1. Faaipoipoga

E eseese manatu o tagata e faatatau i le faaipoipoga ma le auala e maua ai se faaipoipoga fiafia.

LE UIGA: Talu ai o le faaipoipoga o se faatulagaga na faavaeina e le Atua, e na te silafia la le auala e maua ai e se ulugalii le fiafia. (Mareko 10:​6-9) E maua e se ulugalii le fiafia, pe afai e uaʻi atu le tasi i manaʻoga o le isi, nai lo o manaʻoga o le tagata lava ia. O se tane e alofa i lana avā, e feutagaʻi ma ia i se auala agalelei ma faapelepele. Ae o se avā e faaaloalo i lana tane, e tautala ma gaoioi i se auala agalelei.

E AOGĀ TAʻIALA A LE TUSI PAIA: Na manatu Quang ma Thi mai Vietiname, e lē mafai ona fiafia le la faaipoipoga. E leʻi agalelei Quang ma na ia faapea mai: “Ou te leʻi manatu mamafa i faalogona o Thi, ma e masani ona ou faalumaina o ia.” Na manaʻo Thi e tatala le la faaipoipoga, ma na ia faapea mai: “Na ou mafaufau e lē mafai ona ou toe faaaloalogia pe talitonuina laʻu tane.”

Mulimuli ane, na iloa e Quang ma Thi le aʻoaʻoga a le Tusi Paia ma le auala e faatatau ai le Efeso 5:33 i le la faaipoipoga. Na faapea mai Quang: “Na ou iloa mai lenei mau le tāua o le agalelei, alofa, ma le manatu mamafa iā Thi i le itu faaletino ma le itu tau faalogona. Ina ua ou faia na mea, na amata ai ona alofa ma faaaloalo laʻu avā iā te aʻu.” Na faapea mai foʻi Thi, “O le tele lava na ou faatatauina ai le Efeso 5:33 ma faaalia le faaaloalo i laʻu tane, o le tele foʻi lenā o loʻu lagonaina o le filemu, malupuipuia ma le alofa o laʻu tane iā te aʻu.”

 2. Feutagaʻiga ma Isi

E masani ona faileagaina isi tagata ona o o latou ituaiga, atunuu, foliga vaaia, tapuaʻiga po o le itupā e tosina i ai.

LE UIGA: E lē faalaeiauina e le Tusi Paia lo tatou ʻinoʻino i se tagata ona o lona lanu, atunuu, pe faia faiga faatauatane ma le tauafafine. Peitaʻi, o loo faalaeiauina ai i tatou ina ia faaaloalo i ituaiga uma o tagata, e tusa lava po o ā o latou ituaiga, atunuu, po o tulaga tau tamaoaiga. (Galuega 10:34) E tusa lava pe e tatou te lē ioe i manatu po o amioga a isi, ae e tatau lava ona feutagaʻi ma i latou i se auala agalelei ma faaaloalo.—Mataio 7:12.

E AOGĀ TAʻIALA A LE TUSI PAIA: Na aʻoaʻoina Daniel e manatu, o tagata mai i Asia e mafai ona aumaia ni aafiaga lē lelei i lo latou atunuu. Na ita o ia i so o se tasi mai i Asia, ma e masani ona ia faia ni tala po o gaoioiga faatigā iā i latou i luma o le lautele. Na faapea mai Daniel, “Na ou taʻutonuina aʻu gaoioiga e faapea o loo oʻu ʻlagolagoina loʻu atunuu.’ Ou te leʻi manatu o loo sesē aʻu gaoioiga.”

A o faagasolo taimi, na iloa ai e Daniel le aʻoaʻoga a le Tusi Paia. Na ia faapea mai, “Na tatau ona suia atoatoa le auala ou te mafaufau ai, ma vaai i tagata e pei o le auala e silasila i ai le Atua. E tutusa ituaiga uma o tagata e tusa po o fea e ō mai ai.” Ua faamatalaina e Daniel ona faalogona i le taimi lenei pe a feiloaʻi ma tagata e faapea, “Ou te lē o toe popole po o fea e sau mai ai se tagata. Ua ou alofa i so o se tagata, ma ua tele aʻu uō vavalalata mai i so o se vaipanoa o le lalolagi.”

 3. Tupe

E toʻatele tagata ua taumafai e mauʻoa, ina ia maua ai se olaga lelei ma fiafia.

LE UIGA: E ui e aogā tupe, ae e lē faalagolago ai lo tatou mauaina o le fiafia po o se lumanaʻi lelei. (Faataoto 18:11; 23:​4, 5) Nai lo o lea, e faalagolago le fiafia moni ma le mauaina o se lumanaʻi lelei, i le faatatauina o le atamai mai i le Atua o loo i le Tusi Paia.—1 Timoteo 6:​17-19.

E AOGĀ TAʻIALA A LE TUSI PAIA: O Cardo o se tamāloa i Indonesia na uaʻi i le saʻilia o le tele o ʻoa. Na ia faapea mai, “Na ou maua mea na moomoo ai isi tagata. Na ou malaga i isi atunuu ma faatau mea taugatā, o taavale, ma fale.” Peitaʻi, e leʻi tumau le aogā o ana tupe. Na taʻua e Cardo, “Na faasesēina aʻu e se tasi, ma na pei o le emo o le mata le mou atu o aʻu tupe na ou galue mamafa ai mo le tele o tausaga. Na alu loʻu taimi i le saʻilia o ʻoa, ae uma aʻe ua gau uma ai aʻu tupe ma lagona ai le lē aogā.”

Na faatatau e Cardo le fautuaga a le Tusi Paia e faatatau i tupe, ma e lē o toe alu uma lona malosi i le saʻilia o ʻoa, ae ua ia filifili e ola i se olaga faigofie. Na faapea mai Cardo, “O le ʻoa sili lava ona lelei ma tumau, o ʻoa faaleagaga. Ua lelei laʻu moe i le pō ma ua ou maua le fiafia moni.”

 4. Feusuaʻiga

E tele manatu eseese o tagata e faatatau i feusuaʻiga.

LE UIGA: I le Tusi Paia, o loo faailoa mai ai tapulaa mo feusuaʻiga. O le faaupuga “amioga lē mamā taufeusuaʻiga,” e aofia ai le mulilua, o faiga faatalitane, feusuaʻiga i le vā o tagata e leʻi faaipoipo, tauatane, tauafafine, ma feusuaʻiga ma manu. (1 Korinito 6:​9, 10) O feusuaʻiga o se meaalofa mai i le Atua mo na o tane ma fafine ua faaipoipo.—Faataoto 5:​18, 19.

E AOGĀ TAʻIALA A LE TUSI PAIA: Na taʻua e se tamaʻitaʻi Ausetalia e igoa iā Kylie: “A o ou nofofua, na ou mafaufau ai o le faia o feusuaʻiga o le a lagona ai le alofagia ma le malupuipuia. Peitaʻi, na uma ane ua ou lagona ai le lē mautonu ma le faanoanoa.”

Mulimuli ane, na iloa ai e Kylie le aʻoaʻoga a le Tusi Paia e faatatau i feusuaʻiga ma ia faatatauina loa. Na ia faapea mai, “O tapulaa a le Atua e puipuia ai i tatou mai i le oo atu i faalogona tigā ma le faanoanoa. Ua ou lagona le malupuipuia ma le alofagia ona o le faia o mea i le auala a Ieova. O le faatatau o taʻiala a le Tusi Paia, ua ou ʻalofia ai le oo atu i faalogona tigā.”