Le Oti—Po o le Iʻuga ea Lea?

ATONU e leai se isi mataupu e sili lona lavelave ma faaumiumi i lo le fesili e masani ona tulaʻi mai, i le mea e tupu pe a mavae le oti. E faitau afe tausaga o iloilo e tagata atamamai mai vaipanoa ma aganuu eseese lenei fesili. Ae ua tele talafatu ua iai ona o filosofia a tagata ma suʻesuʻega faasaienisi.

Ae faapefea aʻoaʻoga o loo i le Tusi Paia? Atonu e finau mai nisi, e tutusa lava le fenumiaʻi o le Tusi Paia ma isi talitonuga i le oti ma le olaga pe a mavae le oti. Peitaʻi, ina ia lē faaituʻau, e tatau ona tatou talia le mea moni, ua māfua nei fenumiaʻiga ona o le tele o lotu ua suia aʻoaʻoga a le Tusi Paia i mea pepelo ma tala tuu. Pe a e lē taliaina ia aganuu ma talafatu ae pipii atu i mea o loo fai mai ai le Tusi Paia, o le a e iloa ai ni aʻoaʻoga e talafeagai ma maua ai se faamoemoe.

A o Leʻi Ola Mai

O se faaaʻoaʻoga, o mau e lua o loo taʻua i le mataupu na seʻi mavae atu. E manino mai i na mau o ē ua oti, po o se tagata po o se manu, e lē o toe iloa se mea. O lea la, e tusa ai ma le Tusi Paia, e leai se galuega, faalogona, iloa, po o manatunatuga i le oti.—Failauga 9:5, 6, 10.

Pe faigatā ona talitonu i lenei mea? Seʻi mafaufau foʻi: O le ā le tulaga o le tagata a o leʻi ola mai? O fea na e iai a o leʻi tuufaatasia sela o ou mātua ma maua ai oe o se tagata ola? Pe afai e iai se vaega e lē vaaia o le tagata e ola pea pe a mavae le oti, o fea la sa iai lenā vaega lē vaaia a o leʻi afuafua mai? O le mea moni, e te leʻi ola muamua i se isi mea, o le māfuaaga lea e te lē manatua ai se mea. E faigofie lava le manatu, a o leʻi afuafuaina oe, e te leʻi ola i se isi mea.

E talafeagai ai la ona tatou faapea, pe a tatou oti, e toe foʻi lo tatou iloa i le tulaga na iai muamua ae e te leʻi ola mai. Ua pei ona fetalai le Atua iā Atamu ina ua ia lē usiusitai: “Auā o le efuefu oe, e te toe foʻi atu lava i le efuefu.” (Kenese 3:19) E leai la se eseesega o le tagata mai meaola i le tulaga lenā. E tusa ai ma le tulaga o ē ua maliliu, ua pei ona faamatala e le Tusi Paia: “E leai lava se mea e sili ai le tagata i le manu.”—Failauga 3:19, 20.

 Po o lona uiga la ua na o nai tausaga e ola ai le tagata ona lē toe iai lea e faavavau? Pe e iai se faamoemoe mo ē ua maliliu? Seʻi mātau vala nei.

Le Faanaunauga ia Ola Pea na E Soifua Mai ma Oe

E toetoe o tagata uma e lē fiafia i le mataupu lenei o le oti. E ʻalofia e le toʻatele le mafaufau po o le talanoa e faatatau i lo latou lava oti. I le isi itu, ua aafia i latou i ata tifaga lea e faaalia ai so o se auala e mafai ona oti ai tagata, aemaise foʻi tala ma ata o oti moni lava i le nusipepa, leitiō, ma le televise.

O lea la, ua avea le oti o se tasi tatou te lē masani i ai, o se vala masani o le olaga. E ui i lea, pe a oti se tasi e pele iā i tatou po o i tatou lava, e lē o se mea lea e masani ai, ona o loo i le tagata le faanaunauga masani e fia ola pea. E tatou te naunau ma uaʻi atu i le taimi, aemaise foʻi le mafaufau ia ola e faavavau. Na tusi le tupu o Solomona ua “tuuina e le [Atua] le ola e faavavau i loto o tagata.” (Failauga 3:11, The Amplified Bible) I tulaga masani lava, e tatou te mananaʻo e ola e faavavau. E tatou te mananaʻo uma i se olaga e leai se iʻuga. E leai se faamaoniga e iloa ai o loo iai lenā faanaunauga i meaola. Ua latou ola e aunoa ma se iloa o le lumanaʻi.

E Tele Mea e Mafai Ona Fai e Tagata

E lē gata e faananau tagata ina ia ola e faavavau, ae e mafai foʻi ona faaaogā lelei o latou taimi ma faia le tele o mea aogā. E foliga mai e leai se mea e gata ai le mafai e le tagata ona aʻoaʻoina mea fou. E leai ma se mea o le natura e faatusatusa i le faiʻai o le tagata, ona o le lavelave ma le auala e toe faaleleia ai e ia o ia lava. E lē pei i tatou o meaola, o o tatou mafaufau e mafai ona fefulifulisaʻi i mataupu eseese, ma malamalama i mea e faigatā ona malamalama i ai. E lē loloto le malamalama o saienitisi i le tele o mea e mafai ona fai e le faiʻai o le tagata.

E faaauau pea ona iai iā i tatou nei agavaa a o faasolosolo ina matutua. Na maua i se suʻesuʻega a se saienitisi o neula e faapea, e lē aafia le tele o mea e mafai ona fai e le faiʻai a o faasolo ina matua. Na faamalamalama mai e tagata suʻesuʻe i le The Franklin Institute’s Center for Innovation in Science Learning: “E mafai e le faiʻai o le tagata ona faaauau ona fetuutuunaʻi ma toe faaleleia e ia lava mea ua faalētonu. E tusa lava po ua matua le tagata, e mafai pea ona tutupu sela fou. O ni faalētonu tugā i le mafaufau e māfua mai se maʻi, a o le lē toe manatua o mea, e lē māfua mai le tino matua, ae māfua mai i le lē faagaoioi po o le lē faaaogā o le mafaufau.”

O lea la, pe afai e tatou te faaaogā pea le faiʻai ma aunoa ma se maʻi, e mafai ona gaoioi pea e faavauvau. “Na faapea mai le saienitisi o le mafaufau o James Watson, o ia o se tasi o i latou na muaʻi iloaina le auala o loo faia aʻe ai le DNA, ‘o le faiʻai, o le mea aupito i lavelave lona fausaga ua matou suʻesuʻeina i le lalolagi aoao.’” Na faapea mai Gerald Edelman o se saienitisi o neula i sana tusi na tusia, o se vaega o le faiʻai e tutusa lona telē ma le ulu o se laau afitusi, “o loo iai pe ā ma le piliona sooga o neula lea e lē mafaitaulia.”

Ona o le tele o mea e mafai ona fai e le faiʻai o le tagata, pe talafeagai ona faapea ua tatau ona ola mo ni nai tausaga? E lē talafeagai lea manatu, auā ua tutusa lenā ma le faapea atu, e faaaogā se loli telē ma malosi e ave ai se oneone se tasi i le mamao pe na o ni nai inisi! Aiseā la ua tele ai le tomai ma le agavaa o tagata e faia ai mea ma aʻoaʻo atili i nisi mataupu? Atonu e lē pei tagata o meaola, afai e lē tatau  ona oti le tagata, na faia i latou e ola e faavavau.

Faamoemoe Mai le Atua o le Ola

Ona o le mea moni e iai le faanaunauga e ola pea, ma e tele mea e mafai ona tatou aʻoaʻoina, lea ua maua ai le faaiʻuga faapea: Na fuafuaina tagata ina ia sili atu i le 70 po o le 80 tausaga e ola ai. Ua tatou faia ai la se isi faaiʻuga: E tatau ona iai se tasi na Fuafuaina mea, o sē na Faia mea, ma o se Atua. O tulafono lē masuia o le vateatea ma le lavelave o le ola i le lalolagi, ua lagolagoina ai le talitonuga e iai lē na Faia mea uma.

Afai na faia i tatou e le Atua ina ia mafai ona ola e faavavau, aiseā ua tatou feoti ai? O le ā le mea e tupu pe a mavae le oti? Po o le finagalo o le Atua ina ia toe faatutūina ē ua maliliu? E talafeagai le manatu faapea e maua mai tali o nei fesili i se Atua e poto ma malosi, ma ua ia faia faapea. Seʻi iloilo manatu nei:

▪ E leʻi finagalo le Atua i le amataga e oti le tagata. O le taʻua muamua o le oti i le Tusi Paia e faailoa mai ai e leʻi iai le oti i le uluaʻi fuafuaga a le Atua mo tagata. Na taʻua i le tala o loo i le Kenese e faapea, sa tofotofoina Atamu ma Eva i se mea faigofie, ina ia faamaonia ai lo la alofa ma le faamaoni. O le faasāina lea o le ʻaina o le fua o se laau e tasi. Na faapea atu le Atua: “O le aso e te ʻai ai e te oti ai lava.” (Kenese 2:17) O le a oti Atamu ma Eva pe a fouvale, ma lē taulau ai i le tofotofoga. Na faapea mai le tala o loo i le Tusi Paia na lē faamaoni i le Atua, ma la feoti ai. Ona o lenā mea na tupu, ua oo mai ai le tino lē lelei atoatoa ma māfua ai ona feoti tagata.

▪ O loo faatusa e le Tusi Paia le oti i le moe. O loo taʻua i le Tusi Paia le “moe i le oti.” (Salamo 13:3) A o leʻi faatūina e Iesu lana uō o Lasalo, na ia faamalamalama i ona aposetolo: “O loo mālōlō la tatou uō o Lasalo, ae ou te alu atu e fafagu iā te ia auā o loo moe.” O le mea lava lenā na faia e Iesu! Na faapea mai le Tusi Paia ina ua ia valaau atu, “ona sau ai lea i fafo o le tagata [Lasalo] na oti” mai  “le tuugamau,” ua toe ola o ia!—Ioane 11:11, 38-44.

Aiseā na faatusa ai e Iesu le oti i le moe? Auā o le tagata o loo moe e lē o toe iloa se mea. Pe a oo ina matuā gase le moe a le tagata, e na te lē iloa mea o loo tutupu po o le lē iloa foʻi o le taimi. E leai se tigā po o se puapuaga a o moe. E faapena foʻi le oti, e lē toe i ai se galuega po o se iloa. Ae e telē atu se isi faatusatusaga e mafai ona fai. Pe a moe se tasi, e faatalitalia e toe ala mai ai. O le faamoemoe tonu lava lenā o loo aumaia i le Tusi Paia mo ē ua maliliu.

Ua folafola mai e lē na Foafoaina mea: “Ou te laveaʻi iā te i latou ai le malosi o le tuugamau; ou te faaola iā te i latou ai le oti. Le oti e, o fea o i ai le malaia mai iā te oe? Le tuugamau e, o fea o i ai se mea e fano ai mai iā te oe?” (Hosea 13:14) O loo faapea mai se isi valoaga o le Tusi Paia o le a “faaumatia e ia [le Atua] le oti e faavavau; e soloiesea foʻi e le Alii o Ieova o loimata i mata uma lava.” (Isaia 25:8) Ua taʻua lenā auala mo le toe faaolaina o tagata, o le toetū.

▪ O fea o le a nonofo ai ē o le a toe tutū mai? E pei ona iloiloina muamua, e iai se faanaunauga masani i tagata e fia ola pea. O fea e te fia nofo ai e faavavau? Faamata e te fiafia e faaauau ona ola i se isi olaga pe a oti, e pei ona aʻoaʻoina e isi lotu? Pe e te manaʻo e te ola mai o se isi tagata, ma lē manatua ai au mea na fai a o leʻi oti? Pe e te talia le manatu faapea, o le a e toe ola mai o se manu po o se laau? Pe a tuu atu iā te oe le filifiliga, pe e te fia ola i se lalolagi e leai ai ni mea e te masani ai ma fiafia i ai tagata?

Pe a lelei mea uma, pe e te lē fia nofo la i se lalolagi parataiso? O le faamoemoe lenā o loo i le Tusi Paia, ina ia ola e faavavau tagata i le lalolagi. O le fuafuaga lenā na foafoaina ai e le Atua le lalolagi, ina ia nonofo ai i latou e alolofa ma auauna iā te ia e faavavau ma le fiafia. O le māfuaaga lenā ua faapea mai ai le Tusi Paia: “E fai lava le nuu mo tagata amiotonu, e nonofo ai pea i latou.”—Salamo 37:29; Isaia 45:18; 65:21-24.

▪ O afea e tupu ai le toetū? O le mea moni, o loo faatusa atu le oti i le moe, lea ua faaalia mai ai, e lē oti loa le tagata toetū mai lava i le taimi lenā. O le vaitaimi e “moe” ai, e tupu i le va o le taimi e oti ai ma toetū mai ai. I le Tusi Paia, na fesili se tamāloa e suafa iā Iopu e faapea:  “Afai e oti le tagata, e toe ola mai ea o ia?” Ona ia tali mai lea: “Ou te faatalitali atu [i le tuugamau] . . . seʻia oo ina suia o aʻu. Ia e valaau mai, ona ou tali atu ai lea.” (Iopu 14:14, 15) O se fiafiaga tele le taimi o le a toe faatasia ai ē ua maliliu ma ē pele iā i latou!

E Lē Tatau Ona Soona Fefe i le Oti

O le mea moni, e lē faapea o le a aveesea uma e le faamoemoe o loo i le Tusi Paia le fefe i le oti. O se faalogona masani le fefe i tigā ma mafatiaga a o leʻi oo mai le oti. Atonu e te fefe i le oti o se tasi e pele iā te oe. O se mea masani foʻi lou fefe i iʻuga faanoanoa o le a oo iā i latou e pele iā te oe pe a e oti.

E ui i lea, e ala i le faailoaina mai o le tulaga moni o i latou ua maliliu, ua fesoasoani mai le Tusi Paia e aveesea mai o tatou mafaufau mai le soona fefe i le oti. E lē manaʻomia ona fefe fua i se olaga o le a faapuapuagatia e temoni i le afi pe a mavae le oti. Aua foʻi le fefe i se nofoaga pogisa e iai aitu lea e feoaʻi solo ai e faavavau agaga. E lē tatau foʻi ona e fefe faapea o le a e lē toe iai lava e faavavau. Aiseā? Auā e lē gata mai mea e mafai ona manatua e le Atua, ma ua ia folafola mai e na te toe faatutūina i luga o le lalolagi i latou uma o loo i lona finagalo. O loo faamautinoa mai e le Tusi Paia lenei mea: “O lo tatou Atua, o le Atua o le olataga lea; o Ieova le Alii e ana ē faasaoina i le oti.”—Salamo 68:20.

[Faamatalaga faaopoopo i le itulau 5]

“Auā o le efuefu oe, e te toe foʻi atu lava i le efuefu.”—Kenese 3:19

[Faamatalaga faaopoopo i le itulau 6]

“Ua tuuina e le [Atua] le ola e faavavau i loto o tagata.”—Failauga 3:11, The Amplified Bible

[Pusa/Ata i le itulau 8]

TALIINA O AU FESILI E FAATATAU I LE OTI

O le mea moni, e iai fesili e faatatau i le oti ma le toetū e lē o talanoaina i nei mataupu. E toʻatele ua mauaina ni tali faamalieloto i nei fesili e ala i lo latou suʻesuʻe lelei o le Tusi Paia ma Molimau a Ieova. E matou te faalaeiauina oe e faia faapea. O fesili o loo sosoo mai o le a e mauaina ni tali:

▪ O le ā le uiga o faaupuga nei a le Tusi Paia o le “kena” ma le “lepa afi”?

▪ Afai e leai se afi i kena, e faapefea la ona faasalaina tagata leaga?

▪ O loo fai mai le Tusi Paia, e alu ese le agaga mai le tino pe a oti. O le ā lenā agaga?

▪ Aiseā e tele ai lipoti faapea na fesootaʻi ma ē ua maliliu?

▪ O le ā le uiga o le upu “agaga” i le Tusi Paia?

▪ O afea o le a tupu ai le toetū i se lalolagi parataiso?

▪ Po o le a toe faatutūina uma mai ē ua maliliu e tusa lava po o a latou mea na fai a o ola?

Faamolemole tagaʻi i le itulau pito i tua o lenei mekasini, ia iloa atili ai pe faapefea ona e maua se tali manino mai le Tusi Paia mo nei fesili.

[Ata i le itulau 7]

Na faapea mai Iesu o loo ia “alu atu e fafagu iā te ia [Lasalo] auā o loo moe”

[Ata i le itulau 9]

Maʻeu le olioli o le a iai pe a toe faatutū mai ē pele iā i tatou ua maliliu!