Ioe, e iai moni lava le Tiapolo. O ia o le “pule o le lalolagi,” o se foafoaga agaga na avea ma sē e leaga ma fouvale i le Atua. (Ioane 14:30; Efeso 6:11, 12) Ua faaalia mai le Tusi Paia uiga o le Tiapolo, i igoa nei ma o latou uiga:

•   Satani, o lona uiga o “Lē e tetee.”—Iopu 1:6.

•   Tiapolo, o lona uiga o “Lē e taufaaleaga.”—Faaaliga 12:9.

•   Gata, o loo faaaogā i le Tusi Paia e uiga atu i “Lē e taufaasesē.”—2 Korinito 11:3.

•   Lē e faaosooso.—Mataio 4:3.

•   Pepelo.—Ioane 8:44.

E lē na o se uiga leaga

 E manatu nisi o Satani le Tiapolo ua na o se uiga leaga e i totonu o i tatou. Peitaʻi, o loo faamauina i le Tusi Paia se talanoaga a le Atua ma Satani. E lelei atoatoa le Atua, e lē mafai la ona ia talanoa i se uiga leaga o loo i totonu iā te ia lava. (Teuteronome 32:4; Iopu 2:1-6) E lē gata i lena, na tofotofoina foʻi e Satani Iesu, o sē e lelei atoatoa. (Mataio 4:8-10; 1 Ioane 3:5) O lea, ua faaalia mai e le Tusi Paia, e iai moni lava le Tiapolo, ae lē na o se uiga leaga.

 Pe e tatau ona faateʻia i tatou i le toʻatele o tagata e lē talitonu e iai moni lava se Tiapolo? E leai, auā ua faapea mai le Tusi Paia e faasesēina e Satani tagata ina ia taulau ai lona sini. (2 Tesalonia 2:9, 10) O se tasi o ana mailei o le faatauasoina o manatu o tagata e faatatau iā te ia.—2 Korinito 4:4.

Tala fatu: O Lusifelo o le isi igoa mo le Tiapolo.

 Mea moni: O le upu Eperu ua faaliliuina i nisi Tusi Paia i le “Lusifelo,” o lona uiga o “lē ua susulu atu.” (Isaia 14:12) Ua faaalia i le siʻomaga o le mau, e uiga atu lenei upu i le ituaiga, po se aigātupu o Papelonia, lea o le a faalumaina e le Atua, ona o lona faamaualuga. (Isaia 14:4, 13-20) O le faaupuga “o lē ua susulu atu” na faaaogā e faifai ai i le aigātupu o Papelonia ina ua faatoʻilaloina.

Tala fatu: E faaaogā e le Atua Satani e tofotofo ma “faamasinoina ai tagata.”

 Mea moni: O le Tiapolo o le fili o le Atua, ae lē o sana auauna. E tetee ma tuuaʻia pepelo e Satani le Tiapolo auauna a le Atua.—1 Peteru 5:8; Faaaliga 12:10.