O Ai o le a na Aumaia le Filemu Tumau?

AISEĀ ua lē taliina ai e le Atua tatalo mo le filemu a taʻitaʻi lotu o lotu eseese o le lalolagi? Ua aumaia e le Tusi Paia se tali mataʻina. E lē faapea ua lē o manatu mai le Atua mo le filemu—e sili atu lona naunau mo le filemu na i lo o faifeʻau o loo tatalo mo lea tulaga. O le mea moni, ua uma ona faia e le Atua fuafuaga mo le aumaia o le filemu i le lalolagi. Ua uma foʻi ona ia faia ni laasaga tāua e faataunuuina ai lea fuafuaga. Ua uma ona ia taʻuina mai ma le manino lona finagalo i tagata. Peitaʻi, e faanoanoa ona ua matuā lē amanaʻiaina e lotu a le lalolagi mea na fetalai mai ai le Atua.

Ua loa ona folafola mai e le Atua se “fanau,” o se taʻitaʻi, o ia lea o loo faamatalaina faasolosolo mai e le Tusi Paia, ma aumaia atili faamatalaga po o ai lea o le a avea ma lea taʻitaʻi. (Kenese 3:15; 22:18; 49:10) Na lauiloa le perofeta o Isaia i ana valoaga mataʻina e faatatau i le Mesia, na ia tusi e faapea, o lenei Taʻitaʻi na folafolaina mai o le a avea ma “Alii o le filemu” i le lalolagi uma ma o lana pulega, o le a ‘⁠leai se mea e gata mai ai le tele o le filemu.’ (Isaia 9:6, 7) Ona o ia o se Pule faalelagi, o le a ia gaoioi e faaumatia tagata amioleaga ae faaliliuina le lalolagi e avea ma parataiso, lea o le a lē toe iai se faamasinoga lē tonu, maʻi, mativa, po o le oti. O le a tumau le filemu ma le ola e faavavau. (Salamo 72:3, 7, 16; Isaia 33:24; 35:5, 6; Tanielu 2:44; Faaaliga 21:4) O afea o le a tupu ai lenei mea?

Ua Lata Mai le Filemu o le Lalolagi

Na taʻu atu e Iesu i ona soo faapea o le iʻuga o lenei faiga o mea ma le amataga o se sosaiete fou o tagata o le a tamua e mea mataʻutia o le a tutupu i le lalolagi, lea o le a tutupu faatasi i se vaitaimi e tasi. (Mataio 24:3, 7-13) O le tele o nei mea tutupu—o taua, oge, mafuiʻe, tau ina taʻua na o ni nai mea—ia o loo tutupu mai lea taimi i lea taimi. Peitaʻi, e leʻi faapea muamua ona pagatia tagata i se taimi se tasi, ma i le lalolagi aoao e pei ona iai i lo tatou vaitaimi. Ma o āuga o na mala ua sili atu ona ogaoga na i lo le taimi muamua, ona o le anoanoaʻi o tagata ua nonofo faatasi.

 O le isi mea na valoiaina mai i le Tusi Paia o le faaleagaina lea o le siʻosiʻomaga e tagata. (Faaaliga 11:18) O le isi mea e tupu a o leʻi oo mai le iʻuga na folafolaina mai, e tatau ona faataunuuina le galuega lapataʻi i le lalolagi aoao, le talaʻiina o le “tala lelei o le malo.” Ua faia e Molimau a Ieova i aso nei lenā galuega i le lalolagi aoao.—Mataio 24:14.

O le faataunuuina o na valoaga o se tala lelei lea mo tagata faamaoni. Ua lata mai le lalolagi fou e maua ai le filemu atoatoa e pei ona folafolaina mai! O le a mautinoa ai le mou atu atoatoa o le ʻinoʻino ma faiga faatupu faalavelave. Ua faamatalaina e le Tusi Paia e faapea: “Latou te lē faia se mea leaga, latou te lē faaumatia foʻi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.”—Isaia 11:9.

Tatalo e Faafofogaina e le Atua

O le tatalo i le Atua e lē faapea o se mea e lē aogā pe leai se uiga. O loo taʻua Ieova i le Tusi Paia o le “faafofoga tatalo.” (Salamo 65:2) O loo faafofoga o ia i so se taimi i le anoanoaʻi o tatalo o loo faia e tagata faamaoni i le lalolagi. Pe e iai la ni mea e manaʻomia ona ausia, ina ia faafofogaina ai a tatou tatalo? Ua fautua mai le Tusi Paia faapea, o tagata loto faamaoni ua aʻoaʻoina upu moni o le Tusi Paia e faatatau i le Atua, e manaʻomia ona ausia manaʻoga nei, o le avea ma ē “tapuaʻi faamaoni,” e tapuaʻi atu iā te ia “i le agaga ma le faamaoni.” (Ioane 4:23) E lē taliina tatalo a i latou e lē faaaloalo i lona finagalo: “O lē ua liliu ese ona taliga a e lē faalogologo i le tulafono [a le Atua], e inosia lana lava tatalo.”—Faataoto 28:9.

E faanoanoa, ona o le tele o taʻitaʻi lotu i aso nei e lē aʻoaʻoina pe tatalo foʻi i fuafuaga a le Atua ina ia aumaia le filemu. Na i lo lenā, ua latou tatalo i malo faaletagata e foʻia na faafitauli, ae ua manino mai upu a le Afioga a le Atua faapea “e lē o i le tagata e savali ona faatonuina le mea e ui ai o ia.”—Ieremia 10:23.

Na valoia faapea “o aso e gata ai,” po o lo tatou vaitaimi, o le a gasolo atu tagata e fiafia i le filemu i le “mauga” faafaatusa “o i ai le fale o Ieova”—o lona uiga, i le tapuaʻiga moni. O i latou na ua faia ni suiga tetele i o latou olaga: “Ona latou tuʻi ai lea i a latou pelu e fai ma uʻamea o suōtosina, o latou tao foʻi e fai ma polo e teu aʻi vine; e lē sii atu le pelu e le tasi nuu i le tasi nuu, latou te lē toe aʻoaʻo foʻi i taua.”—Isaia 2:2-4.

Po o iai ea se vaega o tagata tapuaʻi i aso nei o loo taumafai e ola e tusa ai o na upu? Po o tapuaʻiga uma ea e na ona talanoa e faatatau i le filemu ae o loo faaauilumaina pea faiga taua? O le isi taimi e te feiloaʻi ai i Molimau a Ieova, e matou te valaaulia oe e talanoaina le mataupu e faatatau i le filemu ma i latou ma aʻoaʻo po o fea le lotu o loo aʻoaʻoina tagata e nonofo ma le filemu ma tagata uma.