MATAUPU AUTŪ
O le ā ea le Aogā e Ola Ai?
PE A e feiloaʻi iā Taiana, * e te iloa ai o ia o se tamaʻitaʻi atamai, faaleuō ma e tauagafau. Peitaʻi e lilo i manatu, e tele ina iai ona faalogona ootia ma lotovaivai. Na faapea mai o ia: “O aso uma ou te mafaufau ai e sili ai le oti, ma ou te talitonu e leai se aogā ou te ola ai.”
ʻUa faaalia mai i nisi o suʻesuʻega, mai i le tagata e toʻatasi e oti i le pule i le ola, e 200 isi na taumafai, ae e 400 isi na mafaufau e faia faapea i le taimi lava e tasi.’—THE GAZETTE, MONTREAL, CANADA.
Na taʻua e Taiana e lē fia pule i lona ola. Peitaʻi, e iai taimi e mafaufau ai e leai se aogā e ola ai. Na faapea mai o ia: “Ou te talotalo lava ia tupu se faalavelave faafuaseʻi ma ou oti ai, ma ou te manatu i le oti o se uō ae e lē o se fili.”
E toʻatele tagata e tutusa o latou faalogona ma Taiana, ma o nisi o i latou na mafaufau pe taumafai foʻi e pule i o latou ola. Ua taʻua e nisi tagata atamamai, o le toʻatele o nei tagata, e lē mananaʻo moni e feoti ae e mananaʻo e faamuta mea o loo mafatia ai. O lea la, nai lo le pule i le ola e ao ona latou iloa māfuaaga e tatau ona ola ai pea.
O le ā ea le aogā e ola ai? Seʻi o tatou iloilo ni māfuaaga se tolu e tatau ona ola ai pea.
^ pala. 3 Ua suia igoa.
