Po o le a iai se Lumanaʻi Fiafia?

E uiga ese le fia iloa o loo i tagata e tusa o le lumanaʻi. Pe e iai ea se isi o i tatou e lē o fia iloa po o le ā e tupu i le masina fou, po o le tausaga fou, po o le isi foʻi sefulu tausaga o i luma? I se tulaga aoao tetele, o le ā le tulaga o le a iai le lalolagi i le isi 10, 20, po o le 30 tausaga i le lumanaʻi?

PO O iā te oe se uiga mautinoa e tusa o le lumanaʻi? E faitau miliona i latou o loo iai lenā lagona, ma e ono vaevaeina i ni vaega se lua: o i latou e faapea mai e mautū māfuaaga ua talitonu ai o le a faaleleia le lalolagi, ma i latou ua manatu o le a faaleleia ona e lē fia manatu i le tulaga leaga e ono oo i ai le lalolagi.

Ae o loo iai foʻi nisi ua manatu, e augapiu ma sina lelei e faatalitalia i le lumanaʻi. E iai ē fiafia tele e faasilasila mai le lalata mai o le faaumatiaga o lo tatou paneta atoa. O lo latou manatu, afai e iai nisi e faasaoina, e toʻaitiiti lava.

Ae faapefea oe, o le ā sou manatu i le lumanaʻi? Pe faamata o le a faatamaʻia le lalolagi, pe o le a maua se filemu ma le saogalemu? Afai e te manatu o le a iai se filemu, o le ā le faavae o lou manatu? Po o ou lava na moomooga, pe e iai se faamaoniga mautū?

E lē talitonu i latou e lomia le Ala Mai! o le a faaumatia le paneta, e pei ona talitonu i ai i latou o loo faalauiloaina lea tulaga. Ae ua taʻua i le Tusi Paia ni māfuaaga maumaututū e talitonu ai, o loo i luma se taimi e sili ona lelei.

[Ē Ana le Ata i le itulau 5]

U.S. Department of Energy photograph