Ua na o le nofo lava o lau tama i le fale e leai se isi mea e mafai ona fai, ma ua ia faailoa mai ua ia lagona le tuua toʻatasi. A o leʻi ki le TV e matamata ai o ia, pe fai atu foʻi e fai lana taaloga vitiō lea e fiafia i ai, o nisi nei o vala e manaʻomia ona iloilo.

•   O le ituaiga faafiafiaga ma le tele e faia ai, e ono atili ai ona lagona le tuua toʻatasi. Ua faapea mai se tamā e igoa iā Robert: “O nisi tamaiti, e manatu o le olaga i aso faisoo e lagona ai le tuua toʻatasi, pe a faatusatusa i le matamata i le TV pe taalo i taaloga vitiō. E leai se fiafia e maua mai i mea masani o le olaga.”

   E ioe i ai lana avā o Barbara, o lē na faapea mai: “O le olaga moni e manaʻomia ai le mafaufau lelei ma taumafaiga, ma e masani e lē vave ona maua ni iʻuga. Ae e lē fiafia i ai tamaiti ia e faaalu le tele o lo latou taimi e matamata ai i le TV pe taaalo i taaloga vitiō.”

•   O le faaalu o le tele o le taimi i luga o le initaneti e mafai ona oo ai ni lagona lē lelei iā te oe lava. E mafai ona manatu se talavou e lē o fiafia lona olaga, a o matamata atu i ata ma vitiō o mea o loo faia e ana uō. Ua faapea mai se teineitiiti e igoa iā Beth: “E faigofie lava ona mafaufau e faapea, ʻO loo fiafia isi tagata uma, ae o lea ou te nofo i le fale.’”

   E lē gata i lea, o le faaalu o le tele o le taimi i luga o le initaneti, e uma ane e na o le lagona ai o le lē faamalieina ma le tuua toʻatasi. Ua faapea mai se tama talavou e igoa iā Chris: “E ono maua ai ni au mea e fai, ae e leai ni tomai aogā e maua mai ai.”

•   O le leai o ni mea e fai e mafai ona avea o se avanoa lelei. Ua faapea mai se tinā e igoa iā Katherine, o le leai o ni mea e fai, e maua ai e le fanau le avanoa e atiaʻe ai o latou tomai. O se faataʻitaʻiga, ua faapea atili mai Katherine: “E mafai e le tamaitiiti ona faaaogā se pusa ma faaata e pei o se taavale, se vaa, po o se vaalele. E mafai ona ia faia se faleʻie e ala i le ufiufi o ni nofoa i se ʻie ʻafu.”

   I se itu lelei, ua faamatalaina e Sherry Turkle o se fomaʻi o le mafaufau le lagona lē fiafia ona o le leai o se mea e fai, o se “avanoa e atiaʻe ai ou tomai.” a E lē o se lagona la e faapea atu e leaga. O le mea moni ua faapea mai le tusi Disconnected: “E pei lava ona aogā le siisii mea mamafa i maso o lou tino, e faapena le aogā o le leai o ni mea e fai, i lou mafaufau.”

 O le manatu tāua: Ia vaai i lagona lē fiafia o tamaiti ona o le leai o ni mea e fai o se avanoa e atiaʻe ai o latou tomai, ae e lē o se faafitauli.

•   Pe a talafeagai, ia faataga tamaiti e taaalo i fafo o le fale. Ua faapea mai Barbara lea sa taʻua muamua: “E mataʻina le auala e mafai ai e le susulu mai o le lā ma le ʻea fou ona aveesea ai lagona tuua toʻatasi. O le taimi lava e taaalo ai a tatou fanau i fafo o le fale, ona amata loa lea ona faaaogā o latou mafaufau!”

   Mataupu silisili o le Tusi Paia: “E iai le taimi e atofaina mo mea uma, . . . [o le] taimi e ʻataʻata ai ma le taimi e osooso ai.”—Failauga 3:1, 4.

   Mea e mafaufau i ai: O ā ni mea e mafai ona fai e laʻu fanau pe a ō i fafo ma le fale? Pe afai e lē mafai ona ō i fafo ma le fale, pe e iai ni mea e mafai ona latou faia i totonu o le fale e atiaʻe ai o latou tomai?

•   Fesoasoani i fanau ia faaalia le manatu mamafa i isi. Ua faapea mai se tinā e igoa iā Lillian: “O le moaina o le vao, saluina o le lapisi, po o le saunia o se meaʻai mo tatou uō ma asiasi i ai, o ni gaoioiga faapena e maua ai le olioli moni.”

   Mataupu silisili o le Tusi Paia: “E faatamaoaigaina le tagata limafoaʻi, ma o lē e na te matuā faasūsū isi, o le a matuā faasūsūina o ia.”—Faataoto 11:25.

   Mea e mafaufau i ai: E faapefea ona e fesoasoani i lau fanau ia maua le olioli i le faia o mea lelei mo isi?

•   Faataatia se faaaʻoaʻoga. O le auala e te talanoa ai e faatatau i mea fai i aso taʻitasi, e mafai ona aafia ai lau fanau. Ua faapea mai se tinā e igoa iā Sarah: “Pe a atagia atu i a tatou talanoaga e lē o fiafia o tatou olaga, ua tatou atiaʻe ai i fanau le faalogona tuua toʻatasi. Ae pe a atagia atu i a tatou talanoaga o loo tatou olioli i a tatou mea e fai i aso faisoo, o le a fesoasoani foʻi i le fanau ina ia maua ai lenā olioli.”

   Mataupu silisili o le Tusi Paia: “O lē ua lelei lona loto, e fai e lē aunoa lana faigaʻai.”—Faataoto 15:15.

   Mea e mafaufau i ai: O le ā le manatu o laʻu fanau a o faalogo o oʻu talanoa e faatatau i aʻu galuega i aso fai soo? O le ā le auala e latou te vāai o oʻu taulimaina ai faalogona o le tuua toʻatasi?

 Fesoasoani: Ia fesoasoani i lau fanau ia fai se lisi o mea e mafai ona fai e atiaʻe ai tomai. Ua faapea mai se tinā e igoa iā Allison: “E iai sa matou atigipusa e mafai e tagata uma o le aiga ona tusia o latou manatu ma tuu i ai.”