Tala i Aiga Taulau—Vaega Muamua

E pei ona faaalia i lenei mataupu faapitoa o le Ala Mai!, e lē faapea e leai ni faafitauli o aiga manuia. Ma e lē o se mea e ofo ai, auā ua tatou ola i aso o loo taʻua e le Tusi Paia, “o aso e gata ai.” (2 Timoteo 3:1) E mautinoa lava, e tofu aiga ma faafitauli.

Ae ia manatua, o le taulau manuia e lē faalagolago i le lelei atoatoa o tulaga o iai. Ae na fetalai Iesu: “E fiafia o ē e naunau i mea faaleagaga.” (Mataio 5:3) O aiga e tausia o latou manaʻoga faaleagaga e ala i le mulimuli i taʻiala a le Tusi Paia ua latou maua le ala e taulau manuia ai e ui i ni tulaga faigatā. Iloilo faaaʻoaʻoga nei.

Tausia o se atalii e lē atoatoa le malosi. E matuā faatāua e le Tusi Paia le faamuamua o le tausia o tagata o le aiga, e aofia ai i latou e iai manaʻoga faapitoa. Ua taʻua ai e faapea: “O le mea moni, afai e lē tausi e se tasi i ē e tatau ona ia tausia, aemaise lava tagata o lona aiga, ua faafitia e ia le faatuatua, ma e sili lona leaga i lo le tagata e lē faatuatua” 1 Timoteo 5:8.

I le itulau e 15, ua faamatala e Victor, o se tamā mai i Aferika i Saute le auala na la tausia ai ma lona toʻalua le la tama e lē atoatoa le malosi, ua silia ma le fā sefulu ona tausaga.

Ola aʻe o se tamafai. E aogā taʻiala a le Tusi Paia i se tagata e na te lagona ai e aogā o ia, e tusa lava po ua tuulafoaʻia e ona matua moni. Ae ua faapea mai le Tusi Paia, o Ieova le Atua o ia o le “fesoasoani” iā i latou ua aumatuā.—Salamo 10:14.

I le itulau e 16, o loo faamatala e Kenyatta, o se teine talavou mai Amerika, le auala ua ia fesaga’ia ai lagona faanoanoa ona e leʻi feiloaʻi ma ona mātua moni.

Feagai ma le maliu o se matua. O le toesea o se tinā po o se tamā e lagona ai le mafatia ma e faigatā ona teʻa ese. E maua le fesoasoani mai le Tusi Paia. O Ieova lē na tusia le Tusi Paia, o ia o “le Atua o faamāfanafanaga uma.”—2 Korinito 1:3.

I le itulau e 17, o loo faamatala ai e Agela, o se teine talavou i Ausetalia, le auala na fesoasoani ai le la faiā ma Ie Atua e feagai ai ma ona mafatiaga.

E tofu uma aiga ma luʻitau o loo latou fesagaʻia. Ae e pei ona faaalia i tala o loo sosoo mai, o e ē faatatauina taʻiala a le Tusi Paia ua latou maua se auala tāua e fesagaʻia ai na faigatā.

 [Pusa/Ata i le itulau 15]

Tausia o se Atalii e Lē Atoatoa le Malosi

Ua faamatalaina e Victor Maynes, mai Aferika i Saute

“Mai le taimi na fanau ai Andrew, e faalagolago iā i maua e faaofu, faataele, ma fafaga foʻi i nisi taimi. Ua 44 nei ona tausaga.”

NA MA masalosalo e iai se mea e faalētonu iā Andrew ina ua atoa lona tausaga ae leʻi savali. O le taimi lenā na oso ai lona maʻi. Na faatopetope atu o ia i le falemaʻi ma na iloa ai ua maua o ia i le maʻi māliu. Ae e lē gata ai i inā ona faafitauli ona sa faaalia i suʻesuʻega, e faalētonu foʻi ma lona mafaufau.

Ina ua mavae le tele o a ma taumafaiga ona ma iloa lea o le auala e taofia ai le oso o lona maʻi. E fā ana fualaau eseese e inu faatolu i le aso. Ae e lē mafai e fualaau ona faaleleia lona mafaufau. E ui ua 44 ona tausaga, ae e pei o ia o se tamaitiiti e na o le lima pe ono tausaga lona mafaufau.

Na fautua mai fomaʻi e tuu Andrew i se falemaʻi faapitoa. Ae ma te leʻi mananaʻo ai ona sa mafai ona ma tausia o ia ma na ma filifili ai e tausi o ia i le fale e ui ina faigatā.

O lea e tausi o ia e lo matou aiga atoa. E fesoasoani mai le isi vaega o le ma fanau, e toʻalua teine ma le tama sa matou nonofo faatasi, ma ou te faafetai iā i latou mo le fesoasoani! E Molimau a Ieova lo matou aiga, ma sa lagolago malosi mai foʻi nisi o le faapotopotoga. I nisi taimi e saunia meaʻai mo i matou pe e vaai foʻi Andrew a o ma o i le talaʻiga pe faia foʻi nisi feʻau.

E ma te manatua pea le folafolaga a le Atua i le Isaia 33:24, e sau le aso “E lē fai mai foʻi se tasi ua nofo ai: ‘Ou te maʻi.’” E matou te talitonu atoatoa o le a faataunuu e le Atua lana fuafuaga e soloiesea uma maʻi i le lalolagi fou. (2 Peteru 3:13) Matou te tepa taulaʻi i le aso o le a toe malosi ai Andrew. I le taimi nei matou te faatuatua i upu a Iesu, afai e faamuamua le saʻilia o le Malo o le Atua i o matou olaga o le a maua mea e manaʻomia. (Mataio 6:33) Ma o le tulaga moni lenā ua iai. E leai se mea o matou matitiva ai.

O le mea moni, e lē o tagata uma e mafai ona tausia se tagata maʻi faaumiumi. Ae i ē o loo faia faapea e fautua atu ia tatalo faatauanau e lē aunoa. (1 Peteru 5:6, 7) Lona lua, ia tausi lelei ma alofa i lau tama, aua e te manatu māmā faapea e lē iloa e ia alofa iā Ieova le Atua. (Efeso 6:4) Lona tolu, ia faaaafia lou aiga atoa ma tuu atu iā i latou e fesoasoani mai. Lona fā, ia manatua o lou aiga e maua ai e lau tama le alofa moni. O le mea moni e eseese tulaga. E matou te leʻi faanoanoa ona o le tausiga o Andrew i le fale. O ia o se tama e sili ona ou alofa i ai, ma ua ou iloa o ia o se tagata e sili ona alofagia.

 [Pusa/Ata i le itulau 16]

Ola Aʻe o se Tamafai

Ua faamatalaina e Kenyatta Young, mai i Amerika

“Pe afai o oe o se tamaitiiti e ese lou tamā pe e ese lou tinā, o loo iai lava se faiā ma lou matua moni. Ae ona o aʻu o se tamaitiiti fai, e leai la soʻu sootaga faapena. Ou te lē iloa po o ai ou te soo i ai.”

OU TE lē iloa po o ai loʻu tamā ma ou te leʻi feiloaʻi foʻi i loʻu tinā moni. Ina o tō o ia iā te aʻu sa ia faaaogā fualaau faasāina ma le ʻava malosi. Ina ua ou fanau mai, na tausi aʻu e se isi aiga, ma e lē tasi se aiga na ou ola aʻe ai a o leʻi vaetamaina aʻu, ina ua toeitiiti atoa loʻu lua tausaga.

Fai mai loʻu tamā fai, ina ua faaali atu loʻu ata e le tagata e vaaia tamaiti, na manaʻo lava o ia iā te aʻu. Sa ou fiafia lava i loʻu tinā fou. Na ou fai i ai o ia o loʻu tinā moni ma ua ou manaʻo ma te o i le fale.

Ae ou te manatua a o ou laʻitiiti sa ou popole nei ou faia se mea sesē ma toe faafoʻi ai aʻu. Na ou lagona e lē tatau ona ou faaʻūʻū pe maʻi e pei o isi tamaiti ma taumafai foʻi e aua neʻi maua i le fulū! Ae na faailoa mai pea e oʻu matua lo la alolofa ma fai mai e la te lē tuua aʻu.

Seʻi oo lava ina ua ou matua, e iā te aʻu pea le lagona, ou te lē tāua e pei o tamaiti na tausi e o latou mātua moni. Ma ina ua mafai ona ou faaleleia na faalogona ae toe fai mai foʻi se isi iā te aʻu, “E tatau lava ona e faafetaia le lelei o ou mātua ona o lo la lotomalilie e vaetama oe!” Ou te lagona le faafetai, ae o na faamatalaga ou te lagona ai e peiseaʻī e iai se faalētonu iā te aʻu, ma e tele se taumafaiga a oʻu mātua ina ia alolofa iā te aʻu.

E faigatā iā te aʻu ona talia le mea moni ailoga a ou iloa po o ai loʻu tamā moni. I nisi taimi ou te lagona le faanoanoa ona e leʻi taumafai loʻu tinā moni e faaleleia lona olaga ia mafai ai ona ia tausia aʻu, e peiseaʻī e leai soʻu tāua. Ae o isi taimi ou te mafaufau alofa i ai. E masani ona ou faapea, a ma feiloaʻi, ou te fai i ai o loo lelei loʻu olaga ma aua le popole ona o lona avatu o aʻu e vaetamaina.

O oʻu mātua fai o ni Molimau a Ieova, ma o se meaalofa sili ua ou maua mai iā i laʻua o le iloa o le Tusi Paia. Ou te lagona pea le faamāfanafana mai o le Salamo 27:10: “E tusa pe tuua aʻu e loʻu lava tamā ma loʻu lava tinā, ae e talia lava aʻu e Ieova.” Ua moni lea tulaga iā te aʻu. Ma e iai foʻi vala e lelei ai le vaetama. O se faataʻitaʻiga e ese loʻu fiafia i isi tagata ma o latou talaaga ma o latou olaga—masalo ai ona ou te lē iloa loʻu talaga. Ou te alofa i isi tagata ma o se vala tāua lea i le galuega talaʻi. O le avea ma Molimau a Ieova ma aʻoaʻo atu le Tusi Paia, ua ou lagona ai le aogā ma iai se fuafuaga i loʻu olaga. Pe a ou mafatia ou te fesoasoani atu i isi. O le aʻoaʻoina o tagata i le Tusi Paia e matou te masani ai. Ou te fiafia e faalogologo i tala o o latou olaga.

 [Pusa/Ata i le itulau 17]

Feagai ma le Maliu o se Matua

Ua faamatalaina e Angela Rutgers, mai i Ausetalia

“Ina ua maliu loʻu tamā, na ou lagona e pei ua lē toe saogalemu loʻu olaga. Ua lē o toe iai lē sa iloa ma faaleleia mea uma i loʻu olaga.”

UA SEFULU tausaga talu ona maliu loʻu tama, a o ou talavou. I le ono masina a o leʻi maliu, sa faia sona taotoga, ma a o iai i le potu faatali, na fai mai le fomaʻi iā i matou e leai se mea e toe mafai i ai. Na fia malamalama atili loʻu tinā i le mea ua tupu, ma na matapogia loʻu tuagane, ae na lofitūina aʻu i faalogona eseese na oo mai. I le ono masina mulimuli ane na maliu ai loʻu tamā.

Sa ou lagona le lē mautonu. Sa ou manaʻo ia malamalama aʻu uō i le mea o loo tupu iā te aʻu, ae ou te lē manaʻo e mafaufau iā te au o sē ua pagatia. Sa ou taumafai e aua nei o latou iloa oʻu faalogona moni. Ma i le isi itu, na ou faapea a matou fiafia faatasi ma aʻu uō, e foliga mai o loo sologa lelei pea lou olaga, ae e leai. Ou te toe mafaufau i le onosai o nai aʻu uō iā te aʻu!

Po o ou lagona pea le faanoanoa i le maliu o loʻu tamā? Ioe! Maʻimau e pe ana ou toʻaga e fai i ai, “Ou te alofa iā te oe!” Maʻimau e pe ana ou toʻaga e fusi iā te ia ma tele se taimi e ma te faatasi ai. E ui ina ou faapea ifo, ‘E lē manaʻo loʻu tamā ou te mafaufau faapena,’ ae e lē teʻa lea mea ma loʻu mafaufau.

Ona o aʻu o se Molimau a Ieova, ua matuā faamāfanafanaina aʻu i le faamoemoe o le toetū o loo i le Tusi Paia. (Ioane 5:28, 29) Ou te taumafai e mafaufau e faapea, o loo malaga i fafo loʻu tamā ae lē iloa po o afea e toe foʻi mai ai. I le taimi muamua, e lē faamāfanafanaina aʻu pe a fai mai tagata e toe foʻi mai loʻu tamā i le toetū. ‘Pau le mea ou te manaʻo ai, ia foʻi mai loa loʻu tamā!’ Ae ua aogā le talafaatusa, o loo malaga o ia i se isi atunuu, ona o loo faasino i le toetū. Ua mafai ai ona ou feagai ma le leai o se tamā i le taimi nei.

E tele faalaeiauga mai le ʻauuso Kerisiano. Ou te manatua se faamatalaga a se tasi na fai mai iā te aʻu, e lē fia talanoa i le maliu o loʻu tamā ae na ia fai mai o loo ia manatua pea aʻu ma loʻu aiga i taimi uma. Sa ou mafaufau pea i lena faamatalaga. Na aogā iā te aʻu i aso e lē taʻua ai loʻu tamā e se isi, ona na ou iloa ai e tusa lava pe e lē fai mai, ae o loo mafaufau mai iā te aʻu ma loʻu aiga. E ese le tāua o lea mea iā te aʻu!

E fā masina talu ona maliu tamā, na sili atu ona toʻaga loʻu tinā i le talaʻiga ma sa faateleina ai lona fiafia. O lea, na ma galulue faatasi. E uiga ese le aogā o le fesoasoani i isi. E faamalosia ai loʻu faatuatua iā Ieova ma ana folafolaga ma e aogā foʻi iā te aʻu e taulaʻi atu ai i isi mea e sili ona tāua.