I le tele o vaega o le lalolagi, e toʻatele tagata e faapea mai e mulimuli iā Iesu Keriso ae o loo matuā auai foʻi i faiga faapolokiti. O nisi e latou te taumafai e faalaulioa o latou talitonuga faaletapuaʻiga ma tapulaa tau amio e ala i le lagolagoina o se sui faatū po se vaega faaupufai. I le isi itu, e masani ona faaaogā e le ʻaufaipolotiki mataupu e faatatau i amioga ma mataupufai a tagata ina ia maua ai le lagolago a tagata lotu. E lē o se mea fou i taʻitaʻi lotu le tauvā i faiga palota ina ia maua ai se tofiga faapolotiki. Ae i nisi atunuu, e ono vaai tagata i se lotu “Kerisiano” o se faigāmalo, po o se lotu aloaʻia a se atunuu.

 O le ā sou manatu? Pe e tatau i tagata e mulimuli iā Iesu ona auai i faiga faapolotiki? E te maua le tali pe a iloilo le faaaʻoaʻoga a Iesu. Na ia fetalai: “Ua ou faia le faaaʻoaʻoga mo outou, o lea, e pei ona ou faia iā te outou, e tatau foʻi ona outou faia faapea.” (Ioane 13:15) Pe a tulaʻi mai ni mataupu faapolotiki, o le a le faaaʻoaʻoga na faataatia e Iesu?

 Leai. E leʻi faia sana vaega i mataupu faapolotiki a lenei lalolagi.

 E leʻi saʻilia e Iesu le pule e ala i faiga faapolotiki. Na ia teena le avea o ia ma pule i fagāmalo faaletagata ina ua ofo atu e Satani le Tiapolo iā te ia “malo uma o le lalolagi.” (Mataio 4:8-10) a I se tasi taimi, na uunaʻia malosi ai e tagata Iesu e avea ma taʻitaʻi faapolotiki, ina ua latou mātauina ona uiga lelei. Ua taʻua i le Tusi Paia: “Ua silafia e Iesu o le a ō mai i latou e puʻe iā te ia e fai ma tupu, ona maliu ese ai lea na o ia i le mauga” (Ioane 6:15) E leʻi lolo atu Iesu i le manaʻo o tagata. Nai lo lea, na ia teena le faia o sana vaega i faiga faapolotiki.

 E leʻi lagolagoina e Iesu ni mataupu faapolotiki. Mo se faataʻitaʻiga i aso o Iesu, e leʻi fiafia tagata Iutaia i le totogi atu o lafoga i le malo o Roma, ma na vāai i ai o se faigalētonu. Ina ua latou taumafai e iloa po fea le itu e lagolagoina e Iesu, e leʻi finau atu o ia pe tonu pe lē tonu foʻi le totogiina o na lafoga. Na ia fetalai atu: “Ia totogi atu mea a Kaisara iā Kaisara, a o mea a le Atua ia avatu i le Atua.” (Mareko 12:13-17) Na ia faaalia le solitū i lenā mataupu. Ae o lafoga ia na tapā mai e le pulega a le malo o Roma, lea e faaāta mai e Kaisara, sa tatau ona totogi atu iā i latou. I le taimi e tasi ua iloa ai, e lē o mea uma e tapā mai e faigāmalo e tatau ona usiusitaʻi i ai. E lē tatau i le tagata ona avatu i faigāmalo le mea e na o le Atua e tatau ona mauaina, e aofia ai le tuutoina atu ma le tapuaʻiga.—Mataio 4:10; 22:37, 38.

 Na lagolagoina ma aʻoaʻo atu e Iesu se faigamalo i le lagi, le Malo o le Atua. (Luka 4:43) E leʻi faia sana vaega i faiga faapolotiki ona na ia iloa e na o le Malo o le Atua e mafai ona faataunuuina le finagalo o le Atua i le lalolagi, ae lē mafai e faigāmalo a tagata. (Mataio 6:10) Na ia malamalama e lē ala mai i faigāmalo faaletagata le malo o Atua, ae o le a suia e le malo o le Atua na faigāmalo.—Tanielu 2:44.

 Leai. Na usiusitaʻi tagata na mulimuli iā Iesu i lana faatonuga “e lē o ni tagata o le lalolagi” i latou. (Ioane 15:19) Na latou mulimuli i lana faaaʻoaʻoga ma faaauau ona vavae ese mai i faiga faapolotiki a le lalolagi. (Ioane 17:16; 18:36) Na i lo le faia o se latou vaega i faigā faapolotiki, ae na latou faia le galuega na faatonu i latou e Iesu e fai, o le talaʻi ma aʻoaʻo atu le Malo o le Atua.—Mataio 28:18-20; Galuega 10:42.

 O le mea pito sili ona tāua i olaga o Kerisiano i le uluaʻi senituri, o le usiusitaʻi lea i le Atua. Na latou iloa foʻi e tatau ona faaaloalo i faipule silisili. (Galuega 5:29; 1 Peteru 2:13, 17) Na latou usitaʻia tulafono ma totogi lafoga. (Roma 13:1, 7) E leʻi faia sa latou vaega i faiga faapolotiki, ae na latou maua aogā atoatoa mai i le puipuiga faaletulafono ma auaunaga na saunia e faigāmalo.—Galuega 25:10, 11; Filipi 1:7.

 Ua faailoa manino mai e le Tusi Paia e leʻi auai Iesu ma i latou na mulimuli iā te ia i ni faiga faapolotiki. I le avea ai ma Kerisiano, o le māfuaaga lenā e solitū atoatoa ai Molimau a Ieova i le lalolagio atoa. I le pei o Kerisiano i le uluaʻi senituri, o loo latou faia le galuega na faatonu i latou e Iesu e fai, o le ‘talaʻiina atu o le tala lelei o le malo.’—Mataio 24:14.