Pe E te Silafia?

(O tali i nei fesili e mafai ona maua i mau o loo taʻua i le Tusi Paia, ma o le lisi atoa o tali, o loo lomia i le itulau e 27. Mo nisi faamatalaga, suʻe i le lomiga o le “Insight on the Scriptures,” ua lomia e Molimau a Ieova.)

1. O le ā na mauaina e le ʻausoo o ē na mulimuli i tulagāaao o Iesu ina ua faauuina i le agaga paia? (Eperu 3:1)

2. Aiseā na tuuina atu ai e Ieova le igoa taufaafefe o Loama i le atalii lona lua o Hosea i lana avā o Komeri? (Hosea 1:9)

3. E tusa ai o le faamatalaga a Iakopo, o le ā le uiga e muamua ona faatupu e le poto faalelagi i se tagata? (Iakopo 3:17)

4. O le ā na vave ona faia e Nepukanesa ina ua uma ona faamatalaina e Tanielu le tupua lea na iloa i lana faalepō? (Tanielu 2:46, 47)

5. O ā lanu o vali na tele ina faaaogā i le falefetafai ma i ofu o ositaulaga? (Esoto 28:6, NW )

6. I ona puapuaga na o ia, o ā manufelelei na faatusaina i ai e le faisalamo o ia? (Salamo 102:6)

7. O le ā le faitotoa na fetalai Iesu e tatau i se tasi ona ulu atu i ai ina ia maua ai “le ala e tau atu i le ola”? (Mataio 7:13, 14)

8. Aiseā na ufiufi ai e Mose ona fofoga ina ua ia avatu poloaʻiga a le Atua i le fanauga a Isaraelu? (Esoto 34:35)

9. E ui lava na ʻau atu Amase iā Apisaloma ina ia faasagatau iā Tavita, ae o le ā le māfuaaga na ofoina atu ai iā te ia e Tavita le tulaga o Ioapo o sē e pule i ʻau? (2 Samuelu 19:13)

10. O le ā na totō ifo ma le manai lea na mauaina faavavega e tagata Isaraelu e fai ma meaʻai i le vaomatua? (Numera 11:9)

11. Na faapefea ona taumafai le ʻau Faresaio e maileia Iesu e fouvale atu iā Roma? (Mataio 22:15-21, LF )

12. Na faapefea e Iokapeta ona faalafiina lana pepe “lalelei” e tolu masina le matua ma faasaoina ai lona ola? (Esoto 2:2-10)

13. O le ā na faatonu e Palaamo Palako e fai i mea maualuluga uma e tolu? (Numera 23:1, 14, 29)

14. E toʻafia atalii o Hamanu na fasiotia e tagata Iutaia i Susana le maota? (Eseta 9:12)

15. O ā mea uigaese na tutupu ina ua feiloaʻi le ʻausoo o Iesu i Ierusalema i le aso o le Penetekoso 33 T.A.? (Galuega 2:2-6)

16. O le ā le faamolemolega na faia e Ionatana iā Saulo e faamatala ai le pogai na lē alu atu ai Tavita e latou te aai faatasi? (1 Samuelu 20:6)

17. O le ā na iloa muamua e Ioane i lana vaaiga faaapokalipise? (Faaaliga 1:12, LF )

18. O le ā le mea o loo faalauiloa e le “motu o tagata e toatele” e faapea o loo nofo aitalafu ai i le Atua ma le Tamaʻi Mamoe? (Faaaliga 7:9, 10)

19. E tusa ai ma upu a Paulo, o le ā le fuafuaga o le Tulafono Faa-Mose, ma na faapefea ona faaooina mai? (Kalatia 3:19, NW )

20. O ā mea e lua na faasā ona ʻaina e tagata Isaraelu? (Levitiko 3:17)

21. O ai le tagata ua taʻua mai na uluaʻi faaaogāina le suafa o le Atua? (Kenese 4:1)

22. I Isaraelu anamua, na faapefea ona faailoa mai le filifilia o se tasi ina ia avea pea o ia ma auauna? (Teuteronome 15:17)

23. Aiseā na faalauiloa ai e Esera se anapogi e faia i le vaitafe o Aava i Papelonia? (Esera 8:21)

 Tali i Fesili

1. O le “valaau mai le lagi” e fai ma tupu ma ositaulaga faatasi ma Iesu Keriso

2. Ina ia faaalia ai na Ia teena Isaraelu lē faatuatua

3. O le mamā, po o le mamā o le loto

4. Na ia faapaʻū i lalo, sa faaali atu le faaaloalo iā Tanielu, ma vivii atu iā Ieova

5. O le lanu moana, lanu pāuli, lanu mūmū

6. O le kati (pelican) ma le kusa (owl)

7. O “le faitotoa va apiapi”

8. Na “pupula” ona fofoga ina ua uma ona talanoa ma le Atua

9. Na faapea atu Tavita o ia o lona “ivi” ma ona “aano”

10. O le sau

11. E ala i le fesiligia pe “sa ea ona avatu o lafoga ia Kaisara”

12. Na tuu iā te ia i se ato kome e lē sao i ai se vai i le auvai o le vaitafe o le Naila, o inā na maua ai o ia e le afafine o Farao

13. Na faatonuina o ia e fausia ni fatafaitaulaga se fitu ma ia tofu fatafaitaulaga taʻitasi ma se povi poʻa ma se mamoe poʻa e osi ai le taulaga

14. Toasefulu

15. Na sau le taalili mai le lagi, ona ‘iloa ai lea o laulaufaiva peiseai o le afi’ i luga o soo taʻitasi, ona faatumulia ai lea o le ʻausoo i le agaga paia ma amata ona tautatala i gagana eseese

16. Na ia faapea atu o loo alu Tavita i Peteleema mo le taulaga faaletausaga a lona aiga

17. O tuugāmolī auro e fitu

18. Faaolataga

19. Ina ia “faailoa ai o agasala.” “Sa faaoo mai e ala i agelu i le aao o se puluvaga”

20. O le gaʻo ma le toto

21. Eva

22. Sa tuiina le taliga o le auauna i se au

23. Ina ia mafai ai e i latou na toe foʻi ane ona faamaualaloina i latou lava i luma o Ieova ma saʻili mai iā te ia “se ala tonu”