1, 2. Aiseā e faaauau ai ona iai tagata matitiva i lenei faiga o mea?

UA FAIGATĀ ma lē tonu le tulaga tau tamaoaiga i aso nei. Ua lē taulau saʻiliga a talavou mo ni galuega. Ua tuua e le toʻatele o latou ola i se tulaga lamatia ina ia siitia atu ai i atunuu e sili ona tamaoaiga. Ua faateteleina le tulaga mativa e oo lava i atunuu tamaoaiga. Ua atili ona mauʻoa ē mauʻoa ae ua atili ona matitiva ē matitiva. E tusa ai o fua faatatau lata mai nei, ua tutusa le tamaoaiga o le tasi pasene o ē aupito i sili ona mauʻoa i le lalolagi, ma le tamaoaiga o isi tagata uma i le lalolagi pe a tuufaatasi. E faigatā ona faamaonia le moni o lenei fua faatatau, peitaʻi e mautinoa e faitau piliona tagata e matuā matitiva, a o isi o loo matuā tele lo latou tamaoaiga e tuufaasolo atu i isi tupulaga. Na iloa e Iesu lenei tulaga leaga ina ua fetalai: “Tou te faatasi pea ma tagata matitiva.” (Mare. 14:7) Aiseā ua tupu ai lenei tulaga lē tonu?

² Na malamalama lelei Iesu e lē suia le tulaga tau tamaoaiga o loo iai nei seʻiloga ua oo mai le Malo o le Atua. O loo faia aʻe le lalolagi a Satani i faiga faapolotiki, faiga tau tapuaʻiga, faapea faiga faapisinisi matapeʻapeʻa lea e faaata mai i le “ʻaufaatauʻoa” o loo taʻua i le Faaaliga 18:3. Ua vavaeese atoatoa tagata o le Atua mai i faiga faapolotiki ma lotu sesē, ae o le toʻatele o i latou e lē mafai ona vavaeese atoatoa mai i faiga faapisinisi o le lalolagi a Satani.

3. O ā fesili o le a tatou talanoaina?

 ³ E ao iā i tatou o Kerisiano ona iloilo la tatou vaaiga e faatatau i faiga faapisinisi i aso nei e ala i le fesili ifo: ʻE faapefea ona ou faaaogā aʻu meafaitino ina ia faaalia ai loʻu faamaoni i le Atua? E faapefea ona ou faaitiitia le aafia i faiga faapisinisi a lenei lalolagi? O ā ni faaaʻoaʻoga e faaalia ai le maufaatuatuaina atoatoa o le Atua e ona tagata i lenei lalolagi faigatā?’

4, 5. (a) O le ā na tupu i le auauna pule na taʻua i le talafaatusa a Iesu? (e) O le ā le fautuaga na taʻua e Iesu mo ona soo?

⁴ Faitau le Luka 16:1-9. E faatupu manatu le talafaatusa a Iesu e faatatau i le auauna pule amiolētonu. Ina ua molia le auauna pule i le faatalalē, sa ia gaoioi ma le “atamai aogā” ina ia “fai ai uō” e fesoasoani iā te ia pe a aveesea lona tulaga o se auauna pule. * E leʻi faapea na faalaeiau e Iesu ona soo ia gaoioi i se auala lē tonu ina ia ola ai i lenei lalolagi. Na ia taʻua o amioga na a “tagata o le olaga nei.” Peitaʻi, sa ia faaaogā lenei talafaatusa ina ia aʻoaʻo ai se lesona tāua.

⁵ Na silafia e Iesu o le a manaʻomia e le toʻatele o ona soo ona saʻili mea e tausia ai i latou i lenei lalolagi piʻopiʻo, e pei o le auauna pule o lē na faafuaseʻi ona iai i se tulaga faigatā. O lea na ia uunaʻia ai ona soo e faapea, “o le ʻoa a le amiolētonu, ia outou fai ai uō ma outou, auā pe a lē toe aogā ia mea,” e taliaina e Ieova ma Iesu “outou i fale e faavavau.” O le ā e tatou te aʻoaʻoina mai i le fautuaga a Iesu?

6. E faapefea ona tatou iloa e leʻi avea faiga faapisinisi o loo iai i aso nei ma vaega o le finagalo o le Atua?

⁶ E ui lava e lē o faamatala mai e Iesu le māfuaaga ua ia taʻua ai meafaitino e “amiolētonu,” ae e manino mai i le Tusi Paia e leʻi avea faiga faapisinisi ma se vaega o le finagalo o le Atua. E anoanoaʻi mea na saunia e Ieova ina ia tausia ai Atamu ma Eva i Etena. (Kene. 2:15, 16) Mulimuli ane, ina ua foaʻi atu le agaga paia i le faapotopotoga o ē faauuina i le uluaʻi senituri, “e leai se tasi ua faapea mai, o mea ua iā te ia, o ana lava mea; a ua tuufaatasi a latou mea uma.” (Galu. 4:32) Na taʻua e le perofeta o Isaia e iai le taimi o le a maua fua ai e tagata uma so o se mea mai i le laueleele. (Isa. 25:6-9; 65:21, 22) Ae i le taimi lenei, e manaʻomia e soo o Iesu le “atamai aogā” ina faaaogā ai “ʻoa a le amiolētonu” a lenei lalolagi, ina ia saʻili ai mea e tausi ai i latou a o taumafai e faafiafia le Atua.

7. O le ā le fautuaga o loo i le Luka 16:10-13?

⁷ Faitau le Luka 16:10-13. Na faia e le auauna pule i le talafaatusa a Iesu ni uō mo lona lava lelei. Peitaʻi, na finagalo Iesu i ona soo ia fai uō i le lagi mo ni māfuaaga e lē manatu faapito. I fuaiupu pe a uma le talafaatusa, o loo faafesootaʻi atu ai le faaaogā o “ʻoa a le amiolētonu” i le faamaoni i le Atua. O le uiga o le manatu o Iesu, e mafai ona tatou “faamaoni” i le auala e pulea ai le faaaogāina o na ʻoa pe a tatou mauaina. E faapefea?

8, 9. Faamatala mai ni faaaʻoaʻoga o auala ua faaalia ai e nisi le faamaoni i lo latou faaaogāina o ʻoa a le amiolētonu.

⁸ O se tasi o auala e tatou te faamaoni ai i a tatou meafaitino, e ala lea i le faia o foaʻi tautupe mo le galuega talaʻi i le lalolagi aoao lea na valoia e Iesu o le a faataunuuina. (Mata. 24:14) Sa iai se pusa tupe a se teineitiiti  i Initia sa faaputu ai ana siliva. Sa iʻu lava foʻi ina musu e toe faatau ni ana meataalo ae sefe le tupe. Ina ua tumu lana pusa tupe, sa ia foaʻi uma atu ina ia faaaogā mo le galuega talaʻi. Na foaʻi atu e se uso i Initia e iai sona togāniu le tele o niu i le ofisa faaliliu mo le gagana Malayalam. Talu ai e faatau mai e le ofisa faaliliu a latou niu, e manatu la le uso e sili pe a foaʻi saʻo i ai ana niu nai lo o le ave i ai o le tupe. O le atamai aogā lenā. E faapena foʻi uso i Eleni, e masani ona latou foaʻi atu suāuu olive, sisi, ma isi meaʻai mo le aiga Peteli.

⁹ Ua tuu atu e se uso mai i Sri Lanka ae ua nofo nei i se isi atunuu mamao, lona fale o loo i Sri Lanka ina ia fai ai sauniga ma fonotaga, ma nonofo ai i latou o loo i le auaunaga faataimi atoa. Ua faataulaga e le uso ana tupe, ae ua fesoasoani tele i le ʻautalaʻi o loo iai i inā e lē tele ni a latou tupe. I se atunuu e faasā ai le galuega talaʻi, ua faaavanoa e uso o latou fale ina ia fai ma Maota mo Sauniga, ma ua mafai ai ona maua fua nofoaga e fai ai sauniga a le toʻatele o paeonia ma isi e lē tele ni a latou tupe.

10. O ā nisi o faamanuiaga e tatou te maua pe a limafoaʻi?

¹⁰ Ua faaalia mai i nei faaaʻoaʻoga le “faamaoni” o tagata o le Atua “i nai mea itiiti,” i le auala e faaaogā ai a latou ʻoa faaletino ia e itiiti le tāua nai lo o ʻoa faaleagaga. (Luka 16:10) O ā faalogona o nei uō a Ieova e faatatau i faataulaga ua latou faia? Ua latou iloa o le limafoaʻi o se auala lea e maua ai ʻoa “moni.” (Luka 16:11) E faia e lē aunoa e se tuafafine ni foaʻi tautupe ina ia lagolagoina ai le galuega o le Malo. Ua ia faamatala mai se faamanuiaga ua ia maua e faapea: “O loʻu limafoaʻi i le itu faaletino, ua iai se aafiaga mataʻina iā te aʻu a o faagasolo tausaga. Ua ou iloa o le tele ou te limafoaʻi ai i le itu faaletino, o le atili ai foʻi lenā ona ou agalelei i a matou feutagaʻiga ma isi. Ua atili ona ou agalelei e ala i le lotofaamagalo, onosaʻi i isi, ma talia mea e tigā ai ma fautuaga.” Ua iloa e le toʻatele, o le limafoaʻi e faatamaoaigaina ai i le itu faaleagaga.​—Sala. 112:5; Faata. 22:9.

11. (a) E faapefea i lo tatou foaʻi ma le lotomalie ona faaalia ai le “atamai aogā”? (e) Ua faapefea ona fesoasoani le tamaoaiga o isi i le lē tagolima o isi? (Tagaʻi i le ata i luga aʻe o le matua.)

¹¹ O se isi auala e faaalia ai le “atamai aogā” i le faaaogāina o a tatou meafaitino e lagolago ai manaʻoga o le Malo, o le faaaogā tatau lea o o tatou tulaga e fesoasoani ai i isi. O i latou ua maua ʻoa faaletino ae e lē o mafai ona auai i le faiva faataimi atoa pe siitia i vaipanoa o loo tele ai le manaʻoga, ua fiafia i le iloaina o loo foaʻi a latou tupe ina ia lagolagoina ai le faiva a isi. (Faata. 19:17) O foaʻi tautupe ua fesoasoani e saunia ai lomiga, ma lagolagoina ai le galuega talaʻi i oganuu e matuā matitiva ae o loo iai le faatelega i le itu faaleagaga. I le tele o tausaga i atunuu e pei o Congo, Madagascar, ma Rwanda, sa masani ona filifili uso pe faatau meaʻai mo o latou aiga pe faatau ni kopi o le Tusi Paia. I nisi taimi e tutusa le tau o le Tusi Paia ma le totogi o se tagata faigaluega i le vaiaso po o  le masina. Ae i le taimi nei, e ala i foaʻi a le toʻatele ma ʻle fesoasoani o le tamaoaiga o isi i le lē tagolima o isi,’ ua faaliliuina ai e le faalapotopotoga a Ieova Tusi Paia ma tufa fua atu i sui taʻitasi o aiga, faapea tagata suʻesuʻe o le Tusi Paia o loo galala faaleagaga. (Faitau le 2 Korinito 8:13-15.) O lea, ua avea ai ma uō a Ieova i latou o loo foaʻi atu faapea ē o loo taliaina mai.

12. Na faapefea ona faaalia e Aperaamo lona faatuatuaina o le Atua?

¹² O se isi auala e avea ai i tatou ma uō a Ieova, o le faaitiitia lea o lo tatou aafia i faiga faapisinisi ma ia faaaogā o tatou tulaga ina ia saʻili ai ʻoa “moni.” Sa usiusitaʻi le tane faatuatua anamua o Aperaamo ma ia tuua le nuu tamaoaiga o Uro, ae nofo i faleʻie ma saʻili ia avea ma uō a Ieova. (Epe. 11:8-10) Sa ia maufaatuatuaina le Atua o le Puna o le tamaoaiga moni, nai lo o le saʻili o meafaitino e atagia atu ai le leai o se faatuatua. (Kene. 14:22, 23) Na faalaeiau e Iesu isi ia iai le faatuatua malosi faapena, ina ua ia faapea atu i se tauleʻaleʻa: “Afai e te manaʻo ia atoatoa ona lelei, ia e alu e faatau atu au meafaitino ma foaʻi atu i tagata matitiva, ona e maua lea o ʻoa i le lagi, ona e sau ai lea ma mulimuli mai iā te aʻu.” (Mata. 19:21) E leʻi iai i lenā tauleʻaleʻa le faatuatua e pei ona iai iā Aperaamo, ae sa iai isi na latou matuā faatuatuaina le Atua.

13. (a) O le ā le fautuaga na avatu e Paulo iā Timoteo? (e) E faapefea ona tatou faatatauina i aso nei le fautuaga a Paulo?

¹³ O Timoteo o se tagata faatuatua. Ina ua uma ona taʻua e Paulo Timoteo “o se fitafita lelei a Keriso Iesu,” na ia faapea atu iā Timoteo: “E leai se tagata e auauna o se fitafita e auai i faiga faapisinisi, ina ia fiafia mai ai iā te ia lē na filifilia o ia e avea ma fitafita.” (2 Timo. 2:3, 4) Ua taumafai malosi soo o Iesu i aso nei, e aofia ai le silia i le miliona o auauna faataimi atoa, ina ia faatatau lenā fautuaga a Paulo e tusa ai ma o latou tulaga. Ua latou teena faasalalauga faatosina a lenei lalolagi matapeʻapeʻa. Ua latou manatua le mataupu silisili o loo i le Faataoto 22:7: “E fai ma auauna le tagata aitalafu i le tagata na nonō mai ai.” E pau le mea e manaʻo ai Satani ia alu uma lo tatou taimi ma le malosi ina ia pologa ai i lana lalolagi o faiga faapisinisi. O nisi o a tatou filifiliga e tatou te ono nonofo aitalafu ai mo le tele o tausaga. E mafai ona matuā omia lo tatou tulaga tau tamaoaiga ona o ni nonogatupe tetele mo ni fale, aʻoaʻoga, taavale taugatā, e oo lava i faaipoipoga tetelē. E tatou te faaalia le atamai aogā pe a faafaigofie o tatou olaga ma faaitiitia aitalafu ma tupe faaalu. O le faia faapea o le a tatou saʻoloto ai e auauna i le Atua nai lo o le pologa i faiga faapisinisi i aso nei.​—1 Timo. 6:10.

14. O le ā e tatau ona tatou maumauaʻi e fai? Faamatala mai ni faaaʻoaʻoga.

¹⁴ O le faafaigofie o o tatou olaga e aofia ai le faatulaga o mea e tatau ona faamuamua. Sa iai se pisinisi e taulau manuia a se tasi ulugalii e gaosi ai oloa. Peitaʻi, na la mananaʻo e toe auai i le faiva faataimi atoa. O lea na la faatau ese atu ai le la pisinisi, le la vaa, ma isi meafaitino, ae tauofo e fesoasoani i le fausiaina o le ofisa ulu i Warwick i Niu Ioka. O se faaeaga faapitoa mo i laʻua le auauna ai i le Peteli faatasi ma le la tama teine ma lana tane, ma o nisi vaiaso na galulue faatasi ai ma mātua o le uso (lea na faatau ese le pisinisi), ia sa galulue foʻi i Warwick. O se tuafafine paeonia i Colorado i Amerika, sa maua sana galuega faavaitaimi i se faletupe. Sa matuā fiafia pule o le faletupe i le galue a le tuafafine, ma ofo atu loa iā te ia le avanoa e faigaluega faataimi atoa ai, ma o le a faatoluina lona totogi. Peitaʻi, sa teena e le tuafafine  lenei ofo mataʻina ona o le a faaitiitia ai le taimi e uaʻi atu ai i lana faiva. Ua na o ni nai faaaʻoaʻoga nei o le tele o faataulaga ua faia e auauna a Ieova. O lo tatou maumauaʻi ia faamuamua manaʻoga o le Malo, ua faaalia ai e sili atu ona tāua la tatou faauōga ma le Atua ma ʻoa faaleagaga, nai lo o mea e ofo mai e faiga faapisinisi a lenei lalolagi.

15. O ā ʻoa e maua ai le faamalieina sili?

¹⁵ O le mauaina o le tamaoaiga faaletino, e lē faapea o se faailoga lenā o le faamanuia a le Atua. E faamanuia e Ieova i latou o ē e “tamaoaiga i galuega lelei.” (Faitau le 1 Timoteo 6:17-19.) O se faaaʻoaʻoga, ina ua iloa e Lucia * o loo manaʻomia se ʻautalaʻi i Alapania, sa siitia atu loa i inā mai i Italia i le 1993 e aunoa ma ni mea e ola ai, ae faalagolago atoatoa atu iā Ieova. Sa ia aʻoaʻoina le gagana Alapania ma fesoasoani i tagata e silia i le 60 ina ia papatiso. Atonu o le toʻatele o tagata o le Atua e lē o talaʻi i ni oganuu e fua tele mai faapena. Peitaʻi, o so o se mea e tatou te faia e fesoasoani ai i isi ina ia maua le ala i le ola ma tumau ai, o se mea o le a faatāuaina e faavavau e i tatou ma i latou.​—Mata. 6:20.

16. (a) O le ā o le a tupu i faiga faapisinisi o loo iai i aso nei? (e) E faapefea i le mea ua tatou iloa e faatatau i le lumanaʻi ona aafia ai la tatou vaaiga e faatatau i meafaitino?

¹⁶ Ina ua taʻua e Iesu i le Luka 16:9 “pe a lē toe aogā ia mea [ʻoa a le amiolētonu],” o le uiga o lana fetalaiga e iai le taimi o le a lē toe aogā ai na ʻoa. I nei aso e gata ai, ua faalētonu nisi o faletupe ma le tamaoaiga o nisi atunuu. Peitaʻi, i le lumanaʻi lata mai o le a faateteleina le leaga o le tulaga o mea i le lalolagi aoao. O le a tafiesea faiga faapolotiki, lotu, ma faiga faapisinisi ia ua faia aʻe ai le faiga o mea a Satani. Na valoia e perofeta o Esekielu ma Sefanaia o le a lē toe aogā auro ma siliva, ia e tāua i le tele o taimi i faiga faapisinisi. (Eseki. 7:19; Sefa. 1:18) O ā ni o tatou faalogona pe a lata ina tatou feoti, ae iloa ane na tatou faataulaga ʻoa moni ina ia saʻilia ai le tele o “ʻoa a le amiolētonu” a lenei lalolagi? E ono pei o tatou lagona o se tagata na galue mo le olaga atoa ina ia faaputu le tele o tupe, ae ia iloa ane o tupe sesē uma na tupe. (Faata. 18:11) Ioe, e mautinoa e iai le taimi o le a lē toe aogā ai ʻoa faaletino. O lea la, aua neʻi melea le avanoa e faaaogā ai au meafaitino ina ia “fai ai uō” i le lagi. O so o se mea e tatou te faia ina ia faaauiluma ai manaʻoga o le Malo o Ieova, e faatamaoaigaina ai i tatou faaleagaga.

17, 18. O ā faamanuiaga o loo tulimataʻia e uō a le Atua i le lumanaʻi?

¹⁷ Pe a oo mai le Malo o le Atua, o le a lē toe iai ni fale mautotogi ma ni nonogatupe mo fale. O le a anoanoaʻi ma maua fua meaʻai, ma o le a lē toe totogiina ni pili i fomaʻi. O le a olioli uō a Ieova i mea e sili ona lelei e maua mai i le laueleele. O le a faaaogā auro, siliva, ma maatāua ina ia teuteu ma faamatagofie ai mea, ae e lē mo ni faiga faapisinisi. O le a maua fua mea faufale anagatā e pei o laupapa, maa, ma uʻamea e fausia ai fale matagofie. O le a fesoasoani mai a tatou uō ona o lo latou loto fesoasoani ae e lē ona o tupe. O le a tatou olioli i mea uma e maua i le lalolagi.

¹⁸ O nisi na o faamanuiaga o le a maua e i latou e faia uō i le lagi. O le a alalaga fiafia tagata tapuaʻi o Ieova i le lalolagi pe a faalogo atu i le fetalaiga a Iesu e faapea: “Ō mai ia outou o ē ua faamanuiaina e loʻu Tamā, ia fai mo outou tofi le malo ua saunia mo outou talu ona faavaeina le lalolagi.”​—Mata. 25:34.