Auala Ina ia Atili ai Ona Tatou Faia Le Mea Tonu

E FINAGALO Lē na faia i tatou ia tatou fiafia, ia maua le filemu o le mafaufau, ma ia saosaolaumea i le mauaina e isi o le fiafia. O lea la, ua ia talosaga mai iā i tatou ia ʻfaia le mea ua tonu ma ia fiafia i le agalelei.’ (Mika 6:8) E faapefea ona tatou faia faapea? E manaʻomia ona tatou atiaʻe uiga ia o le a taofia ai i tatou mai le faia o mea e lē tonu. Seʻi iloilo le auala e fesoasoani mai ai le Tusi Paia iā i tatou ina ia faia lenā mea.

MANUMALO I LE MATAPEʻAPEʻA. O le auupega e sili ona malosi faasaga i le matapeʻapeʻa o le alofa—e lē na o ni faalogona ootia po o le alofa fetosinaaʻi i le va o le tama ma le teine—ae o le alofa faataulagaina mo isi. Ua taʻua i le 1 Korinito 13:4, 5 o lenā “alofa e . . . agalelei,” ma “e lē saʻili mo lona lava lelei.” E lē gata i lea, o lenei alofa e lē na o le aiga ma uō e faaalia i ai. Na fesili Iesu, “o le ā se taui tou te maua pe afai tou te alolofa atu i ē o alolofa mai iā te outou?” ma faapea atili mai e oo lava i ē e lē iloa le Atua, e alolofa foʻi i ē e alolofa mai iā i latou.—Mataio 5:46.

MANUMALO I LE FAAILOGA TAGATA. Ua faapea mai le Galuega 10:34, 35: “E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.” E lē faamasinoina e le Atua tagata e faavae i o latou lanu, tulaga faaletagata po o le itupā. I lana silafaga, “e leai se Iutaia po o se Eleni, e leai se pologa po o sē e saʻoloto, e leai foʻi se tane po o se fafine.” (Kalatia 3:28) Pe a tatou faaaʻoaʻo i le Atua, o le a tatou manumalo i le faailoga tagata. Seʻi iloilo le faaaʻoaʻoga a Dorothy, o lē e nofo i le Iunaite Setete.

Na matuā lē fiafia Dorothy ona o faiga faailoga tagata, o lea na manaʻo ai e auai i se solo tetee o tagata e iai ni auupega, ina ia faamuta ai mafatiaga ona o tagata uli o loo faapologaina. Peitaʻi i lenā taimi, sa auai ai i se sauniga faa-Kerisiano a Molimau a Ieova, ma na matuā ofo ona sa faafeiloaʻia ma le māfana o ia e tagata uli ma tagata papaʻe. E leʻi umi ae ia iloaina, e na o le Atua e mafai ona suia le tagata i totonu. Ina ua ia tofo i le alofa moni o Molimau a Ieova papaʻe—o tagata sa ia faapea mai “o le a ia lē faatalatū e fasiotia ina ia atili ai ona tupu se solo tetee”—sa “pāʻia” lona loto ma matuā tagi lotulotu ai.

 MANUMALO I UIGA E LĒ FIA MAFUTA MA ISI. A o leʻi avea ma Kerisiano, o nisi o uluaʻi soo o Iesu sa avea ma ē onanā, ē gāoi, ē fouvale ma ē e fai upu masoā. Peitaʻi, o le fesoasoani a le Atua na suia ai na uiga lē lelei i le alofa, agalelei ma le mataalofa. (1 Korinito 5:11; 6:9-11; Kalatia 5:22) I aso foʻi nei, e faitau miliona tagata ua faia suiga lelei i o latou olaga e ala i le tapuaʻi atu i le Atua. O se faaaʻoaʻoga o Firuddin, o lē e nofo i Azerbaijan.

Na ola aʻe Firuddin i se nofoaga mo tamaiti mātuaoti, lea e masani ona fufusu ai ma isi tamaiti. Ina ua matua, sa avea o ia ma faiaʻoga i le faafetaiaʻia o fetauaʻiga. Ua ia faapea mai: “Sa ou lē mafaufau, limatētē ma faasauā. Afai e galo i laʻu avā o Zahra se mea i le taimi e aai ai—e oo lava i se mea tuitui nifo—ou te fasia o ia. Ma afai e tilotilo mai i laʻu avā se tamāloa a o ma savavali faatasi atu, ou te fasia foʻi lenā tamāloa!”

I se tasi aso, na pāʻia le loto o Firuddin ina ua ia aʻoaʻoina na ōle atu Iesu i le Atua, ia faamagalo fitafita na faatautauina o ia. (Luka 23:34) Na manatu o ia e faapea: ʻE na o le Alo o le Atua e mafai ona faia lenā gaoioiga.’ Mulimuli ane, na amata ona ia aʻoaʻoina atili e uiga i le Atua. Ina ua ofo atu Molimau a Ieova e fesoasoani iā te ia, sa ia talia ma le lotomalie se suʻesuʻega faale-Tusi Paia. E leʻi umi ae amata ona faaleleia ona uiga. Sa matuā agalelei o ia iā Zahra ma amata foʻi ona ia suʻesuʻeina le Tusi Paia. I le taimi nei ua autasia ma le filemu i laʻua i le tapuaʻiga moni.

E moni o suiga atonu o loo tatou faia i o tatou lava olaga o le a lē mafai ona foʻia ai faiga lē tonu i le lalolagi atoa! Ae faapefea pe afai e finagalo le Atua e aumai se lalolagi fou amiotonu? E mautinoa e iai lona mana! Ma seʻi mafaufau i le manatu lenei: I le 2 Timoteo 3:1-4, lea na sii mai i le amataga o le mataupu ua mavae atu, ua tatou iloa ai na valoia ma le manino i le Tusi Paia amioga po o le tulaga o le a iai tagata i le lautele i o tatou aso. Ua faataunuuina lenā valoaga i se tulaga auʻiliʻili—e pei lava foʻi o le tele o isi valoaga o le Tusi Paia. O lea la, e lē faapogisaina i tatou e ala i le maufaatuatuaina o le folafolaga a le Atua e faaiʻuina faiga lē tonu uma. O le mea moni, o le a faataunuuina e le Atua lenā fuafuaga. E faapefea?

[Pusa/Ata i le itulau 7]

SAʻILIA E HEIDE LE AMIOTONU

Ua taʻua e Heide, o lē e nofo i le Iunaite Setete: “Sa ou lē fiafia i le faailogalanu, taua, mativa ma isi faiga lē tonu, ma na ou saʻilia se vaifofō. Sa ou taumafai e galue i le vaega e tausia aiā tatau ma oo lava ina ou auai i se vaega o faiga faapolotiki, peitaʻi e foliga mai e leʻi mafai ona foʻia ai faiga lē tonu.

“Na ou lagona sa manaʻomia se suiga tele, ma sa foliga mai na taulau le vaega o le ʻau hippie. Peitaʻi, na faamaonia foʻi e lē taulau lenā vaega. Na ou iloaina o le toʻatele o le ʻau hippie sa matuā fiafia i feusuaʻiga lē mamā, vailaau ma fualaau faasāina, ma ola i se olaga soonafai nai lo o le faia o se suiga—o se mea na ou matuā lē fiafia ai. Ona ou feiloaʻi lea i se tasi o Molimau a Ieova. Sa ia faaali mai iā te aʻu mai i le Tusi Paia suiga ua folafola mai o le a faia e le Atua. Mo se faataʻitaʻiga, na ia faaali mai iā te aʻu mau e pei o le Faaaliga 21:3, 4, lea e faapea mai o le a soloiesea e le Atua loimata mai i mata o tagata uma ma aveesea le faanoanoa, tagiauē ma le tigā—e masani lava e māfua mai i faiga lē tonu. Na ou fesili ifo iā te aʻu lava, ʻPo o le a taunuu moni lava na folafolaga?’

“Na ou mautinoa o le a taunuu moni nei folafolaga ina ua ou faitau i le mea o loo taʻua i le Tusi Paia, e faatatau i le mana o le Atua ma lona alofa, ma tofo i le alofa o loo faaalia e Molimau a Ieova. O loo oʻu faatalitali nei ma le naunautaʻi i le faataunuuga o folafolaga a le Atua.”

[Ata i le itulau 6]

E tatou te manumalo i le faailoga tagata pe a tatou faaaʻoaʻo i le alofa o le Atua

[Ata i le itulau 6]

O Firuddin ma lana avā o Zahra