UA LATA i le faaiʻuga o Novema i le 1932, i le aai o Mekisikō. I le vaiaso na muamua atu, na faatoʻā faaaogā ai molī faasinoala i lenei aai pisi e silia ma le miliona tagata e nonofo ai. Ae i lenei vaiaso ua lē toe talanoa tagata e faatatau i molī. Ua taulaʻi atu nei le ʻaufaasalalau o le aai i se mea mataʻina o le a tupu. Ua lolofi uma atu ma a latou meapuʻeata i le nofoaga mo nofoaafi e faatalitali le taunuu ane o se mālō faapitoa, o Joseph F. Rutherford, o le peresitene o le Watch Tower Society i lenā taimi. Na iai foʻi ma Molimau a Ieova e faafeiloaʻi ma le fiafia le uso o Rutherford, o se sui usufono mo la latou tauaofiaga e tolu aso.

Na taʻua i le The Golden Age: “E mautinoa o lenei tauaofiaga o le a faamauina o se tauaofiaga iloga i le talafaasolopito o le upu moni i Mekisikō.” Ae aiseā na matilatila ai lenei tauaofiaga e ui lava pe tusa na o le 150 tagata na auai ai?

O le taimi lenā e leʻi fua tele mai le galuega talaʻi o le Malo i Mekisikō. E ui na faia ni fonotaga lāiti talu mai le 1919, ae na faaitiitia le aofaʻi o faapotopotoga i tausaga mulimuli ane. Ina ua tatala le ofisa o le lālā i le aai o Mekisikō i le 1929, na foliga mai o le a agaʻigaʻi i luma le galuega talaʻi. Peitaʻi na iai ni mea na faalavelave ane. Ina ua faatonuina uso e aua neʻi faafefiloi faatasi le galuega talaʻi ma faiga faapisinisi, na lē fiafia se tasi paeonia ma faamavae, ma faatū sana lava vaega e suʻesuʻeina le Tusi Paia. O le taimi foʻi lenā na aveesea ai le ovasia o le lālā ona o lona faia o ni amioga sesē. O lea, na matuā manaʻomia e Molimau faamaoni i Mekisikō ni faalaeiauga faaleagaga.

Na matuā faalaeiau e le uso o Rutherford nei Molimau faamaoni i lana asiasiga, e ala i ni lauga faalaeiau se lua na faia i le tauaofiaga, ma ni lauga aasa se lima na faasalalau i leitiō. O le taimi muamua lenā na faasalalau ai le tala lelei i leitiō i Mekisikō. Ina ua uma le tauaofiaga, na faamaopoopo e le ovasia fou o le lālā le galuega, ma uunaʻia ai Molimau maelega ina ia matuā faamalolosi i le talaʻiga faatasi ai ma le faamanuia a Ieova.

I le tausaga na sosoo ai, na faia se tauaofiaga i le taulaga o Veracruz ma se isi tauaofiaga i le aai o Mekisikō. Na amata ona fua mai le galuega talaʻi ona o le maelega o le ʻautalaʻi. E 82 le ʻautalaʻi i le 1931, ae i le 10 tausaga mulimuli ane ai na faasefuluina le toʻatele o le ʻautalaʻi. E toʻa 1,000 le ʻauusufono na malaga mai i le aai o Mekisikō mo le Fonotaga Faatiokarate i le 1941.

I le 1943, na faasilasila ai e le ʻautalaʻi e ala i ni faailoilo na tautau i tauʻau, le Fonotaga Faatiokarate “Le Atunuu Saʻoloto” na faia i aai e 12 o Mekisikō. *  O nei faailoilo o ni pepa malō na tautau i tauʻau, o se tasi lenā o auala na faaaogā e Molimau a Ieova e faasilasila ai a latou tauaofiaga talu mai le 1936.

Na taulau manuia solo a le ʻautalaʻi lea na faaaogā ai faailoilo i le aai o Mekisikō. O le mea lea na tusi ai le mekasini La Nación: “Na talosagaina Molimau i le uluaʻi aso o le fonotaga, ina ia valaaulia nisi tagata se toʻatele. Ae i le aso na sosoo ai, e leʻi ofi le fale na fai ai le fono.” E leʻi fiafia le lotu Katoliko i solo faalauiloa a le ʻautalaʻi, o lea na tetee ai i Molimau. E ui i na teteega, na faaauau ona auai uso ma tuafāfine lototetele i nei solo. Na lipotia foʻi e le La Nación: “Na vaaia e tagata o le aai tane ma fafine o loo ula a latou faailoilo e faalauiloa ai a latou fonotaga.” Na aofia ai i le lipoti se ata o uso ma tuafāfine o loo savavali i magāala o le aai. O le faaupuga lenei na tusia i lalo ifo o le ata: “Lilofia magāala.”

A o faagasolo na tausaga, e toʻatele Molimau na faia le tele o faataulaga ina ia auai i ni tauaofiaga i Mekisikō. O le toʻatele o le ʻauusufono, na malaga mai i nuu maotua ia e lē oo i ai ni nofoaafi po o ni auala. Na taʻua e se tasi faapotopotoga, “E lē oo mai ni nofoaafi i lo matou nuu.” O le pogai lea e savavali ai le ʻauusufono pe e ō i asini mo le tele o aso, ona taunuu lea i se nofoaga e faatali ai nofoaafi e ō ai i le aai e fai ai le tauaofiaga.

E lē tagolima le toʻatele o Molimau ma na tau lē lava le faasoa e ō ai i le tauaofiaga. Ina ua taunuu i le nofoaga e fai ai le tauaofiaga, o le toʻatele o i latou na api i uso ma tuafāfine o ē na faaalia le agaga talimālō. A o isi na nonofo i Maota mo Sauniga. I se tasi tauaofiaga, pe tusa ma le 90 le ʻauusufono na api i le lālā ma “e taʻi 20 atigipusa pepa na faaputu faatasi e fai ma o latou moega.” Na taʻua i le Yearbook na talisapaia e uso atigipusa na momoe ai, auā na latou faapea mai “e sili atu ona vaivai ma māfanafana nai lo o le simā.”

E ui i le tele o mea na latou faataulaga, ae na tauia taumafaiga a na uso lototalisapaia ina ia potopoto faatasi i fonotaga faa-Kerisiano. I aso nei, ua toeitiiti atoa le miliona o le ʻautalaʻi i Mekisikō ma o loo faaauau ona latou faaalia lenā lototalisapaia. * O le lipoti lenei a le lālā a Mekisikō i le 1949 e faatatau i uso: “E ui i tulaga faigatā o loo latou fesagaʻia, ae e lē faaitiitia ai lo latou maelega auā e latou te talanoa mo se taimi umi e faatatau i a tatou fonotaga, ma e faaauau ona tuufesili uso e faapea, O afea e fai ai le isi a tatou fonotaga?” O le agaga lava lenā o loo faaauau ona faaalia e uso i aso nei.​—Mea iloga o lo tatou talafaasolopito i Amerika Tutotonu.