Fesili Mai le Au Faitau

O nisi o Molimau a Ieova ua ofoina i ai galuega e aafia ai fale po o fanua o lotu. O le ā le vaaiga a le Tusi Paia i ia galuega?

O lenei mataupu e ono fesagai ma Kerisiano o ē o loo mananao moni e faatatauina le 1 Timoteo 5:8, lea e faamamafa ai le tāua o le tausiga faaletino o le aiga o se tasi. A o manaomia moni lava e Kerisiano ona faatatauina lena fautuaga, ae o le a lē taʻutonuina ai lo latou taliaina o so o se galuega totogi po o galuega uma lava, e tusa lava po o le ā le ituaiga o galuega o aafia ai. E talisapaia e Kerisiano le manaoga ina ia faaeteete i isi faailoaga o le finagalo o le Atua. Mo se faaaoaoga, o le faanaunauga o se tagata e tausi lona aiga o le a lē taʻutonuina ai lona solia o le mea o fai mai ai le Tusi Paia e faatatau i amioga lē mamā po o le fasioti tagata. (Faatusatusa i le Kenese 39:4-9; Isaia 2:4; Ioane 17:14, 16.) E matuā tāua foi i Kerisiano lo latou gaoioi e ogatusa ma le poloaiga e ō ese mai Papelonia le Aai Tele, le emepaea o lotu sese i le lalolagi aoao.—Faaaliga 18:4, 5.

E eseese tulaga o galuega o loo fesagai ma auauna a le Atua i itu eseese o le lalolagi. O le a lē aogā ma e lē oo foi i ai la matou pule e taumafai ai e lisi atu galuega uma e tatau ona fai atoa ma le faia o ni tulafono maʻoti. (2 Korinito 1:24) Peitai, seʻi o matou taʻuina atu nisi o vala e ao i Kerisiano ona iloiloina i le faia o faaiuga totino i galuega. O nei vala sa faatulaga faapuupuu atu i Le Olomatamata o Me 1, 1983, i se mataupu e faatatau i le mauaina o aogā mai i o tatou loto fuatiaifo ua aumaia e le Atua. Sa faatulai mai ai i le pusa ni fesili autū se lua ona lisi mai ai lea ma isi vala e aogā.

O le fesili autū muamua lenei: Pe o taʻusalaina e le Tusi Paia lea ituaiga o galuega? I se faaopoopoga i lenei mea na taʻua ai e Le Olomatamata e faapea e faasāina e le Tusi Paia le gaoi, faaaogaina ma le lē tatau o le toto, ma le ifo i tupua. E ao i se Kerisiano ona alofia galuega totogi e faaauilumaina tuusaʻo ai faiga e lē taliaina e le Atua, e pei o faiga ia na seʻi faatoʻā taʻua atu nei.

O lona lua o fesili: Pe o le faia ea o lenei galuega e avea ai lea tagata ma sē e lagolagoina se faiga ua taʻusalaina? Ma le manino lava, o se tagata e faigaluega i se nofoaga e fai ai taaloga fai tupe, se falemai mo faapaʻūga tama, po o se fale talitane ua avea ai ma sē lagolago i faiga na e lē tusa ai ma le Tusi Paia. E tusa lava pe o lana galuega iina i aso taitasi e na o le saluina o le fale po o le taliina o telefoni, ae ua fai lava sona sao i se faiga e taʻusalaina e le Afioga a le Atua.

E toatele Kerisiano o loo fesagai ma filifiliga i galuega ua latou iloaina, o le tau lava o le iloiloina o na fesili ua fesoasoani ia i latou e faia ai a latou lava faaiuga.

Mo se faaaoaoga, mai i fesili na e lua, o le a iloa ai e se tasi pe aisea e ao ai i se tagata tapuai moni ona lē faigaluega fesootai saʻo atu i se faalapotopotoga a lotu sese, galue ai mo le lotu ma i le lotu. Ua faatulaga mai i le Faaaliga 18:4 le poloaiga: “Loʻu nuu e, ia outou o ese ia te ia, ina neʻi faatasia outou i ana agasala.” O le a faatasia se tagata i galuega ma agasala a Papelonia le Aai Tele pe afai e avea o ia ma sē e masani ona faigaluega totogi i se lotu o loo aʻoaʻoina tapuaiga sese. E tusa lava pe o le galuega o se teuteu faatoaga laau, se teu fale, se tasi e toe faafouina mea ua faaletonu, po o se suetusi, o lana galuega o le a fesoasoani e faaauiluma ai tapuaiga e feteenai ma le tapuaiga moni. E lē gata i lena, o tagata o ē o le a latou vaai i lenei tagata faigaluega o galue e faamatagofieina le falesā, tausia i se tulaga lelei, ia po o le faia o se vaega i mea faalotu a lena lotu, o le a faigofie lava ona latou manatu o ia o se tasi o lena lotu.

Ae faapefea la, se tagata e lē o masani ona ia faigaluega totogi mo se lotu po o se faalapotopotoga faalotu foi? Atonu ua na ona manaomia lava e fai se galuega e faaleleia se faafitauli faafuasei e toe faalelei se paipa ua pa i le fogafale pito i lalo o le falesā. Faamata e ese lena mai le ofoina atu o sana tau mo se konekarate, e pei o le atoina ma le saunia o mea e taofi ai le vevela i le faalo o le falesā?

E toe fia faailoa atu foi, e anoanoai tulaga eseese tatou te ono mafaufauina. O lea seʻi o tatou iloiloina la isi vala e lima na faatulaga mai e Le Olomatamata:

1. Pe o le galuega ea ua na o se auaunaga mo tagata lautele ua avea ai ma mea ua lē faasāina i le Tusi Paia? Fai ma faataitaiga se tufa meli. O lona tufaina atu o meli o le a lē mafai ona uiga ai faapea o loo ia faaauilumaina se faiga e faasāina pe afai o se tasi o fale o i lea vaipanoa sa ia galue ai o se falesā po o se falemai mo faapaʻūga tama. O loo saunia e le Atua le malamalama o le la lea e susulu atu i faamalama o fale uma, e aofia ai se falesā po o se falemai faapena. (Galuega 14:16, 17) E ono manatu se Kerisiano o lē e galue o se tufa meli faapea o loo ia faia se auaunaga mo tagata uma, i aso fai soo. E ono tutusa ma se Kerisiano o lē e tali atu i se valaau faanatinati mo se fesoasoani—se palama ua valaaulia e taofi le pa o se paipa ma lolovaia ai le falesa po o se tagata e faigaluega i taavale a falemai (ambulance) e manaomia e togafitia se tagata ua matapogia a o faia le lotu. E ono manatu o ia i lenei mea ua na o se tuuina atu o se fesoasoani i se uso a tagata i le taimi o le faalavelave.

2. O le ā le telē e oo i ai le pule a lea tagata i le galuega o loo faia? O se Kerisiano e fai sona faleoloa o le a lē ioe atu o ia e ota mai ma faatau atu ni tupua, ni mea e fesootai ma faiga faataulaitu, o sikareti, po o sosisi e faia i le toto. Ona o ia e ana le faleoloa o ia foi la e pulea. E ono uunaia o ia e tagata e faatau atu sikareti po o tupua ma  maua se tupe faasili, ae o le a ia gaoioi ia ogatasi ma ona talitonuga faale-Tusi Paia. Peitai i le isi itu, o se Kerisiano e galue i se faleoloa telē e faatau atu ai taumafa e ono tofia o ia e galue i le masini e tala ai tupe, e polesi le fola o le fale, po o le tausitusi. E lē o ia e pulea po o ā mea e ota ma faatau atu, e tusa lava po o nisi o nei mea e lē talafeagai, e pei o sikareti ma mea mo aso mālōlō faalotu. * (Faatusatusa i le Luka 7:8; 17:7, 8.) E fesootai lenei ma le manatu o loo sosoo mai.

3. O le ā le telē o loo aafia ai le tagata? Seʻi tatou toe foi atu i le faataitaiga i se faleoloa. Atonu o se tagata faigaluega e galue i le masini e totogi ai faatauga ia po o le faatutumu o fata ua avanoa o le a ia taulimaina ai ni sikareti po o ni mea faalotu i nisi taimi; ua na o se vaega itiiti lena o lana galuega atoa o loo fai. Peitai, e telē lava se eseesega ma se tagata faigaluega i le faleoloa lava lea ae e galue i le vaega e faatau ai tapaa! O lana galuega i aso uma lava, e taulai atu i se mea e feteenai ma talitonuga faa-Kerisiano. (2 Korinito 7:1) Ua faataitaia mai i lenei mea le pogai e tatau ai lava ona iloiloina le telē o le aafiaga po o fesootaiga pe a faia filifiliga e faatatau i galuega.

4. O fea e sau ai lona totogi po o le nofoaga o loo faia ai le galuega? Iloilo tulaga nei e lua. Ina ia foliga lelei atu i le lautele, ua fuafua ai le falemai mo faapaʻūga tama e totogi se tamaloa e faamamāina auala e tau lalata ane. O lona totogi e sau mai le falemai mo faapaʻūga tama, ae e lē o faigaluega ai iina, ma e leai foi se isi o vaai ia te ia iina i le aso atoa. Na i lo lena, latou te matauina o ia o loo fai se galuega mo le lautele e foliga mai e lē feteenai ma le Tusi Paia, e tusa lava po o ai e totogia o ia. Ae o se faaeseesega lenei. I se atunuu e faataga ai faaletulafono le talitane, e totogi ai e le matagaluega o le soifua maloloina mo le lautele se teine tausimaʻi e faigaluega i fale talitane po o fale taā na te siakiina le tulaga maloloina ina ia faaitiitia le faasalalau atu o faamai e pipisi i feusuaiga faaleituaiga. E ui o loo totogi o ia e le matagaluega a le soifua maloloina mo le lautele, ae o lana galuega atoa o loo faatino i fale taā, o loo faia ia saogalemu ai le amioleaga, ma ia taliaina atili. O nei faaaoaoga ua faataitaia ai pe aisea e ao ai ona iloiloina po o fea e sau ai lona totogi ma le nofoaga o loo faia ai le galuega.

5. O le ā le aafiaga o iai i le faia o le galuega; pe o le a faaleagaina ai le loto fuatiaifo o le tagata lava ia pe faatausuai ai isi? E ao lava ona manatunatu i le loto fuatiaifo, e lē gata o lou loto fuatiaifo ae faapena foi loto fuatiaifo o isi. E tusa lava po o se galuega (e aofia ai le nofoaga e fai ai, ma le mea e sau ai le totogi) e foliga mai e talia e le toatele o Kerisiano, e ono lagona e se tasi tagata e faapea o le a faaleagaina ai lona lava loto fuatiaifo. O le aposetolo o Paulo, o lē na faataatiaina se faaaoaoga lelei, na faapea mai: “O loo taofi i matou ua ia te i matou le loto fuatia ifo lelei, o loo loto i matou e amio lelei i mea uma lava.” (Eperu 13:18) E ao lava ona tatou alofia le faia o galuega e faaatuatuvale ai i tatou; peitai, e ao foi ona aua tatou te faitio i isi e ese o latou loto fuatiaifo. I le isi itu, e ono manatu se Kerisiano e lē feteenai le Tusi Paia ma se galuega o ia faia, ae ua ia iloa o le a matuā oso ai le lē fiafia o le toatele i le faapotopotoga ma le nuu. Na faaatagia mai e Paulo le vaaiga saʻo i ana upu: “Ua matou le tuuina atu se mea e tasi e tausuai ai, ina neʻi taʻuleagaina la matou galuega; a o mea uma lava ua faailoa ai i matou, o auauna a le Atua i matou.”—2 Korinito 6:3, 4.

Seʻi tatou toe foi lava la i le fesili autū e faatatau i le faigaluega i se falesā, e pei o le faapipiiina o ni faamalama fou, faamamāina o le kapeta, po o le toe faaleleia o ogaumu. O le a faapefea ona aafia ai vala e pei ona taʻua i luga?

Manatunatu i le tulaga tau pule. Pe o le Kerisiano ea o ia o lē ana le galuega po o ia le pule o lē e faia le filifiliga pe fai lea ituaiga galuega i se falesā? Pe o le a manao ea se Kerisiano o lē o loo iai lena pule e aufaatasi ma Papelonia le Aai Tele e ala i le ofoina atu o sana tau e fai ai se galuega po o le faia o sana konekarate e fesoasoani ai i se tapuaiga e faaauiluma tapuaiga sese? Po ua lē tutusa ea lena ma le filifili o se tasi e faatau atu sikareti po o ni tupua i lona lava faleoloa?—2 Korinito 6:14-16.

Afai o le Kerisiano o se tagata faigaluega o lē e leai sona leo i le filifilia po o ā galuega e talia, e iai isi vala e ao ona iloiloina, e pei o le nofoaga e fai ai atoa ma le telē o le aafiaga. Pe o le tagata faigaluega ea o lea ua na ona manaomia e tiliva atu po o le faatulaga o nofoa fou mo se taimi e tasi, po o le faia o se auaunaga i uso a tagata, e pei o se tagata fui mu o loo tapē se mu i le falesā a o lei sasao tele atu? E toatele o le a manatu i lenei mea e ese mai i se tagata faigaluega o se pisinisi e faaalu se taimi umi i le valiina o le falesā po o le faia e lē aunoa o se vaega i le teuteuina o le togalaau ina ia faamatagofie ai. O sea fesootaiga e lē aunoa pe fesootai atu foi i ai mo se taimi umi o le a faateleina ai le ono faapipii atu e le toatele o lea Kerisiano ma se lotu lea o loo ia faapea mai e lē ioe i ai, e ono tausuai ai i latou.—Mataio 13:41; 18:6, 7.

 Ua tatou lāgā le tele o iloiloga tāua e faatatau i galuega. Sa talanoaina nei iloiloga e faatatau patino atu i se fesili maʻoti e aofia ai tapuaiga sese. Peitai, e mafai foi ona iloiloina i le fesootai atu i isi ituaiga galuega. I tulaga taitasi uma lava, e ao ona fai se iloiloga faatasi ai ma le tatalo, ma ia manatunatu i vala maʻoti—ma atonu foi e tutasi—o le tulaga ua tulai mai. O vala ua taʻua i luga ua uma ona fesoasoani i le toatele o Kerisiano faamaoni ina ia fai ni faaiuga e tusa ai ma le loto fuatiaifo e atagia mai ai lo latou naunautaiga ina ia savavali i le amio saʻo ma le amiotonu i luma o Ieova.—Faataoto 3:5, 6; Isaia 2:3; Eperu 12:12-14.

[Faaopoopoga i lalo]