Ae o le ā na taʻitaʻia atu ai aʻu o sē na muamua lagolagoina faiga faa-komunisi, e avea o se sui o se tapuaʻiga na manatu i ai le malo o se fili? Na faapefea foʻi i toleniga ma le alofa o Ieova ona fesoasoani iā te aʻu e faaleleia ai oʻu uiga, a o faagasolo faasalaga mamafa ma le ave faapagotaina?

 Na ou fanau i le 1930 i Tabani, o se nuu mativa i le itu i mātū o Moldova. Na galulue mamafa oʻu mātua i le tausia o se lafumanu ina ia tausia aʻe ai se fanau e toʻaono. E lē tele ni mea na matou ola ai. Na auai loʻu tinā i le lotu Orthodox i Rusia ae o loʻu tamā o le Katoliko. Na masani ona la tauaʻimisa ona o mea mataʻutia na faia e faifeʻau.

 Ina ua uma aʻu aʻoga i le 18 o oʻu tausaga na ou auai ai i le Komsomol, o se faalapotopotoga mo talavou na faaauilumaina aʻoaʻoga faa-komunisi. O lo latou sini ia aʻoaʻoina talavou e avea ma sui o le Vaega Faaupufai faa-Komunisi. E leʻi umi ae tofia aʻu o se failautusi i le vaega o lenā faalapotopotoga i le matou vaipanoa. Na latou aʻoaʻoina e tutusa uma tagata ma e tatau ona tutusa le auala e feutagaʻi ai ma tagata uma. Na matuā ou fiafia i na aʻoaʻoga, ae ina ua ou vaai i faiga lē tonu ma faiga piʻopiʻo na siʻomia ai aʻu, na ou lagona le matuā faanoanoa.

 I le avea ai ma se sui o le Komsomol, na tatau ona ou usitaʻia poloaʻiga a le faigāmalo a le Soviet Union a ina ua latou taofia ma aveesea lotu. Na iai nisi o Molimau a Ieova i le matou nuu. E ui na ou mātauina lo latou faamaoni ma uiga toʻafilemu, ae na ou manatu iā i latou o ni ē e maelega valea. Peitaʻi, ou te leʻi iloa o le a ou maua tali i le tele o aʻu fesili mai i se tasi o i latou.

 Na nofo Dimitriy le uso matua o loʻu tamā i le matou nuu, ma o ia o se tasi o Molimau a Ieova. I se tasi aso i le tau e totogo ai mea i le 1952, na ia fesili mai, “Georgiy, o le ā o le a e faia i lou olaga?” Na ou iloa i lana fesili e na o ia le tagata e manatu mamafa iā te aʻu. O le mea moni na matuā tele aʻu fesili e leʻi maua ni tali. O se faataʻitaʻiga, na masani ona ou fesili, ʻAfai o loo soifua le Atua, aiseā la ua tele ai mafatiaga?’ I le valu aso na sosoo ai, na taliina e Dimitriy aʻu fesili e faaaogā ai le Tusi Paia. O nisi taimi e oo i le tolu i le vaveao a ma talanoaga e faatatau i le Atua!

 Ona o na talanoaga, na ou filifili ai loa e suʻesuʻe le Tusi Paia. Na amata ai ona ou iloa e iai loʻu Tamā i le lagi, o lē e alofa moni iā te aʻu. (Salamo 27:10) E ui e leʻi tele ni mea ou te iloa e faatatau i le Tusi Paia, ae na lava le malosi o loʻu alofa mo Ieova ou te faia ai se gaoioiga maumauaʻi. Na ou faamavae mai i le Vaega Faaupufai faa-Komunisi, e ui i faamataʻuga mai i le sooupu o lenā faalapotopotoga i le matou vaipanoa. E na o le fā masina talu ona ou suʻesuʻeina le Tusi Paia, ae ou tuuina atu loa iā Ieova ma papatiso iā Setema 1952.

 I na aso, na faasā galuega a Molimau a Ieova. Peitaʻi, na ou manaʻo e faailoa atu loʻu alofa mo Ieova e ala i gaoioiga. O lea, na ou tauofo ai e faaoo atu lomiga faale-Tusi Paia i Molimau na nonofo i isi nuu. O se gaoioiga na ono lamatia ai, ona e mafai ona lipoti e tagata o le nuu se tagata ese i leoleo. Na oo lava foʻi i isi Molimau, na latou faaeteete ona na latou manatu o aʻu o se sipai mo leoleo, na faafoliga atu o se Molimau. Ae mulimuli ane, na latou iloa e lē o aʻu o se sipai. E na o le lua masina talu ona ou papatiso, ae puʻea loa ma molia aʻu ona o le faaoo atu o lomiga na faasāina.

 Na toetoe atoa le tausaga o faafalepuipui aʻu a o leʻi faia loʻu faamasinoga. I lenā taimi na tuʻifesili aʻu e leoleo ma taumafai e faavaivaia loʻu tumau. Peitaʻi, ua ou atiaʻe le alofa loloto mo Ieova le Atua. Mulimuli ane, na faatulaga ai loa loʻu faamasinoga e faia i le aai o Odessa i Ukraine. Na aami foʻi e le faamasinoga le matou aiga, o ē e leʻi Molimau a Ieova i lenā taimi.

 Na tuuaʻia aʻu o se tasi na faavaleaina e auai i se lotu mataʻutia. Na mananaʻo leoleo ia talitonu le matou aiga, o aʻu ua faalētonu le mafaufau. Na fefefe oʻu mātua. Na la fetagisi ma talosaga mai ia aua neʻi toe avea aʻu o se Molimau a Ieova. Ae na ou toʻafilemu ma fai atu i loʻu tinā: “Aua e te popole. E lē o faalētonu loʻu mafaufau. Ua ou maua le mea na ou saʻilia i loʻu olaga atoa, ma o le a ou taofimau i ai.” (Faataoto 23:23) E leʻi tele ni mea na ou iloa e faatatau i le Tusi Paia, ae na lava mea na ou iloa e faatatau iā Ieova ou te tumau faamaoni ai iā te ia. E pe ā ma le ono tausaga mulimuli ane, na aʻoaʻo atili ai e oʻu mātua oʻu talitonuga, ma avea ai i laʻua ma Molimau a Ieova.

 Na faasalaina aʻu i le 15 tausaga i faasalaga mamafa. Na auina atu aʻu i le itumalo o Kolyma i se nofoa afi, lea na avea ma taulaʻiga o nofoaga o faasalaga mamafa i Siberia. Ina ia pulea atoatoa pagota, na fasi faamoʻamoʻa i matou ma faamatelāina e leoleo o le falepuipui. I le taimi muamua, na ou taumānatu ai po o le a faapefea ona ou ola.

 E leʻi leva ona ou taunuu, ae fesili mai loa ma le faautauta nisi o Molimau e toʻa 34 na iai i le nofoaga o faasalaga: “E iai ni Ionatapa i le tou vaega?” O le taimi a lenā na ou iloa ai o i latou o oʻu uso faaleagaga. E na o i latou na faaaogāina lenā taʻu faale-Tusi Paia. Na fesoasoani nei uso ua iai le poto masani iā te aʻu e lē gata e faatatau mataupu silisili o le Tusi Paia i tulaga faigatā, ae ia atiaʻe foʻi uiga faaleagaga e pei o le mafaufau lelei.

 Na ou galue o sē e vaaia masini i le nofoaga o faasalaga. I se tasi aso, na mimita mai ai Matphey o se tasi na matou faigaluega faatasi, e faapea e mafai ona ia manatuaina igoa o sagato e 50. Ina ua ou faia se tala lē lelei e faatatau i sagato, na taumafai Matphey e tuʻi aʻu ae na ou sola ese. Mulimuli ane, na ou lē fiafia ina ua toē uso iā te aʻu, ma ou faapea atu: “Le a le mea tou te toē ai? O lea ou te fia talaʻi!” Na latou faamanatu mai ma le agalelei iā te aʻu lo matou sini, o le faailoa atu o le tala lelei ae lē o le faatigā i tagata. (1 Peteru 3:15) E ui o Matphey o se tagata e lē faaaloalo i faigāmalo, ae na ia maofa i le faaaloalo na faaalia e Molimau i leoleo. Mulimuli ane, na ia faaalia le naunau i le feʻau o le Tusi Paia. Ou te manatua pea le pō na papatiso faalilolilo ai o ia i totonu o se kalone.

 Ina ua matou taunuu i le nofoaga o faasalaga, na valaaulia ai i matou ma ni uso talavou se toʻalua e auai i vasega mo mataupu faapolotiki. I le taimi muamua, na matou mumusu e auai i lenei vasega. Na matou manatu o le faia o se vaega i nei vasega e feteenaʻi ma lo matou solitū faa-Kerisiano. (Ioane 17:16) O le iʻuga, na tuu ai i matou i se sela pogisa e faasala ai mo le lua vaiaso. Ina ua tatala i matou, na faamatala mai e uso e lē aafia lo matou solitū i le tau a ina auai i na vasega. I le isi itu, e mafai ona matou vaai i ai o se avanoa e avatu ai se molimau lelei. Na fesoasoani mai ma le agalelei nei uso alolofa iā i matou ia maua le atamai ma fetuutuunaʻi.

 O le auala na toleni ai ma le onosaʻi e uso aʻu, o se faamaoniga manino lea o le manatu mamafa o Ieova iā te aʻu. O se faataʻitaʻiga, na tofia se pagota na avea muamua ma faifeʻau o se suʻe tusi sili. O taimi uma e vaai ai iā te aʻu i taimi o meaʻai, e faapea mai, “Malo, le atalii o le Tiapolo!” Na fai mai le isi pagota e tatau ona ou tali atu ai, “Malo Tamā!” O le mea e faanoanoa ai, na ou faia faapea ma na matuā fasi faamoʻamoʻa ai aʻu. Ina ua iloa e uso le mea na tupu, na latou fesoasoani mai ia ou iloa e leʻi lelei laʻu mea na fai. (Faataoto 29:11) Mulimuli ane, na ou faatoese loa i le faifeʻau.

 Ae leʻi aveina aʻu i le nofoaga o faasalaga, na masani ona ou auai faalilolilo i sauniga faa-Kerisiano i le po pe i le taeaopō. Ae i inei, e leai se mea e mafai ona lalafi ai. O lea, i aso taʻitasi e matou te tutū faataaliʻoliʻo ai a o vaavaai mai leoleo, ma talanoaina se mau ua uma ona tusia i se fasi pepa. O le matou sini ia mafai ona tauloto le tele o mau e mafai ai, ma ia manatua. Pe a faafuaseʻi ona sau se leoleo i nei sauniga, e vave lava ona matou foloina nei fasi pepa.

 Ina ua faasaʻoloto aʻu mai i le nofoaga o faasalaga i le 1959, na ave ai aʻu i le itumalo o Karaganda i Kazakhstan. E ui e leʻi uma lelei loʻu faasalaga, ae na ou talosaga i leoleo mo ni aso se 20 e fai ai laʻu faaipoipoga. Na ou malaga atu i le itumalo o Tomsk i Rusia, lea na iai se tuafāfine faamaoni e igoa iā Maria ou te masani ai. E pei ona ou masani ai, na faga tonu lava le malama. Na ou fai i ai: “Maria, e leai se taimi e fai ai le ta faigāuō. Ta faaipoipo loa!” Na ioe iai ma na ma faaipoipo loa. Na tāua iā Maria loʻu tumau e ui i le tele o luʻi, ma na manaʻo e fesoasoani mai ia faaauau ona ou auauna iā Ieova.—Faataoto 19:14.

 I vaitaimi o le 1960, e leʻi mafai ona matou talaʻi mai i lea fale i lea fale, ae na matou vaaia so o se avanoa e faasoa atu ai matou talitonuga. Pe a valaaulia i matou e nisi pe ō foʻi i se tafaoga, e masani ona matou faailoa atu le faamoemoe o le ola e faavavau i le lalolagi. Na matou saʻilia foʻi avanoa e talanoa ai i isi. Mo se faataʻitaʻiga, na matou asia fale o loo faatau ese ma taumafai e amata se talanoaga ma le tagata e ona le fale, i se mataupu faaleagaga. O lenei auala na ma maua ai ma Maria le tele o suʻesuʻega faale-Tusi Paia, ma iʻu ai ina avea le toʻaono o i latou ma Molimau a Ieova.

 O nisi taimi na mafai ona matou avatu se molimau a o faagasolo faigāpalota. I se tasi aso, na ō mai ai ni leoleo nanā i se fale gaosimea na matou faigaluega ai ma nisi o uso. Na latou fesiligia i matou i luma o le pe ā o le 1,000 o tagata faigaluega, pe aiseā e lē faia ai se vaega a Molimau a Ieova i faiga faapolotiki. Na tutū atu le inisinia sili ma isi tagata faigaluega mo i matou. Na latou fai atu i leoleo o i matou o ni ē e galulue mamafa ma maufaatuatuaina. O lenā mea, na matou maua ai le malosi e faamatala atu lo matou solitū ma sii atu mau na matou manatua. O le iʻuga o le matou molimau atu ma le lototele, e toʻafā ni tagata faigaluega na faaalia le naunau i upu moni o le Tusi Paia, ma papatiso ai loa i le itiiti ifo i le tausaga.

 I le amatamataga o le vaitausaga 1970, e toʻatele tagata loto faamaoni na avea ma Molimau a Ieova i Kazakhstan. O lea, na matou manatu ai e faatulaga le matou fonotaga muamua. Ae e mafai faapefea ona faia lenā fonotaga e aunoa ma le iloa e leoleo? Na matou filifili ai loa e faia faatasi se fonotaga tasi aso ma se faaipoipoga, i se nuu e lata ane i le aai o Almaty. O lenei faatasiga e silia ma le 300 tagata na auai ai. Na galulue mamafa laʻu avā ma isi tuafāfine e teu le nofoaga na faia ai lenei faatasiga, ma saunia meaʻai mananaia. Ae na sili atu ona fiafia tagata valaaulia i aʻoaʻoga faale-Tusi Paia na aʻoaʻoina ai e failauga. O le taimi muamua lenā na ou faia ai se lauga faale-Tusi Paia, i luma o se aofia toʻatele.

 Na avea laʻu avā pele o Maria o se fesoasoani maufaatuatuaina i lona olaga atoa. O ia o se tagata agamalu, e gauaʻi, ma na faamuamua i taimi uma manaʻoga o le Malo. E ui o ia o se tagata malosi, ae na faafuaseʻi ona aafia i se maʻi tugā o ponaivi lea na faataotolia ai o ia i le toetoe 16 tausaga. Na ma tausia ma loʻu afafine agaalofa o Lyudmila o ia seʻia oo ina maliu i le 2014.

 Ina ua mafatia Maria na ou lagona foʻi le matuā mafatia. E ui i lea, seʻia oo lava i lona aso mulimuli, na ma faitauina faatasi le Tusi Paia ma mataupu faalaeiau. Na masani ona ma talanoa e faatatau i le lalolagi fou. Na iai taimi na ou tagi ai i ona autafa. Ae o taimi uma na ma faitau ai e faatatau i folafolaga matagofie a Ieova, na ma maua ai le toʻafilemu ma le malosi e tumau ai.—Salamo 37:18; 41:3.

 Talu mai le aso na ou lagona ai le alofa o Ieova, na ou iloa ai lona manatu mamafa mai. (Salamo 34:19) A o oʻu talavou ma lē lava le tomai, na ou lagona lona alofa e ala mai i ē na onosaʻi e fesoasoani mai e faaleleia oʻu uiga. Ina ua ou feagai ma faigatā i le nofoaga o faasalaga ma le ave i se nofoaga mamao, na ou lagona le fesoasoani a Ieova e ala mai i lana Afioga. Na ia aumai foʻi le malosi na ou manaʻomia e e tausia ai laʻu avā pele o Maria seʻia oo i lona maliu. I le taimi nei, e mafai ona ou faapea atu, o loʻu alofa mo Ieova na ou tumau ai.