•   E fiafia lau paaga e fuafua lelei mea uma ae e te lē faapena.

•   E fiafia lau paaga e talanoa ma faifaimea ma isi, a o oe e te matamuli.

 Pe e iai se uiga o lau paaga e te lē fiafia i ai? O le uaʻi atu i lenā uiga e ono faaleagaina ai lau faaipoipoga. Ua faapea mai le Tusi Paia, “o lē e tautala soo i se mataupu ua ia talepeina faauōga.”—Faataoto 17:9.

 Nai lo o le faataga o lenā uiga e faatupu ai faafitauli i le vā o oe ma lau paaga, atonu e mafai ona e aʻoaʻoina le auala e maua ai se vaaiga saʻo e faatatau i lenā uiga.

I lenei mataupu

•  Se vaaiga saʻo i uiga o lau paaga e te lē fiafia i ai

•  Tala a isi ulugalii

•  Fesili e talanoa ai

 Atonu o le uiga e te lē fiafia i ai i lau paaga, e ono fesootaʻi atu i se uiga e te fiafia i ai. Ia mātau faaaʻoaʻoga nei e tolu:

 “O se masaniga i laʻu tane le faifaiaga i le faia o se mea pe sauni foʻi e ō i se mea. Peitaʻi o lenā uiga e na te faaalia ai le onosaʻi i so o se mea, e oo foʻi iā te aʻu. E iai taimi ou te lē fiafia ai i lona uiga o le faifaiaga, ae o le uiga foʻi lenā ou te alofa ai iā te ia.”—Chelsea.

 “E manaʻo laʻu avā e fuafua lelei mea uma e oo a i mea lāiti, ma ou te lē fiafia ai i lona uiga lenā. Peitaʻi, o lona uaʻi atu e oo a i mea lāiti e iloa ai lona nofosauni i so o se mea.”—Christopher.

 “E iai taimi e faalēano ai laʻu tane i mea, ma ou te lē fiafia ai. Peitaʻi, o lona uiga foʻi lenā na ou tosina ai iā te ia i le taimi muamua. Ou te talisapaia lona uiga o le toʻa i tulaga e lagona ai le popole.”—Danielle.

 Ua aʻoaʻoina e Chelsea, Christopher, ma Danielle o itu e lelei ai ma itu e lē lelei ai se paaga, o vala eseese ia o se uiga e tasi. Ona o lenā tulaga, e lē mafai ona aveese itu lē lelei ae tuu itu e lelei ai, e pei lava ona lē mafai ona aveese se itu se tasi o se tupe siliva.

 Peitaʻi, e iai nisi uiga e leai se itu e lelei ai. O se faataʻitaʻiga, ua faapea mai le Tusi Paia e iai tagata “e itaitagofie.” (Faataoto 29:22) Pe afai e aafia se tasi i lenā uiga, e tatau ona ia liaʻiese le “ita umi, ma le itaitagofie, ma le lotoa, ma le soona ʻeʻē, ma upu masoā.” a—Efeso 4:31.

 Afai e iai se uiga e te lē fiafia i ai, ia mulimuli i le fautuaga lenei a le Tusi Paia: “Ia faaauau ona onosaʻi le tasi i le isi . . . pe afai ua faia e se tasi se mea e tigā ai.”—Kolose 3:13.

 E lē gata i lea, ia taumafai e uaʻi atu i le itu e lelei ai lenā uiga, lea atonu na e tosina ai i lau paaga i le taimi muamua. Ua faapea mai se tane e igoa iā Joseph, “O le uaʻi atu i se uiga e te lē fiafia ai, e tai pei o le mātauina o sina vaega o se taimane nai lo o le uaʻi atu i lona matagofie.”

 Muamua, e mafai ona iloilo e le tagata lava ia fesili o loo mulimuli mai. Ona talanoa faatasi lea o a oulua tali.

•   Pe e iai se uiga o lau paaga e te manatu o loo māfua ai faafitauli i le lua faaipoipoga? Afai o lea, o le ā lenā uiga?

•   Po o lenā uiga o se uiga leaga, po ua na o se uiga e te lē fiafia i ai?

•   Pe e iai se itu e lelei ai lenā uiga? Afai e iai, o le ā lenā itu lelei, ma aiseā e tāua ai iā te oe?