I le taeao o le Aso Gafua, Oketopa 10, 2022, na faapāpā ai e Rusia ni pomu i aai o Ukraine, e toe tali atu ai i se pomu na faapā i le lua aso talu ai, lea na faaleagaina ai se auala laupapa tāua na sosoo ai Crimea ma Rusia. E leʻi leva ona lapataʻia e ʻaufaipolotiki le oo mai o Amaketo, ae tutupu loa nei mea.

•   “E tatou te leʻi faatalitalia le ono oo mai o Amaketo talu mai le vaitaimi o [le Peresitene o Amerika o John F.] Kennedy ma le Cuban Missile Crisis. . . . I loʻu manatu, o le faaaogā o auupega faaniukilia e iʻu atu ai iā Amaketo.”—Peresitene o Amerika o Joe Biden, Oketopa 6, 2022.

•   “Ou te ioe o lea ua oo mai Amaketo, ona o loo aafia ai le lalolagi atoa.”—Peresitene o Ukraine o Volodymyr Zelensky, ina ua fesiligia i aafiaga o le faaaogāina o auupega faaniukilia, BBC News, Oketopa 8, 2022.

 Pe e iʻu atu iā Amaketo le ono faaaogāina o auupega faaniukilia? O le ā se manatu o le Tusi Paia?

 Leai. E na o le tasi le taimi o loo taʻua ai le upu “Amaketo” i le Tusi Paia i le Faaaliga 16:16. E lē faasino atu i se taua i le vā o malo, ae o le taua i le vā o le Atua ma “tupu o le lalolagi uma.” (Faaaliga 16:14) O le a faaaogā e le Atua le taua o Amaketo e faamutaina ai pulega a tagata.—Tanielu 2:44.

 Ina ia iloa atili po o le ā le aafiaga o le taua o Amaketo i le lalolagi, faitau i le mataupu O le ā le Taua o Amaketo?

 Leai. E ui e ono faaaogā e taʻitaʻi o Malo auupega faaniukilia i le lumanaʻi, ae o le a lē faatagaina e le Atua le faaleagaina o le lalolagi. Ua taʻua i le Tusi Paia:

•   “O le lalolagi e tumau lea e faavavau.”—Failauga 1:4.

•   “E fai lava le lalolagi mo ē e amiotonu, e nonofo ai pea i latou e oo i le faavavau.”—Salamo 37:29.

 Peitaʻi, ua faailoa mai i valoaga o le Tusi Paia ma mea o loo tutupu, ua toeitiiti ona iai lea o se suiga tele mo tagata. (Mataio 24:3-7; 2 Timoteo 3:1-5) Ia aʻoaʻoina le manatu o le Tusi Paia e faatatau i lo tatou lumanaʻi e ala i le suʻesuʻe faatasi le Tusi Paia ma se faiaʻoga.