E tolu uiga autū o loo faaaogā ai le upu “lagi” i le Tusi Paia: (1) o le lagi; (2) le nofoaga lē vaaia o loo iai foafoaga agaga; ma le (3) o se faailoga o le tulaga maualuga po o se tulaga faaeaina. I lenei tulaga o le a fesoasoani mai le siʻomaga o lenei manatu e iloilo ai le malamalamaga saʻo. a

1.   O le lagi. O lenei faaupuga, e uiga atu ai “le lagi” i le vanimonimo, lea e feagiaʻi ai le savili, felelei ai manulele, e iai foʻi ao lea e maua ai le timu, o aisa faapea foʻi faititili. (Salamo 78:26; Faataoto 30:19; Isaia 55:10; Luka 17:24) E uiga atu foʻi i le vateatea, le nofoaga lea o loo iai ʻle lā, le masina ma fetu.’​—Teuteronome 4:​19; Kenese 1:1.

2.   Le nofoaga lē vaaia o loo iai foafoaga agaga. O le upu “lagi” e faasino atu i le lagi e lē vaaia, po o le nofoaga lē vaaia o loo iai foafoaga agaga, o se nofoaga e maualuga atu ma e i fafo atu o le vateatea. (1 Tupu 8:​27; Ioane 6:​38) O lenei lagi e lē vaaia, o loo afio ai Ieova le Atua o ia “o le Agaga,” faapena foʻi agelu na ia foafoaina. (Ioane 4:​24; Mataio 24:36) Ae e iai taimi e faasino atu ai i le lagi, e fai ma sui o agelu faamaoni “le faapotopotoga a le ʻaupaia.”​—Salamo 89:​5-7

    E faaaogā foʻi i le Tusi Paia le upu “lagi,” e faasino faapitoa atu i le vaega o le nofoaga lē vaaia o loo iai foafoaga agaga, lea o loo afio ai Ieova, o lona “afioaga tumau.”(1 Tupu 8:​43, 49; Eperu 9:​24; Faaaliga 13:6) Mo se faaaʻoaʻoga, na taʻua i le Tusi Paia ua lafo mai Satani ma ana temoni mai le lagi, e leʻi toe faatagaina e ulu atu i le nofoaga o loo afio ai Ieova. Peitaʻi, o loo tumau pea ona avea i latou ma foafoaga agaga.​—Faaaliga 12:​7-9, 12.

3.   Se faailoga o le tulaga maualuga po o se tulaga faaeaina. E faaaogā i le Tusi Paia le upu “lagi” e fai ma sui o se tulaga maualuga, ma e masani ona fesootaʻi atu i le tulaga pule. O na tulaga e mafai ona faataunuuina e:

   •   Ieova lava ia o Sē e Pule Silisili Ese i le aoao o mea.​—2 Nofoaiga a Tupu 32:20; Luka 15:21.

   •   Le Malo o le Atua, o le faigāmalo lea o le a suia malo faaletagata. O loo faasino atu le Tusi Paia i lenā Malo, o le “lagi fou.”​—Isaia 65:17; 66:22; 2 Peteru 3:​13. b

   •   Kerisiano o ē e ui o loo ola i lalolagi ae ua iai le faamoemoe e ō i le lagi.​—Efeso 2:6.

   •   Faigāmalo faaletagata ua faaeaina e i latou i latou lava i a latou mataupu fai.​—Isaia 14:12-​14; Tanielu 4:​20-​22; 2 Peteru 3:7.

   •   Agaga leaga o loo pulea le lalolagi i aso nei.​—Efeso 6:​12; 1 Ioane 5:​19.

E faapeʻī le lagi?

 O le nofoaga lē vaaia o loo iai foafoaga agaga o se nofoaga e tele galuega e faia ai. O loo faatumulia i le faitau miliona o foafoaga agaga, o ʻē o loo faataunuuina le afioga a Ieova.’​—Salamo 103:20, 21; Tanielu 7:​10.

 O loo faamatalaina i le Tusi Paia le lagi o se nofoaga e “matuā pupula” le malamalama e iai. Na maua e le perofeta o Esekielu se faaaliga mai le lagi na faailoa mai e ala i le “pupula,” ae o le taimi e tasi na vaaia ai foʻi e Tanielu se faaaliga e aofia ai le ʻafi o loo tafe mai.’ (Esekielu 1:​26-​28; Tanielu 7:​9, 10) E paia pe mamā, ma matagofie le lagi.​—Salamo 96:6; Isaia 63:15; Faaaliga 4:​2, 3.

 E mataʻina faamatalaga uma ua faailoa mai e le Tusi Paia e uiga i le lagi. (Esekielu 43:​2, 3) Peitaʻi e lē mafai e le tagata ona malamalama atoatoa e uiga i le lagi, ona e lē mafai ona tatou vāai atu i ai.