INA ua sauni Aperaamo e ofo atu se taulaga i se mea mamao, ua taʻua i le Kenese 22:6: “Ua tago Aperaamo i fafie e fai ai le taulaga mū ma faaee atu iā Isaako lona atalii, ae ua ia uu i ona lima le afi ma le naifi, ona la ō faatasi ai lea.”

E lē o taʻua i le Tusi Paia le auala na amata ai afi i aso anamua. Ae e tusa ai o le tala i le Kenese 22:6, e manatu se faitofā o le Tusi Paia, e foliga mai “sa faigatā ona ola pea le afi a o faagasolo le malaga umi” a Aperaamo ma Isaako. O lea, atonu o loo faasino atu lenei mau i mea sa manaʻomia ina ia amata ai se afi.

Peitaʻi, ua faapea mai nisi e leʻi faigofie ona amata se afi i aso anamua. Nai lo o le taumafai o tagata e amata se afi, sa faigofie atu le aumai o se motumotu ola mai i se tuaoi ina ia faamumū ai se afi. O le pogai lea e manatu ai nisi ʻaufaitofā, atonu sa alu Aperaamo ma ave se mea e pei o se fagu omea e iai lona ʻau, sa tuu ai i totonu ni malala ola po o ni motumotu ola mai i se afi na mumū i le pō ua tuanaʻi. (Isa. 30:14) O le auala lenā sa feaveaʻi ai malala ola e faaaogā faatasi ma ni fafie ninii, ina ia toe faamumū ai se afi a o alu se faigāmalaga.