E toʻatele tagata e manatu e lē mafai ona foʻia moni le faailoga lanu.

•    “O le faailoga lanu ua pei o se mea oona, ua faaauau ona faaleagaina ai faalapotopotoga ma olaga o tagata i aso faisoo i atunuu uma. O le faailoga lanu ua māfua ai ona faia e tagata faiga lē tonu i isi tagata.”—António Guterres, le Failautusi Aoao o Malo Aufaatasi.

 Po o le a iai se taimi e foʻia ai le faailoga lanu i le lalolagi aoao? O le ā le manatu o le Tusi Paia?

 O loo faailoa mai i le Tusi Paia le silafaga a le Atua i tagata mai i atunuu eseese ma lanu eseese.

•    ʻNa faia e le Atua nuu uma mai i le tagata e toʻatasi, ina ia nonofo i le fogāeleele uma o le lalolagi.’—Galuega 17:26.

•    “E lē faailoga tagata le Atua, ae o lē e mataʻu iā te ia i nuu uma lava ma faia le mea ua tonu, e talia e ia.”—Galuega 10:34, 35.

 Ua faailoa mai e le Tusi Paia e aiga tagata uma, ma e talia e le Atua tagata mai i ituaiga eseese uma.

 O le a aumaia e le Malo o le Atua, o se pulega i le lagi, le vaifofō moni o le faailoga lanu. O le a aʻoaʻoina e lenā pulega ona tagatānuu i le auala saʻo e feutagaʻi ai ma isi tagata. O le a aʻoaʻoina ai e tagata le auala e aveesea ai so o se faalogona o le faailoga lanu o loo iā i latou.

•    “O le a aʻoaʻoina le amiotonu e ē o loo nonofo i le laueleele.”—Isaia 26:9.

•    “O le a tupu le filemu mai i le galuega a le amiotonu moni, e tupu foʻi le toʻafilemu ma le saogalemu tumau mai i le amiotonu moni.”—Isaia 32:17.

 I aso nei, ua aʻoaʻoina e le faitau miliona o tagata mai i le Tusi Paia le auala e faaalia ai le faaaloalo ma le alofa i isi.

•    Ina ia iloa atili, faitau i le Ala Mai! i le mataupu “Pe e Iai se Vaifofō o le Faailoga Tagata?”

•    Ina ia iloa e mātua le auala e talanoa ai i fanau e faatatau i le faailoga lanu, ia faitau i le mataupu faa-Peretania “Talking to Children About Racism.”