Pe e Tatau Ona Avea Fafine ma Faife‘au?
Le Manatu o le Tusi Paia
Pe e Tatau Ona Avea Fafine ma Faifeʻau?
NA TUSI se tasi fafine Katoliko i le nusipepa o le USA Today i Amerika e faapea: “Ua ou ofo ma ou lē fiafia, ona e leʻi suia lava se manatu e faatatau i le faauuina o fafine e avea ma faifeʻau.” E toʻatele tagata e ioe i lona manatu, auā i isi lotu, ua avea ai fafine o faifeʻau, patele, akiepikopō, ma rapi.
O lotu uma o loo fefinauaʻi i le mataupu, pe tatau ona avea fafine ma faifeʻau ma lauga mai i luga o le pulelaa, ua faapea mai o loo latou mulimuli i le Tusi Paia. Peitaʻi, e lē o lagolagoina e le Tusi Paia lenā manatu. Aiseā e lē lagolagoina ai e le Tusi Paia? Ina ia maua le tali, seʻi o tatou iloiloina muamua le auala o loo faaaogā ai i le Tusi Paia le upu “faifeʻau.”
Faifeʻau i le Uluaʻi Senituri
O le ā le uiga o le upu “faifeʻau” iā te oe? E vave lava ona manatu le toʻatele i se taʻitaʻi lotu, o se tane po o se fafine o loo taʻimua i tapuaʻiga a se faapotopotoga. Ae, e lautele le uiga o loo faaaogā ai le upu i le Tusi Paia. Seʻi manatu foʻi i le fafine Kerisiano o Fipe, o lē na faailoa atu e le aposetolo o Paulo e faapea, o “lo tatou tuafafine, o ia o se auauna [po o se faifeʻau] i le faapotopotoga i Kenikerea.”—Roma 16:1.
Po o lona uiga e tū Fipe i luma o le faapotopotoga i Kenikerea, e taʻimua i se sauniga faalelotu? O le ā tonu le auaunaga na faia e Fipe? I lana tusi i Kerisiano i Filipi, na taʻua ai e Paulo nisi o fafine e faapea, “o ē na matou galulue faatasi . . . e talaʻia le tala lelei.”—Filipi 4:2, 3.
O le auala autū na faasalalau atu ai e Kerisiano i le uluaʻi senituri le tala lelei, e agaʻi i le “lautele, ma mai lea fale i lea fale.” (Galuega 20:20) O ē na faia lenā galuega, o faifeʻau. Na aofia ai fafine e pei o Pisila. O i laʻua ma lana tane ‘na faamatala atili atu ma le saʻo le ala o le Atua’ i se tagata e mataʻu i le Atua, a o leʻi papatisoina o ia e avea ma Kerisiano. (Galuega 18:25, 26) E mautinoa foʻi na pei Pisila o Fipe, i le avea ma faifeʻau maelega, e pei foʻi o le toʻatele o isi fafine.
O se Matafaioi Mamalu
Po o lona uiga e faatauvaa le faiva o le talaʻi atu i le lautele, ma e na o fafine e tofia i ai, ae e faia e tane le galuega tāua o le vaavaaia o le faapotopotoga? E leai, ma e lua māfuaaga e leai ai. Muamua, ua faamanino mai i le Tusi Paia e faapea, o Kerisiano uma e aofia ai tane o loo iai tiute tauave tāua i le faapotopotoga, e tatau ona auai i le talaʻiga i le lautele. (Luka 9:1, 2) Lona lua, sa avea, ma o loo avea le talaʻiga i le lautele, ma auala autū e faataunuu ai e tane ma fafine Kerisiano le poloaʻiga a Iesu ia ō atu “e fai tagata o nuu uma lava ma soo, . . . ma ia aʻoaʻoina i latou.”—Mataio 28:19, 20.
E iai foʻi se isi vaega tāua ua faia e nisi fafine i le faapotopotoga. Na tusi Paulo: “O fafine ua matutua, ia . . . aʻoaʻo atu i mea lelei; ina ia fesoasoani i fafine talavou ia toe sagatonu o latou mafaufau, ina ia alolofa i a latou tane ma a latou fanau.” (Tito 2:3, 4) O lea, o fafine matutua ua lava le poto masani i le olaga faa-Kerisiano, ua maua le faaeaga e fesoasoani atu i fafine talavou ma i latou e leai se poto ina ia matutua faaleagaga. E tāua ma mamalu lenā matafaioi.
Aʻoaʻo atu i le Faapotopotoga
Ae peitaʻi, e lē o faatonuina i le Tusi Paia fafine e tutū i luma o le faapotopotoga ma aʻoaʻo mai. Ae na faatonuina i latou e le aposetolo o Paulo “ia aua neʻi tautatala i faapotopotoga.” Aiseā? O se tasi o māfuaaga na taʻua e ia, ina ia faia ai mea uma “i se tulaga talafeagai ma le maopoopo.” (1 Korinito 14:34, 40) Ina ia sologa lelei le faagaoioiga o le faapotopotoga, e na o le tasi le vaega ua tofia i ai e le Atua le matafaioi o le aʻoaʻo atu. Ia mātau foʻi, e lē o tuuina atu i se tagata le faaeaga e vaavaaia le faapotopotoga ona o ia o se tane; ae e na o tane ua agavaa lelei e tuuina atu i ai. *—1 Timoteo 3:1-7; Tito 1:5-9.
Po ua faatauvaa ai le vaega ua tofia atu e le Atua i fafine? E leai. Ia manatua, ua tofia i latou e le Atua i se galuega e sili ona tāua; o le molimau atu lea i le lautele e uiga iā te ia. (Salamo 68:11) Ua avea tane ma fafine Molimau a Ieova i aso nei o faifeʻau i le lautele, ma ua fesoasoani ai i le faitau miliona o tagata, ina ia salamō ma maua le faaolataga. (Galuega 2:21; 2 Peteru 3:9) E tāua tele lenā galuega!
O lenei faatulagaga e maua ai e tane ma fafine le filemu a o latou faaalia le faaaloalo o le tasi i le isi. O se faataʻitaʻiga: E galulue faatasi mata ma taliga o se tagata e fesoasoani iā te ia a o sopoʻia se auala pisi. Ua faapena foʻi pe a faataunuuina e tane ma fafine le finagalo o le Atua e tusa ai ma vaega ua tofia atu iā i latou, ma e faamanuia e le Atua le faapotopotoga i le filemu.—1 Korinito 14:33; Filipi 4:9. *
[Faaopoopoga i lalo]
^ pala. 13 Ia mātau foʻi, e faatapulaa le pule a se tagata i le faapotopotoga. E gauaʻi atu o ia iā Keriso ma ia gaoioi e ōgatusa ma taʻiala i le Tusi Paia. (1 Korinito 11:3) E tatau foʻi iā i latou e iai tiute tauave i le faapotopotoga, ona “gauaʻi le tasi i le isi,” ia faaalia le agaga o le lotomaulalo ma le felagolagomaʻi.—Efeso 5:21.
^ pala. 15 O le faaaloalo o fafine Kerisiano i le vaega ua tofia atu e le Atua i tane i le faapotopotoga, ua avea ai foʻi i latou o ni faaaʻoaʻoga lelei i agelu i le lagi.—1 Korinito 11:10.
PO O E TAUMĀNATU EA I NISI TAIMI?
● Na faapefea ona aʻoaʻo atu fafine i le uluaʻi faapotopotoga Kerisiano?—Galuega 18:26.
● O ai ua tofia e vaavaaia le faapotopotoga?—1 Timoteo 3:1, 2.
● O le ā le silafaga a le Atua i le auaunaga a fafine Kerisiano i aso nei?—Salamo 68:11.
[Faamatalaga faaopoopo i le itulau 27]
“Ua tulei mai le afioga a Ieova; o fafine e folafola atu le tala lelei, o le ʻautau e toʻatele i latou.”—SALAMO 68:11