O le ā le Leaga o Taaloga Faitupe?

“E tusa ma le 290,000 tagata Ausetalia ua iai faafitauli o le taaalo i taaloga faitupe ma ua tuuaʻia i le silia ma le $3 piliona Amerika ua maumau ai i tausaga taʻitasi. Ua lē gata ina pagātia ai i latou o loo iai faafitauli o le taalo i taaloga faitupe, ae faapea foʻi i se fuafaatatau e 1.5 miliona tagata ua aafia tuusaʻo ona ua gau ai i ia taaloga, o talaga faaipoipoga, pule i le ola ma le maumau ai o taimi faigaluega.”—J. Howard, le palemia o Ausetalia, 1999.

O IOANE lea na taʻua i le mataupu na muamua atu, na oo ina avea ma tagata e iai le faafitauli o le taalo i taaloga faitupe. * Na siitia atu i Ausetalia, ma faaipoipo atu ai iā Lina, o se tasi foʻi e taalo i taaloga faitupe. O le fiafia o Ioane i taaloga faitupe na oo ina matuā lofitūina ai o ia. Ua ia faapea mai: “Na ou amata i le faatauina o pepa loto seʻia oo atu i le faia o petipetiga i malae tutuu ma oo ai lava ina auai i taaloga faitupe i kasino. Sa toetoe lava o aso uma na ou taalo ai i taaloga faitupe. I nisi taimi ou te taalo ai i loʻu totogi atoa ma leai ai se tupe e totoe e totogi ai loʻu fale ma fafaga ai loʻu aiga. E tusa lava pe na ou malo i le tele o tupe, ae sa faaauau pea ona ou taalo i taaloga faitupe. Na puleaina aʻu i le mauaina o lagona fiafia o le manumalo.”

Ua toʻatele tagata e pei o Ioane. E foliga mai ua aafia le sosaiete atoa o tagata i le naunau i taaloga faitupe. Ua taʻua i le mekasini o le USA Today o le va o le 1976 ma le 1997, na matuā maofa ai i le faatelega e 3,200 pasene le aofaʻi o tupe maumau i nofoaga ua faatagaina faaletulafono mo taaloga faitupe i le Iunaite Setete.

Ua faapea mai le nusipepa The Globe and Mail: “Sa masani ona manatu i taaloga faitupe o se amioga leaga. Ae i aso nei ua avea ma mausa o le toʻatele.” Na taʻua e le pepa se tasi o māfuaaga ua suia ai uiga o le toʻatele e faapea: “Ua sui uiga o tagata e faatatau i taaloga faitupe, ona o faasalalauga ina ia auai i taaloga faitupe a le malo.” O ā aafiaga ua oo i nisi o tagata ona o taumafaiga e faaauilumaina taaloga faitupe?

Aafiaga o le Faafitauli o le Taalo i Taaloga Faitupe

E tusa ai ma se fuafaatatau na faia e le Harvard Medical School Division on Addictions, i le 1996 e faapea, e “7.5 miliona tagata matutua Amerika na iai o latou faafitauli o le taaalo i taaloga faitupe, ma tagata na pulea atoatoa e taaloga faitupe” ma e faaopoopo atu i ai e “7.9 miliona talavou Amerika na iai faafitauli o le taalo i taaloga faitupe ma le pulea atoatoa e taaloga faitupe.” O nei fuainumera, na aofia ai i se lipoti na faamauina e le National Gambling Impact Study Commission (NGISC), lea na tuuina atu i le Fono a le Iunaite Setete. Na taʻua e le lipoti e faapea, o le aofaʻi o tagata o loo iai le faafitauli o le taaalo i taaloga faitupe i Amerika, atonu e sili atu ona maualuga na i lo fuainumera faamaumauina.

Ona o le maumau ai o galuega, le lē malosi o le tino, totogia o tagata ua leai ni galuega, ma le tau e faaalu mo polokalame i le mauaina o ni vaifofō o faafitauli o le taaalo i taaloga faitupe, ua tusa ma le faitau piliona tālā Amerika e faaalu ai i tausaga taʻitasi. O lenei fuainumera, e lē o faailoa mai ai le faataulaga ma mafatiaga i faafitauli e aumaia e taaloga faitupe, le faigatā e oo ai i aiga, uō, ma aumea i galuega,  o tulaga e oo i ai ona o le gaoi, faaʻoleʻole, pule i le ola, sauāga i aiga, ma le faileagaina o tamaiti. Na mauaina i se suʻesuʻega na faia i Ausetalia faapea, e oo atu i le toʻasefulu tagata e mafai ona aafia tuusaʻo i se tagata e toʻatasi e iai sona faafitauli o le taalo i taaloga faitupe. I se lipoti a le National Research Council i le Iunaite Setete, ua oo atu i le “50 pasene o paaga ma le 10 pasene o tamaiti ua oo iai le faileagaina i le tino mai le tagata ua pulea e taaloga faitupe.”

Se Masaniga e Pipisi

I le pei o nisi o faamaʻi, o tagata e iai o latou faafitauli o le taaalo i taaloga faitupe e foliga mai e pipisi mai mātua i tamaiti. Na taʻua e le lipoti a le NGISC e faapea: “O tagata e naunau i taaloga faitupe e ono auai a latou fanau i amioga solitulafono e pei o le ulaula, inuina o le ʻava malosi, ma le faaaogā o fualaau faasāina, ma e telē se lamatiaga o le ono avea o i latou ma ē e iai faafitauli o le taaalo i taaloga faitupe po o le oo atu foʻi ina pulea e ia taaloga.” Ua lapataʻi mai foʻi le lipoti e faapea o “talavou e auai i taaloga faitupe e ono mafai ona oo atu i le avea ma tagata matutua e iai faafitauli o le taalo i taaloga faitupe po o le pulea ai foʻi.”

Ua faapea mai Dr. Howard J. Shaffer, o le faatonu o le Harvard Medical School’s Division on Addiction Studies: “Ua tele ni faamaoniga e iloa ai  faapea, o loo tele ina auai talavou i taaloga faitupe faasolitulafono, po o le sili atu foʻi, na i lo taaloga faitupe ua faatulafonoina.” Ona o le ono iai o le avanoa o tagata ua puleaina e taaloga faitupe e faaaogāsesēina ai faiga faatekinisi i le Initineti, ua ia faapea mai: “O le ulaina o le fualaau faasāina o le crack cocaine ua suia ai le tulaga masani o le faaaogāina o le cocaine, o lea ou te manatu ai o le a suia e faiga faakomepiuta le auala o loo masani ona faia ai taaloga faitupe.”

O pisinisi o taaloga faitupe, e masani lava ona manatu i ai e lē afāina. Ae mo talavou, o taaloga faitupe e mafai ona puleaina ai e pei lava o so o se fualaau faasāina ma e mafai ona taʻitaʻiina atu ai i amioga solitulafono. Na mauaina e se suʻesuʻega na faia i le United Kingdom e faapea, o talavou na auai i taaloga faitupe, o le “46 pasene o i latou na gāoi mai i o latou aiga” e lagolagoina ai a latou masaniga.

E ui lava i mea moni sa taʻua, ae na fai e se tasi o asosi malosi o taaloga faitupe ni faamatalaga ina ia faapea ai e lē afāina taaloga faitupe i le faapea mai: “O le toʻatele o tagata Amerika o loo fiafia i taaloga faitupe e leai lava ma se faafitauli o oo i ai.” E tusa lava pe e te lagona o le auai i taaloga faitupe e lē o matuā aafia ai lou tulaga tautupe po o lou soifua mālōlōina, ae o ā aafiaga o loo iai i lou soifuaga faaleagaga? Po o iai ea ni māfuaaga lelei e tatau ai ona e ʻalofia le auai i taaloga faitupe? O le a iloiloina e le mataupu o loo sosoo mai nei fesili.

[Faaopoopoga i lalo]

 [Pusa/Ata i le itulau 4, 5]

Po o Iai Soʻu Faafitauli o le Taalo i Taaloga Faitupe?

E tusa ai ma le Asosi o Fomaʻi o le Mafaufau i Amerika, o manatu o loo sosoo mai i le itulau e 5 e mafai ona iloaina ai le tagata ua pulea e taaloga faitupe (i nisi taimi e taʻua o tagata e naunau i taaloga faitupe). Ua ioeina e le toʻatele o tagata popoto e faapea, afai e te faaalia nisi o amioga o loo mulimuli mai, o lona uiga ua avea oe ma se tasi e iai le faafitauli o le taalo i taaloga faitupe, ma afai ua e faia se tasi o nei amioga, ua e i le tulaga lamatia o le oo ina avea ma tagata ua iai le faafitauli o le taalo i taaloga faitupe.

 Faatumulia le Mafaufau Ua faatumulia lou mafaufau i taaloga faitupe, ua e manaʻo e toe faia e pei ona iai i taimi ua mavae, ma ua fuafua se isi faatulagaga, po o le mafaufau i auala e maua ai t upe e taalo ai.

Lē Lava le Taalo i Tamaʻi Tupe Ua e manaʻomia ona taalo i se aofaʻiga tele o tupe ina ia mauaina ai le fiafiaga o loo manaʻomia.

Vavae Ese Ua e lē toʻa po o le itaitagofie pe a taumafai e faaitiitia po o le taofia o le taalo i taaloga faitupe.

Sola Ese Ua e taalo i taaloga faitupe e avea o se auala e sola ese ai mai faafitauli po o le suia ai o faalogona o le lē mafesoasoania, lagona nofosala, popole, po o le lotomafatia.

Tuliloaina Pe a gau i taaloga faitupe, e masani lava ona e toe foʻi i se isi aso e toe taalo ina ia toe maua mai tupe ia na gau. O lenei amioga, o le tuliloaina lea e se tasi o ana mea ua gau.

Pepelo Ua e pepelo i tagata o le aiga, i tagata o loo taumafai fesoasoani iā te oe, po o isi ina ia natia ai le tele o lou aafia i taaloga faitupe.

Ua Lē Mafai Ona Pulea Ua faafia ona lē manuia au taumafaiga e tuu, pulea, po o le taofia o le auai i taaloga faitupe.

Gaoioiga Solitulafono Ua e faia se solitulafono, e pei o le faaʻoleʻole, gaoi, po faiga faagaoi, ina ia faatupeina ai au taaloga faitupe.

Ua Tulaga Faalētonu Faiā Tāua Ua tuua i se tulaga lamatia po o le maumau o se faiā tāua sa iai, se aʻoaʻoga po o se avanoa i se galuega, po o se galuega ona o taaloga faitupe.

Laveaʻiga Tautupe Ua e faalagolago i isi e aumaia tupe e fesoasoani i se tulaga faigatā tautupe ua māfua ona o taaloga faitupe.

[Ē Ana le Ata]

Maua mai faamatalaga i le: National Opinion Research Center i le Iunivesite o Chicago, Gemini Research, ma le Lewin Group.

[Pusa/Ata i le itulau 7]

Le Uiga Moni o Faasalalauga o Loto

“O le faaauilumaina o loto . . . e ono vaai i ai o le aʻoaʻoina o ni mea e aogā, ua aʻoaʻoina ai faapea o le taalo i taaloga faitupe o se mea e lē afāina po o se gaoioiga lelei,” o faamatalaga na a tagata suʻesuʻe i le Iunivesite o Duke, i le Iunaite Setete, i se lipoti na tuuina atu i le National Gambling Impact Study Commission. O le ā le aafiaga o faasalalauga o loto i tagata? Ua taʻua e le lipoti e faapea: “Atonu e lē o soona faamamafaina i faasalalauga o loto le manatu e faapea, o nei faasalalauga e taufaasee, auā o le taulau manuia e faalagolago lava i le filifilia e le tagata o le numera saʻo. O nei ‘⁠auala’ leaga ua fuafuaina e ofisa e faia loto, atonu e iai ni ona āuga faalēmanuia lea e oo ai ina faaitiitia tupe maua a le malo ma paʻū ai le tamaoaiga. Aemaise lava, pe afai o le faaauilumaina o le loto ua faaleagaina ai le naunau o le tagata e faigaluega, teuina o tupe, faaaogāina o tupe mo le aʻoaʻoina ma le toleniina o ia lava, ma o aafiaga, o le a oo ai ina vaivai le tupu aʻe o le tamaoaiga. Po o le ā lava le tulaga o iai, o le faatalitalia o se mea e teʻi lava ua tupu e lē o se auala lea mo le mauaina o le manuia, lea e masani ona tatou aʻoaʻoina ai a tatou fanau.”

[Pusa/Ata i le itulau 8]

Ua Avea Aiga Uma ma Kasino

Ona o le itiiti o le tau pe a faatusatusa atu i le tau e fausia ai se nofoaga fou mo le faia o taaloga faitupe, ua faaaogāina ai nei e faalapotopotoga o taaloga faitupe le Initineti, ina ia mafai ai e so o se aiga o loo fesootaʻi atu la latou komepiuta i le Initineti ona pei lava o se kasino. I le taulotoaʻiga o vaitausaga mai le 1990 seʻia oo i le 1999, sa toetoe lava 25 nofoaga i le Initineti mo taaloga faitupe na iai. I le 2001 ua silia ma le 1,200 nofoaga ua iai, ma ua faaluaina le aofaʻi o tupe e maua i taaloga faitupe i le initineti i tausaga taʻitasi. I le 1997, na mauaina ai e le nofoaga o taaloga faitupe i le initineti le $300 miliona Amerika. I le 1998 sa latou toe mauaina ai le $650 miliona. I le tausaga e 2000, na mauaina ai le $2.2 piliona, ma ua “faatalitalia lenā numera e oo atu i le $6.4 piliona,” i le 2003 e pei ona taʻua ai e le lipoti o tala fou a le Reuters.

[Ata i le itulau 6]

O āuga leaga o taaloga faitupe e aofia ai aiga ua leai ni tupe e faatau ai meaʻai

[Ata i le itulau 7]

O le taaalo o talavou i taaloga faitupe, ua faateleina i se saosaoa e faapopoleina ai

[Ata i le itulau 8]

O fanau a ē e naunau i taaloga faitupe, e telē se lamatiaga o le ono avea o i latou ma ē e iai faafitauli o le taaalo i taaloga faitupe