A O LEʻI oo i aso o Galileo, e toʻatele tagata na talitonu e taamilo le lā, paneta, ma fetu i le lalolagi. Na avea lenā talitonuga ma aʻoaʻoga aloaʻia a le Lotu Katoliko.

Peitaʻi, na faaaogā e Galileo se faata vāai mamao, ma na ia vaaia ai ni faamaoniga i le vateatea e feteenaʻi ma aʻoaʻoga faasaienisi na talia e le toʻatele. O se faaaʻoaʻoga, a o ia vaai atu i le lā, e foliga mai e iai ave o le lā e pāpā ma lelea, ma e iloa ai o loo taamilo faatafa le lā. O vaaiga faapea na atili ai ona alualu i luma le iloa o tagata i le vateatea, ae na iʻu ai foʻi ina feeseeseaʻi Galileo ma le Lotu Katoliko.

I le faitau sefulu tausaga i luma atu, na iai se tagata Polani e igoa iā Nicolaus Copernicus, na suʻesuʻeina fetu. O ia na faavaeina le manatu e taamilo le lalolagi i le lā. Sa suʻesuʻe e Galileo saʻiliʻiliga a Nicolaus i le fegasoloaʻiga o mea i le vateatea, ma na ia maua faamaoniga e ōgatusa ma na saʻiliʻiliga. E leʻi manaʻo Galileo e faailoa i le lautele mea na ia mātauina,  ona o lona popole ina neʻi tauemua ma teena e tagata ona manatu. Peitaʻi, e leʻi mafai ona taofia lona naunau i mea na ia vaaia i lana faata vāai mamao, ma iʻu ai ina ia faailoa atu i le lautele. Na matuā lē fiafia nisi saienitisi i ona manatu, ma sa taʻuleagaina e faifeʻau Galileo i a latou lauga.

I le 1616, na faailoa atu ai e Katinale Bellarmine, “o sē e iloga i mataupu faalelotu i lenā vaitaimi,” iā Galileo le tulafono fou a le Katoliko e faasaga i manatu o Nicolaus. Sa ia matuā uunaʻia Galileo e usitaʻia lenā tulafono, ma e tele tausaga e leʻi toe faailoa atu e Galileo i le lautele e faapea e taamilo le lalolagi i le lā.

I le 1623, na tulaʻi mai ai i le tofi ia Pope Urban VIII, o le uō a Galileo. I le 1624, na talosaga ai Galileo i le pope ina ia faalēaogā le tulafono na faia i le 1616. Peitaʻi, na fautuaina e Urban ia Galileo e faamalamalama saʻiliʻiliga feteenaʻi a Nicolaus ma Aristotle, i se auala e lē faaituʻau.

O lea na tusia ai e Galileo le tusi Dialogue on the Great World Systems. E ui na faatonu e le pope ia Galileo e aua le faaituʻau, ae na lagolago e lana tusi manatu o Nicolaus. E leʻi umi ae faapea mai fili o Galileo, o loo faifai lana tusi i le pope. Talu ai na tuuaʻia Galileo i le faatautee ma na faamataʻuina o le a sauāina, o lea na faamalosia ai o ia e teena aʻoaʻoga a Nicolaus. I le 1633, na faasala ai Galileo e le Faamasinoga Faalelotu a Roma, e ala i le faanofo vaavaaia o ia i le fale ma faasā ana tusitusiga. Na maliu Galileo iā Ianuari 8, 1642, i lona aiga i Arcetri, e latalata i Florence.

E faitau selau tausaga o iai pea nisi o tusi a Galileo, i le lisi o tusi sa faasā ona faitau i ai tagata Katoliko. Ae i le 1979, na toe iloilo ai e le ekalesia le faaiʻuga na faia e le Faamasinoga Faalelotu a Roma i le 300 tausaga muamua atu. I le 1992, na faailoa mai ai e Pope John Paul II, na sesē le faasalaina o Galileo e le Lotu Katoliko.