Sa ou fanau i se nuu i Saxony, lea sa avea muamua o se vaega o le Malo Faatemokalasi o Siamani (GDR). Sa filemu ma māfana le siʻomaga sa iai i lo matou aiga, ma na aʻoaʻoina aʻu e oʻu mātua i amioga tatau. Sa avea le GDR o se Malo faa-Komunisi, o lea na manatu ai le toʻatele i Saxony e lē tāua lotu, ma ou te leʻi talitonu e iai se Atua. I tausaga muamua e 18 o loʻu olaga, e lua ni manatu na matuā telē se aafiaga iā te aʻu, o le lē talitonu i se Atua ma le faa-Komunisi.

Aiseā na ou fiafia ai i le faa-Komunisi? Talu ai sa ou fiafia i le manatu e tutusa tagata uma. Sa ou talitonu foʻi e tatau ona vaevae tutusa meatotino uma, ina ia mafai ai ona foʻia le tele naʻuā o le tamaoaiga ma le mativa lē tagolima. O lea na alu uma ai loʻu taimi i se faalapotopotoga mo talavou e lagolagoina le faa-Komunisi. I le 14 o oʻu tausaga, na ou galue ai i se poloketi e fesoasoani i le faaleleia o le siʻosiʻomaga, lea e ave ai pepa e lē o toe faaaogāina e gaosia mai ai nisi oloa fou. O le talisapaia e le aai o Aue o aʻu galuega, na latou aumaia ai se tusipasi e aloaʻia ai aʻu o se tagatānuu faaaloalogia. E ui lava i loʻu laʻitiiti i lenā taimi, ae na ou masani i nisi o tagata faipolotiki maualuluga o le GDR. Na ou manatu e saʻo mea na ou tuliloaina ma o le a ou maua se lumanaʻi lelei.

Peitaʻi na suia faafuaseʻi le tulaga o mea. I le 1989, na aveese ai le pa i Perelini faatasi ai ma faiga faa-Komunisi i atunuu i Europa i Sasaʻe. Na faaauau pea le suia o le tulaga o mea i le leaga. E leʻi umi ae ou iloa o se mea masani faiga lē tonu i le GDR. O se faataʻitaʻiga, e leʻi tonu le auala na feutagaʻi ai ma tagata e leʻi lagolagoina le faa-Komunisi. Na faapefea ona tupu lenā mea? Pe e lē o le talitonuga o tagata e lagolagoina le faa-Komunisi, e tutusa tagata uma? Pe na lē taulau faiga faa-Komunisi? Na matuā lofitūina aʻu i le popole.

O lea na suia ai mea na ou faamuamuaina, ma ou taulaʻi atu ai loa i musika ma le tusiaina o ata. Talu ai o le taimi lea o loo oʻu auai i se aʻoga musika ma le faanaunauga ina ia oo i le iunivesite, na ou manaʻo ai ina ia avea o se tagata faimusika ma se tusiata. E lē gata i lea, na ou lafoaʻia amioga tatau na aʻoaʻoina ai aʻu a o oʻu laʻitiiti. O le mea tāua iā te aʻu i lea taimi ia maua le fiafia, e aofia ai le tele o aʻu teine na iai. Ae e leʻi mafai e musika, tusiaina o ata ma se olaga soona fai, ona aveesea ai oʻu popolega. E oo lava i ata na ou tusiaina, na atagia mai ai loʻu lagona fefe. O le ā  le mea o le a tupu i le lumanaʻi? O le ā foʻi le fuafuaga o le olaga?

Na faateʻia aʻu ina ua ou maua tali na ou saʻilia. I se tasi afiafi i le aʻoga musika, na matou talatalanoa ai ma nisi o tamaiti aʻoga e uiga i le lumanaʻi. O se tasi o i latou o Mandy * ma o ia foʻi o se Molimau a Ieova. Na ia aumaia se fautuaga aogā mo aʻu. Na ia faapea mai, “Andreas, afai e te fia maua tali i au fesili e uiga i le olaga ma le lumanaʻi, ia iloilo totoʻa le Tusi Paia.”

Ou te leʻi talitonu atoatoa i lenā mea, ae na ou filifili e saʻili pea i le Tusi Paia mo ni tali. Na faasino mai e Mandy iā te aʻu le Tanielu mataupu e 2, ma na ou maofa i mea na ou faitau i ai. O loo faamatalaina i lea valoaga se faasologa o malo malolosi o le lalolagi, o ni pulega e telē se aafiaga e oo mai lava i lenei taimi. Na faasino mai foʻi e Mandy isi valoaga o le Tusi Paia e faatatau i lo tatou lumanaʻi. O lea, ua maua tali o fesili na ou saʻilia. Ae o ai na tusiaina na valoaga, ma o ai e mafai ona valoia le lumanaʻi ma le saʻo aʻiaʻi? Afai o le tulaga lenā, pe e moni la e iai se Atua?

Na faafesootaʻi e Mandy ia Horst ma Angelika, o se ulugalii Molimau a Ieova na fesoasoani mai ina ia ou malamalama lelei i le Afioga a le Atua. Na vave ona ou iloa e na o Molimau a Ieova le faalapotopotoga faalelotu e faaaogāina i taimi uma le suafa totino o le Atua o Ieova, ma faauaʻi atu i ai tagata. (Salamo 83:18; Mataio 6:9) Na ou aʻoaʻoina ai o loo ofoina mai e Ieova le Atua i tagata le faamoemoe o le ola e faavavau i se lalolagi parataiso. Ua faapea mai le Salamo 37:9: “A o ē e faamoemoe iā Ieova, o i latou ia e fai mo i latou le lalolagi.” Na ou fiafia i lenei faamoemoe, talu ai e mafai ona maua e so o se tasi o loo taumafai e ola e ōgatusa ma taʻiala tauamio a le Atua, e pei ona faamatalaina mai i le Tusi Paia.

Peitaʻi, na faigatā ona sui loʻu olaga ina ia ōgatusa ma taʻiala o le Tusi Paia. Na ou faamaualuga ona o laʻu galuega o se tagata faimusika ma o se tusiata, o lea na manaʻomia ai ona ou aʻoaʻoina ina ia faaalia le lotomaulalo. Na faigatā foʻi iā te aʻu ona tuua se olaga o amioga lē mamā. Ou te matuā faafetaia Ieova ona o le faaalia mai o lona onosaʻi, alofa mutimutivale, ma le malamalama iā i latou o loo taumafai malosi e ola e ōgatusa ma aʻoaʻoga a le Tusi Paia.

I tausaga muamua e 18 o loʻu olaga, na matuā telē se aafiaga iā te aʻu o faiga faa-Komunisi ma le talitonuga e leai se Atua, ma talu mai lenā taimi na suia e le Tusi Paia loʻu olaga. O mea na ou aʻoaʻoina na aveesea ai loʻu popole e faatatau i le lumanaʻi ma ou maua ai se fuafuaga o loʻu olaga. I le 1993 na ou papatiso ai o se Molimau a Ieova, ma i le 2000 na ou faaipoipo ai iā Tabitha o se tagata tapuaʻi maelega. E ma te faaalu le tele o le taimi e ma te mafaia e fesoasoani atu ai i isi ina ia iloa e faatatau i le Tusi Paia. O le toʻatele e matou te feiloaʻi e tutusa lelei o matou talaaga, e telē se aafiaga o faiga faa-Komunisi ma le talitonuga e leai se Atua i o matou olaga. Ou te lagona le faamalieina moni pe a ou faailoa atu i ai le auala e latou te iloa ai e faatatau iā Ieova.

Ina ua amata ona ou aufaatasi ma Molimau a Ieova, na matuā lē fiafia oʻu mātua. Peitaʻi talu mai lenā taimi na la vaaia aafiaga lelei i loʻu olaga, ona o loʻu faifaimea faatasi ma Molimau a Ieova. O se tala fiafia, ua la faitauina le Tusi Paia ma auai i sauniga faa-Kerisiano a Molimau a Ieova.

O loo ma fiafia pea ma Tabitha i la ma faaipoipoga, talu ai o loo ma taumafai e faatatauina fautuaga o loo aumaia i le Tusi Paia mo ulugalii faaipoipo. O se faataʻitaʻiga, o le utagia o le fautuaga e faatatau i le faamaoni i le paaga faaipoipo, o loo faamalosia ai pea la ma faaipoipoga.​—Eperu 13:4.

Ou te lē o toe lagona le fefe e faatatau i le olaga ma popole e faatatau i le lumanaʻi. Ou te lagona le avea ai o aʻu o se vaega o se aiga o tagata tapuaʻi i le lalolagi atoa, lea e maua le filemu ma le autasi moni. I totonu o lenei aiga e tutusa tagata uma. Ua leva ona ou talitonu i lenā mea, ma ua leva ona ou moomoo i ai i loʻu olaga atoa.