PE E MAFAI ONA E FILIFILIA LOU LUMANAʻI? E talitonu nisi tagata e lē mafai e ā tatou filifiliga ona pulea o tatou olaga, ona ua uma ona tuupōina. Pe a latou lē taulau i le ausia o ni sini patino e latou te manatu e leai se mea e mafai ona fai i ai. E latou te faapea mai, “Ua uma ona tuupōina e lē tatau ona ou ausia na sini.”

O nisi e matuā lotovaivai ona o faiga lē tonu a le lalolagi o loo tatou ola ai. Atonu na latou taumafai muamua e faaleleia le tulaga o o latou olaga, peitaʻi na faalēaogāina na taumafaiga ona o taua, soligatulafono, mala faalenatura, ma faamaʻi. Ua latou fesili ifo iā i latou lava, ʻAiseā e popole ai fua i na mea?’

E moni o mea e tutupu i le olaga e mafai ona aafia ai ā tatou fuafuaga. (Failauga 9:11) Peitaʻi, pe a talanoaina le faamoemoe mo le lumanaʻi, e mafai ona fai i ai sau filifiliga. Ua faailoa mai i le Tusi Paia e faalagolago lou lumanaʻi i au filifiliga fai. Seʻi iloilo manatu o loo taʻua ai.

A o toetoe ulu atu le nuu anamua o Isaraelu i le Nuu Folafolaina, na fetalai atu Mose i le suafa o Ieova iā i latou e faapea: “Ou te tuuina atu le ola ma le oti i ou luma, o le manuia ma le malaia; ma ia e filifili i le ola ina ia e ola ai pea, o oe ma lau fanau, e ala i le alofa iā Ieova lou Atua, e ala i le faalogo i lona siʻufofoga ma pipii atu iā te ia.”​—Teuteronome 30:15, 19, 20.

“Ou te tuuina atu le ola ma le oti i ou luma, o le manuia ma le malaia; ma ia e filifili i le ola.”​—Teuteronome 30:19

Ioe, na faasaoina e le Atua le nuu o Isaraelu mai i le nofo pologa i Aikupito, ma tuu atu iā i latou le faamoemoe o se olaga saʻoloto ma fiafia i le Nuu Folafolaina. Peitaʻi e lē faafuaseʻi ona tupu na mea. Ina ia maua na faamanuiaga, na tatau ona latou “filifili i le ola.” E faapefea? ʻE ala i le alofa i le Atua, faalogo i lona siʻufofoga, ma pipii atu iā te ia.’

I aso nei, ua tuuina mai foʻi iā te oe se filifiliga, ma o lau filifiliga e faalagolago i ai lou lumanaʻi. Afai e te filifili e alofa i le Atua, faalogo i lona siʻufofoga ma pipii atu iā te ia, ua e filifili la i le ola, o le ola lea e faavavau i se lalolagi parataiso. O le ā e aofia ai i na vala taʻitasi?

O le alofa o le uiga autū lea o le Atua. Na faagaeeina le aposetolo o Ioane e tusi e faapea, “O le Atua o le alofa lava ia.” (1 Ioane 4:8) O lea, ina ua fesiligia Iesu po o le ā le poloaʻiga silisili, na tali atu o ia: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.” (Mataio 22:37) O se faiā moni ma Ieova le Atua e tatau ona faavae mai i le alofa, ae e lē o le fefe po o le usiusitaʻi e faatagāfai. Aiseā la e tatau ai ona tatou filifili e alolofa iā te ia?

Ua pei le alofa o Ieova mo tagata o le alofa o mātua mo a latou fanau. E ui e lē lelei atoatoa mātua, ae e latou te faatonu, faalaeiau, lagolagosua, ma avatu aʻoaʻiga i fanau ona o lo latou faanaunauga ia fiafia ma ola manuia le fanau. O le ā se mea o mananaʻo i ai mātua mai i fanau? E mananaʻo ia alolofa mai le fanau iā i latou, ma ia goto i o latou loto mea na aʻoaʻoina ai mo lo latou lelei. Pe ua lē talafeagai ai ona faatalitalia e lo tatou Tamā faalelagi lo tatou talisapaia mo mea uma ua ia faia mo i tatou?

I le uluaʻi gagana na tusia ai le Tusi Paia, o le upu “faalogo”e masani ona aofia ai le manatu ia “usiusitaʻi.” O le uiga moni lenā o le faaupuga “Ia faalogo i ou mātua,” lea e fai atu i se tamaitiiti. O lea, o le faalogo i le siʻufofoga o le Atua e uiga atu i le aʻoaʻoina ma usitaʻia mea ua ia fetalai mai ai. E ui e lē mafai ona tatou lagonaina le siʻufofoga o le Atua, ae e tatou te faalogo atu iā te ia e ala i le faitau ma faatatauina mea o loo taʻua i lana Afioga le Tusi Paia.​—1 Ioane 5:3.

Ina ia faaalia le tāua o le faalogo i le siʻufofoga o le Atua, na fetalai ai Iesu e faapea: “E lē na o meaʻai e ola ai le tagata, ae o afioga uma e tulei mai i le fofoga o Ieova.” (Mataio 4:4) E pei lava ona aogā meaʻai faaletino iā i tatou, e faapena foʻi ona sili atu le aogā o le aʻoaʻoina o le poto i le Atua. Aiseā? Na faamatala e le Tupu poto o Solomona e faapea: “Ua fai le atamai ma puipuiga, ua fai foʻi tupe ma puipuiga; a o le aogā o le poto atoa ai ma le atamai, e faaolaina ai i latou ua mauaina.” (Failauga 7:12) O le poto ma le atamai mai i le Atua e mafai ona puipuia ai i tatou i aso nei, ma fesoasoani iā i tatou ina ia faia ai filifiliga atamai lea e iʻu atu ai i le mauaina o le ola e faavavau i le lumanaʻi.

Seʻi toe tomānatu i le tala faatusa a Iesu lea na tatou talanoaina i le mataupu ua mavae, lea na ia faapea mai ai: “E vaitiiti le faitotoʻa ma e lauitiiti foʻi le auala e tau atu i le ola, e toʻaitiiti foʻi i latou o ē e maua.” (Mataio 7:13, 14) E mautinoa e tatou te maua aogā pe a maua se tasi e masani i lenā auala ma pipii atu iā te ia pe afai e tatou te mananaʻo e maua le ola e faavavau. O lea, e iai māfuaaga lelei mo i tatou e pipii atu ai i le Atua. (Salamo 16:8) E faapefea la ona tatou faia lenā mea?

I aso taʻitasi, e tele mea e tatau ona tatou faia ae e tele foʻi isi mea e tatou te mananaʻo e fai. O na mea e mafai ona avea ma mea e faalavelavea ai, ma itiiti pe leai foʻi se taimi e mafaufau ai e faatatau i mea o loo faafinagaloina e le Atua mai iā i tatou. O le māfuaaga lenā ua lapataʻia ai i tatou i le Tusi Paia e faapea: “Ia outou matuā faautauta ina neʻi outou savavali e pei o ē e vālea, ae ia pei o ē e atamamai, ia outou faaaogā tatau le taimi, auā o aso nei ua leaga.” (Efeso 5:15, 16) E tatou te pipii atu i le Atua e ala i le avea o la tatou faiā ma ia o le mea e sili ona tāua i o tatou olaga.​—Mataio 6:33.

E ui e lē mafai ona suia mea na e faia i le taimi ua teʻa, ae e iai mea e mafai ona fai ina ia e maua ai ma i latou e te alofa i ai se lumanaʻi matagofie. Ua faailoa mai i le Tusi Paia le matuā alofa o lo tatou Tamā i le lagi o Ieova le Atua iā i tatou, ma faailoa mai iā i tatou mea e tatau ona tatou faia e ōgatusa ma lona finagalo. Mātau upu a le perofeta o Mika:

“Le tagata e, ua ia fetalai mai iā te oe le mea lelei. O le ā foʻi se mea ua finagalo ai Ieova mai iā te oe, pe e lē o le faia o le mea ua tonu, ia fiafia i le agalelei, ma ia savavali ma lou Atua ma le faamaulalo?”​—Mika 6:8.

Po o le a e taliaina le valaaulia a Ieova, ia savavali faatasi ma ia ma maua le ola e faavavau ua ia faataatia mo i latou e faia faapea? O oe lava e faia le filifiliga.