6.

 Mataupu silisili o le Tusi Paia: “O aʻu o Ieova, lou Atua, o Lē o loo aʻoaʻo oe i mea e aogā iā te oe.”—Isaia 48:17.